កីឡាករ រ៉ាហ្វាអែល ណាដាល់ (Rafael Nadal) របស់អេស្ប៉ាញ បានយកឈ្នះកីឡាករលេខ១ ពិភពលោក ណូវ័ក ឌីចូកូវីក (Novak Djokovic) ៣សិតទល់នឹង១សិត និងបានលើកពាន «យូអេសអូផិន» (US Open) លើកទី២របស់គាត់ នៅក្នុង​ទីក្រុងញ៉ូយ៉ក កាលពីថ្ងៃច័ន្ទ។

កីឡាករ រ៉ាហ្វាអែល ណាដាល់ ពេលលើកពានរង្វាន់ របស់ យូអេស អូផិន។ (រូបភាព rafael.nadal.over-blog.com)

កីឡាករលេខ២ ពិភពលោក ណាដាល់ វ័យ២៧ឆ្នាំ បានចំណាយពេលអស់ ៣ម៉ោង ២១នាទី ទើបអាចយកឈ្នះ ឌីចូកូវីក ដោយលទ្ធផល ៦-២, ៣-៦, ៦-៤ និង ៦-១។

បច្ចុប្បន្ន ណាដាល់បានឈ្នះពានរង្វាន់ហ្រ្គែនស្លាម (Grand Slam) ឯកត្តជនចំនួន ១៣ហើយ ខណៈដែល កីឡាករ រ៉ចឺ ហ្វេដឺរឺ (Roger Federer) ឈ្នះបានច្រើនជាងគេរហូតដល់ ១៧លើក។

ហើយបន្ទាប់ពីអវត្តមានក្នុងការប្រកួត «យូអេសអូផិន» កាលពីឆ្នាំមុន ដោយសារតែរបួសជង្គង់ ៧ខែរួចមកនោះ ពេលនេះ​ណាដាល់ កំពុងតែខិតជិតដល់ការប្រជែងយកដំណែងលេខ១ ពិភពលោកមកវិញ។

កីឡាករអេស្ប៉ាញ ដែលមានអ្នកគាំទ្រជាច្រើនលើសលុបនោះ ពិតជាមិនធ្វើឲ្យប្រិយមិត្តរបស់គាត់ខកបំណងនោះឡើយ ដោយនៅ១ម៉ោងដំបូង គាត់បានគ្របដណ្តប់គូប្រជែងយ៉ាងខ្លាំង។ ខណៈដែល ឌីចូកូវីកកំពុងតែច្របូកច្របល់ ណាដាល់​វាយសម្រុកយកជ័យជំនះបានសម្រេច នៅក្នុងសិតទី១។

ណាដាល់ ចំណាយពេលអស់ ៤២នាទី ដើម្បីយកឈ្នះសិតទី១ បន្ទាប់មកក៏មានសម្រាក២ដង។ ក្រោយពីសម្រាក នៅនាទី​ទី៨០ឡើង ឌីចូកូវីកហាក់ដូចជាមានប្រៀបវិញម្តង ដោយបានវាយ សម្រុកផ្ទួនៗទៅលើណាដាល់វិញ ធ្វើឲ្យអ្នកគាំទ្រ​កីឡាករទាំង២នាក់ រំភើប ភ័យផង អរផងរៀងៗខ្លួន ហើយទីបំផុត ណាដាល់បានបរាជ័យក្នុងសិតទី២វិញ។

បន្ទាប់ពីចំណាយពេលអស់ ២ម៉ោង ១៧នាទី កីឡាករលេខ២ ពិភពលោក ណាដាល់កំពុងតែមានពិន្ទុស្មើគ្នា ៣-៣ នៅ​ក្នុង​សិតទី៣ ដែលធ្វើឲ្យការប្រកួតកាន់តែរំជើបរំជួល។ បន្ទាប់មកទៀត ពួកគេបានប្រដេញពិន្ទុគ្នា ដល់លទ្ធផល ៤-៤ ម្តងទៀត នៅក្នុងសិតទី៣ដដែល។

ណាដាល់ នៅតែបន្តធ្វើបានល្អ និងមានប្រៀបខ្លាំង បន្ទាប់ពីគាត់នាំមុខម្តងទៀត ដោយលទ្ធផល ៥-៤ និងយកឈ្នះ​ចុង​ក្រោយ ៦-៤ តែម្តងនៅក្នុងសិតទី៣នោះ។

បន្ទាប់ពីដឹងខ្លួនថា ចាញ់គេ២សិតហើយ កីឡាករស៊ែប៊ី ឌីចូកូវីក ហាក់ដូចចង់វាយបកយកជ័យជំនះត្រឡប់​មកវិញ​ នៅ​ក្នុងសិតទី៤។ ប៉ុន្តែការវាយបករបស់គាត់ទាំងក្តីបារម្មណ៏នោះ ពិតជាគ្មានប្រសិទ្ធភាពនោះទេ ផ្ទុយទៅវិញកាន់តែធ្វើ​ឲ្យ​ណាដាល់ ងាយស្រូលក្នុងការយកឈ្នះ។ ហើយទីបំផុត ណាដាល់បានយកឈ្នះក្នុងសិតទិ៤ទៀត ដោយលទ្ធផល៥-១៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៩ ខែកញ្ញា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ