ប្រជាជនខ្មែរពី២៨ ទៅ២៩នាក់ បានស្លាប់បាត់បង់ជីវិតក្នុងមួយថ្ងៃៗ ដោយសារតែការប្រើប្រាស់ថ្នាំជក់។ ហើយបើគិតក្នុង​មួយឆ្នំាៗប្រជានកម្ពុជា ប្រមាណជាង ១ ម៉ឺន នាក់បានស្លាប់ ដោយសារតែថ្នាមជក់នេះដូចគ្នា។ នេះយោងទៅតាម​របាយការណ៍ របស់អង្គការសុខភាពពិភពលោក ដែលបង្ហាញដោយលោកវេជ្ជបណ្ឌិយ យ៉ិល ដារ៉ាវុធ មន្រ្តីជាន់ខ្ពស់អង្គការ​សុខភាពពិភពលោក ប្រចាំនៅក្នុងប្រទេសកម្ពុជា នៅក្នុងសិក្ខាសាលាស្តីពន្ធផលិតផលថ្នាំជក់ នៅសណ្ឋគារសាន់វ៉េ រាជធានីភ្នំពេញ នាថ្ងៃទី ០៣ ខែ កញ្ញានេះ។

លោក ហ៊ុន សែន នៅពេលលោកនៅជកបារីនៅឡើយ។ (រូបថត ឯកសារមនោរម្យព័ងអាំងហ្វូ)

កន្លងមកនៅក្នុងប្រទេសកម្ពុជា គេតែតែបកស្រាយថា គ្រោះថ្នាកចរាចរណ៍គឺជាគ្រោះថ្នាក់លំដាប់លេខមួយ​ នៅក្នុង​ប្រទេសដែលបានសម្លាប់ប្រជាជនខ្មែរក្នុងមួយថ្ងៃៗជាមធ្យមពី៦ ទៅ៧នាក់។ ចំនួនគ្រោះថ្នាក់នេះ បានធ្វើឲ្យមានការ​ព្រួយបារម្ភយ៉ាងខ្លាំងសម្រាប់រដ្ឋាភិបាល ក៏ដូចជាប្រជាជនទូទៅ។ ក៏ប៉ុន្តែគ្រោះថ្នាក់នៃការប្រើប្រាស់ថ្នាំជក់វិញ ក៏ជាបញ្ហា​ចម្បង និងជាគ្រោះមហន្តរាយ ដ៏គួរឲ្យរន្ធត់ផងដែរ សម្រាប់សង្គមជាតិទាំងមូល។

បើផ្អែកទៅលើរបាយការណ៍របស់អង្គការ សុខភាពពិភពលោកបានបង្ហាញថា អត្រាអ្នកប្រើប្រាស់ថ្នាំជក់នៅក្នុង​ប្រទេស​កម្ពុជាមានចំនួនជាង ២០ ភាគរយនៃប្រជាជនទាំងមូល ដែលស្មើនឹងប្រមាណជាជិត ២ លានាក់។ អ្នកប្រើប្រាស់ទំាំងនោះ ភាគច្រើនគឺជាបុរស ដែលរួមមានទាំងយុវជននិងក្មេងៗផងដែរ។ នៅក្នុងនោះអ្នកប្រើប្រាស់ជាស្រ្តីមានប្រមាណជាជាង ៣,៥ ភាគរយតែប៉ុណ្ណោះ។ របាយការណ៍ដដែរបានបង្ហាញថា អត្រាអ្នកស្លាប់ដោយសារការប្រើប្រាស់ថ្នាំជក់ នៅក្នុង​ប្រទេសកម្ពុជាក្នុងមួយឆ្នាំៗជាង ១ម៉ឺននាក់ ដែលគិតជាមធ្យម ក្នុងមួយថ្ងៃមានប្រជាជនខ្មែរយ៉ាងហោចណាស់ ពី២៨ ទៅ​២៩នាក់ បានស្លាប់បាត់បង់ជីវិត ដោយសារតែការប្រើប្រាស់ថ្នាំជក់នេះ។

ប្រទេសកម្ពុជាជាប្រទេសដែលគេដឹងថា ជាប្រទេសក្រីក្រមួយនៅក្នុងចំណោមប្រទេសក្រីក្រជាងគេនៅលើពិភពលោក។ ធនធានមនុស្សនៅក្នុងប្រទេសនេះ ក៏នៅមានកំរិត ដែលធ្វើឲ្យ ការអភិវឌ្ឍប្រទេសនៅមានភាពយឺតយ៉ាវ។ មិនតែប៉ុណ្ណោះ បញ្ហាសុខភាពរបស់ប្រជាជន គឺជាបញ្ហាប្រឈមមួយសម្រាប់រដ្ឋាភិបាលបច្ចុប្បន្ន ដែលត្រូវតែយកចិត្តទុកដាក់ក្នុងការ​ដោះស្រាយ ។

លោក វេជ្ជបណ្ឌិត យ៉ិល ដារ៉ាវុធ មន្រ្តីជាន់ខ្ពស់អង្គការសុខភាពពិភពលោកប្រចាំនៅប្រទេសកម្ពុជា បាននិយាយថា ក្នុង​មួយឆ្នាំៗរដ្ឋាភិបាលកម្ពុជា ត្រូវខាតបង់ទឹកប្រាក់អស់ជាង ១០០ លានដុល្លារសហរដ្ឋអាមេរិក ដោយសារគ្រោះថ្នាក់​នៃការ​ប្រើប្រាស់ថ្នាំជក់។ មិនតែប៉ុណ្ណោះ ធនធានមនុស្សសំខាន់ៗជាច្រើនរបស់ប្រទេស ត្រូវបាត់បង់ផងដែរ។ មន្រ្តីអង្គការ​ពិភពលោករួបនេះបានបន្តថា ដើម្បីកាត់បន្ថយនូវអត្រាអ្នកជក់បារី ក្នុងប្រទេសកម្ពុជាឲ្យមានប្រសិទ្ធភាពនោះ យុទ្ធសាស្រ្ត​ដែលសំខាន់បំផុត គឺរដ្ឋាភិបាលកម្ពុជាត្រូវតែ«តម្លើង»ពន្ធលើផលិតផលថ្នាំជក់ឲ្យបានខ្ពស់ ដើម្បីឲ្យអ្នកប្រើប្រាស់​គាត់​ពិបាកទិញយកមកប្រើប្រាស់។

លោកវេជ្ជបណ្ឌិត ម៉ម គង់ ប្រធានអង្គការចលនាដើម្បីសុខភាពកម្ពុជា បានលើកឡើងថា នាពេលកន្លងមក ក្រុមហ៊ុន​ថ្នាំ​ជក់​នៅក្នុងប្រទេសកម្ពុជាជាច្រើន បានប្រើយុទ្ធសាស្រ្តតម្លៃ ដោយការលក់ផលិតផលថ្នាំជក់ក្នុងតម្លៃថោកបំផុត ដែលធ្វើ​ឲ្យ​ប្រជាជនក្រីក្រ មានលទ្ធភាពអាចទិញប្រើប្រាស់បាន ជាហេតុធ្វើឲ្យមនុស្សពេញវ័យ នៅក្នុងប្រទេសកម្ពុជាភាគច្រើន ធ្លាក់​ក្នុងអន្ទាក់ទីផ្សាររបស់ក្រុមហ៊ុនថ្នាំជក់ ក្លាយជាអ្នកប្រើប្រាស់ផលិតផលថ្នាំជក់។ លោក ម៉ម គង់ បញ្ជាក់ថា នៅក្នុង​ប្រទេស​កម្ពុជា មានប្រជាពលរដ្ឋដែលរកចំណូលបានតិចជាងឬស្មើ ២ ដុល្លារក្នុងមួយថ្ងៃ គឺ៦៩ ភាគរយនៃប្រជាពលរដ្ឋ​ទូទំាង​ប្រទេស បានចំណាយប្រាក់ជាង ៤១ លានដុល្លារសហរដ្ឋអាមេរិកក្នុងមួយឆ្នាំ លើការទិញបារី ស្របពេលដែលអ្នក​មាន​ចំណូលច្រើនជាង ២ ដុល្លារ ក្នុងមួយថ្ងៃចំណាយអស់តែជាង ២០ លានដុល្លារប៉ុណ្ណោះ លើការទិញបារីក្នុង​រយៈពេល​មួយ​ឆ្នាំដូចគ្នា។

លោកប្រធានអង្គការរូបនេះ បានបន្តថា ជាវិធានការដើម្បីកាត់បន្ថយអត្រាអ្នកជក់បារីនៅក្នុង ប្រទេសកម្ពុជា រដ្ឋាភិបាល​ត្រូវតែធ្វើការតម្លើងទៅលើពន្ធលើផលិតផលថ្នាំជក់ឲ្យបានខ្ពស់ និង ធ្វើការផ្សព្វផ្សាយពីគ្រោះថ្នាក់នៃការជក់បារី តាមរយៈ​ការដាក់រូបភាពរន្ធត់នៅលើកញ្ចប់បារីតែ ម្តង។

សូមបញ្ជាក់ថា នៅក្នុងបណ្តាលប្រទេសនៅតំបន់អាស៊ានទាំងអស់ មានតែប្រទេសកម្ពុជា និង ប្រទេសឡាវទេ ដែល​រដ្ឋាភិបាលយកពន្ធ លើផលិតផលថ្នាំជក់តិចជាងគេបំផុត គឺកម្ពុជាយកពន្ធពីផលិតផលថ្នាំជក់តែជាង ២០ភាគរយ រីឯ​ប្រទេស​ឡាវយកពន្ធ ជាង១៩ ភាគរយប៉ុណ្ណោះ។ ប្រទេសនៅតំបន់អាស៊ាន ដែលយកពន្ធច្រើនជាងគេពី​ផលិតផល​ថ្នាំ​ជក់នេះ មានប្រទេសថៃជាង ៧០ ភាគរយ ប្រទេសសិង្ហបូរីជាង៦៩ ភាគរយ ប្រទេសព្រុយណេជាង ៦៧ ភាគរយ។

ឆ្លើយតបទៅនឹងការអំពាវនាវរបស់អង្គការសង្គមស៊ីវិល ដែលចង់ឲ្យដ្ឋាភិបាលយកពន្ធច្រើនលើផលិតផលថ្នាំជក់នេះ លោក ជោ សែ តំណាងអគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុរបស់រដ្ឋាភិបាលកម្ពុជា បានថ្លែងថា ការ​យកពន្ធពីផលិតផលថ្នាំជក់ រដ្ឋាភិបាល កម្ពុជាមិនអាចធ្វើឡើង ដូចបណ្តាប្រទេសជឿនលឿនោនោះទេ។ លោកថា ការ​តម្លើងពន្ធត្រូវធ្វើឡើងតាមមួយដំណាក់ៗ ពីព្រោះថា មុនសម្រេចតម្លើងពន្ធរដ្ឋាភិបាលត្រូវពិនិតទៅលើអ្នកប្រើប្រាស់ និង​អ្នកផលិត។ ដូច្នេះប្រសិនបើរដ្ឋាភិបាលតម្លើងខ្ពស់ពេក អ្នកវិនយោគនឹងជួបការលំបាកឈានទៅរកការផ្អាកដំណើរការ ដែលអាចធ្វើឲ្យបះពាល់ដល់សេដ្ឋកិច្ចជាតិ។

បើតាមការស្រាវជ្រាវមួយពីក្រសួងផែនការ​នៃប្រទេសកម្ពុជា បានបង្ហាញថា ប្រជាពលរដ្ឋខ្មែរ ប្រមាណជាង ៨១ភាគរយ​បានបង្ហាញការគាំទ្រឲ្យរដ្ឋាភិបាលកម្ពុជាធ្វើការតម្លើងពន្ធទៅលើ ផលិតផលថ្នាំជក់។ ដោយការម្លើងពន្ធនោះ ធ្វើឡើង​ពី៥០ ភាគរយឡើងទៅ។

គួរកត់សម្គាល់ថា ដើម្បីទប់ស្កាត់នឹងការរាលដាលនៃគ្រោះមហន្ដរាយ ដែលបណ្ដាលមកពីការប្រើប្រាស់ថ្នាំជក់ ប្រទេស​មួយចំនួន ១៧៧ ដោយរាប់បញ្ជូលទាំងប្រទេសកម្ពុជាផងដែរ បានផ្ដល់សច្ចាប័ន និងក្លាយជាសមាជិក​នៃ​អនុសញ្ញា ស្ដី​ពី​ការត្រួតពិនិត្យថ្នាំជក់ ដែលមាត្រាសំខាន់ៗនៃអនុសញ្ញានេះ មានចែងពីវិធានការ ដ៏មានប្រសិទ្ធិភាពក្នុងការកាត់បន្ថយ​ការ​ប្រើប្រាស់ថ្នាំជក់ ។ របាយការណ៍របស់អង្គការសុខភាពឆ្នាំ ២០១២ បានបង្ហាញថា នៅទូទាំងសកលលោកក្នុងមួយឆ្នាំៗ មានប្រជាជនប្រមាណជាង ៦ លាននាក់ បានស្លាប់បាត់បង់ជីវិតដោយសារការជក់បារី និងមនុស្សប្រមាណ ៦ សែននាក់​ផ្សេងទៀត បានស្លាប់បាត់បង់ជីវិតដោយសារតែស្រូបផ្សែងបារីពីអ្នកជក់៕

---------------------------------
ដោយ៖ ជា ធីរិទ្ធ
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ