ភ្នំពេញ៖ ភាពបរាជ័យលើបណ្តឹងតវ៉ានៅខេត្តក្រចេះ ដោយសេចក្តីសម្រេចបិទផ្លូវតវ៉ា របស់ក្រុមប្រឹក្សាធម្មនុញ្ញ មន្ត្រីជាន់​ខ្ពស់គណបក្សសង្គ្រោះជាតិ បានប្រកាសថានឹងមានបណ្តឹងប្តឹង មន្ត្រីជានខ្ពស់នៃ គ.ជ.ប ទៅកាន់តុលាការ ទាក់ទងនឹងភាព​មិនប្រក្រតី ដែលបានរកឃើញមុន និងក្រោយការបោះឆ្នោត។

តំណាងគណបក្សសង្គ្រោះជាតិ លោក គួយ ប៊ុនរឿន (រូបកណ្ដាល)។ (រូបថត MONOROOM.info/ O. Vary)

ការប្រកាសប្ដឹង មន្ត្រីជាន់ខ្ពស់នៃគណកម្មាធិការជាតិរៀបចំការបោះឆ្នោត ត្រូវបានថ្លែងបញ្ជាក់ បន្ទាប់ពីតំណាង​គណបក្ស​សង្គ្រោះជាតិ លោកគួយ ប៊ុនរឿន បានចាកចេញពីបន្ទប់សវនាការទាំងការ«ខកចិត្ត» លើសម្រេចរបស់ក្រុមប្រឹក្សាធម្មនុញ្ញ។ ដោយលោកបានថ្លែងប្រាប់អ្នកសារព័តមាន ថា«(វា)មិនមានអ្វីប្លែកនោះទេ ហើយក៏មិនមែនជាលើកទីមួយនោះដែរ ដែល​បណ្តឹងរបស់គណបក្សសង្គ្រោះជាតិ ដែលប្តឹងពីភាពមិនប្រក្រតី នៃការបោះឆ្នោត (...) ក្រុមប្រឹក្សាធម្មនុញ្ញតែងតែ​បដិសេធ​ នូវបណ្តឹងរបស់គណបក្សសង្គ្រោះជាតិជានិច្ច»។

«គ្មានចេតនាប្ដឹងអ្នកតូចតាច»

ការប្រកាសដាក់ពាក្យបណ្តឹង ប្តឹង គ.ជ.ប ជាផ្លូវការទៅតុលាការនោះ តំណាងគណបក្សសង្គ្រោះជាតិ លោកគួយ ប៊ុនរឿន បានបញ្ជាក់ថា លោកមិនមានចេតនាណាមួយ ទាមទារឲ្យមានការផ្តន្ទាទោសមន្ត្រីថ្នាក់ក្រោមនៃ គ.ជ.ប នោះទេ តែអ្វីដែល​ចង់បាន ត្រូវតែស្វែងរកអ្នកបញ្ជាក្នុងរឿងនេះ មកធ្វើការផ្តន្ទាទោស។ លោកបានសង្កត់ធ្ងន់ថា អ្វីដែលមន្រ្តីថ្នាក់ក្រោម​អនុវត្ត តែងតែទទួលបញ្ជាពីថ្នាក់លើនោះ គឺ គ.ជ.ប។

លោកគួយ ប៊ុនរឿន បានថ្លែងដោយមិនសប្បាយចិត្តថា ការសម្រេចរបស់ក្រុមប្រឹក្សាធម្មនុញ្ញ បែរជាបង្គាប់ឲ្យដាក់​ទោស​ទណ្ឌ ទៅលើមន្ត្រីទទួលខុសត្រូវរៀបចំការបោះឆ្នោត «តូចតាច» នៅតាមការិយាល័យមួយចំនួនក្នុងខេត្តក្រចេះទៅវិញ ដោយចោទប្រកាន់ថាមន្រ្តីទាំងនោះ ថាបានប្រព្រឹត្តខុស ក្នុងការបំពេញការងាររបស់ខ្លួន។ ចំណែកមន្រ្តីជាន់ខ្ពស់របស់ គ.ជ.ប ហាក់ដូចជាត្រូវបានរួចខ្លួន ដោយមិនមានការទទួលទោសអ្វីទាល់តែសោះ។ «ក្នុងនាមជាស្ថាប័ន ដែល​ធានាឲ្យ​មាន​ការរៀបចំការបោះឆ្នោតមួយ ត្រឹមត្រូវ និងយុត្តិធម៌តាមច្បាប់ នោះក៏ត្រូវតែមានទោសដូចគ្នា នឹងមន្រ្តីថ្នាក់ក្រោមដែរ។ (...) ទីបំផុតមន្ត្រីខាងលើរួចខ្លួន មន្រ្តីថ្នាក់ក្រោម តូចតាចបែរជាមានទោស។»

«...ការទទួលខុសត្រូវ និងបទបន្លំឯកសារ ...»

«យើងនឹងធ្វើការពិចារណា ព្រោះសេចក្តីសម្រេចរបស់ក្រុមប្រឹក្សាធម្មនុញ្ញបិទផ្លូវតវ៉ា ឯប្រព័ន្ធបោះឆ្នោត ក៏ត្រូវបានបញ្ចប់។ (...) យើងគិតគូរទៅតាមក្រមព្រហ្មទណ្ឌវិញ ត្រូវប្តឹងទៅតុលាការតែម្តង លើមន្ត្រីណាដែលពាក់ព័ន្ធ នឹងភាពមិនប្រក្រតី នៃ​ការរៀបចំនៃការបោះឆ្នោត។ (...) យើងប្តឹងពីបទព្រហ្មទណ្ឌ ទាក់ទងការទទួលខុសត្រូវមួយ និងបទបន្លំឯកសារ និងបទ​ផ្សេងៗទៀត ដែលទាក់ទងទៅនឹងយន្តការនៃការបោះឆ្នោត ទៅលើអ្នកទទួលខុសត្រូវដែលជាសមាជិក គ.ជ.ប តែម្តង។» នេះជា​ការប្រកាសរបស់លោក គួយ ប៊ុនរឿន។

សេចក្តីសម្រេចរបស់លោក ឯក សំអុល ប្រធានក្រុមប្រឹក្សាធម្មនុញ្ញ បានច្រានចោលពាក្យបណ្តឹង លោកកែវ ភារម្យ តំណាង​គណបក្សសង្គ្រោះជាតិ និងតម្កល់សេចក្តីសម្រេចរបស់គ.ជ.ប។ ជាមួយគ្នានេះប្រធានក្រុមប្រឹក្សាធម្មនុញ្ញ បានបង្គាប់​បញ្ជា​ទៅ គ.ជ.ប ឲ្យចាត់វិធានការដាក់ទណ្ឌកម្មលើ មន្ត្រីការិយាល័យបោះឆ្នោត និងរាប់សន្លឹក ឆ្នោតទាំង​ប្រាំបី​ការិយាល័យ នៅ​ឃុំ​ស្វាយជ្រះដោយចោទប្រកាន់ថា ជាអ្នកដែលប្រព្រឹត្តខុស។

ចំណែកលោក ម៉ៅ សុភារិទ្ធ តំណាង គ.ជ.ប មិនបានបញ្ជាក់ពីបញ្ហាខាងលើនោះទេ ដោយគ្រាន់តែលើកឡើងថា លោក​រង​ចាំ​អនុវត្តន៍ការបង្គាប់បញ្ជា តាមសេចក្តីសម្រេចរបស់ក្រុមប្រឹក្សាធម្មនុញ្ញ។ លោកបានបន្តថា «ក្រោយពេលទទួលបាន សេចក្តី​សម្រេចពីក្រុមប្រឹក្សាធម្មនុញ្ញ គ.ជ.ប នឹងធ្វើការប្រជុំដើម្បីអនុវត្ត ចំពោះការបង្គាប់បញ្ជា តើនិងដាក់វិន័យទៅ​លើមន្ត្រី​ទាំង​នោះដោយរបៀបណា?»

នៅល្ងាចថ្ងៃសៅរទី៣១ខែសីហានេះ ទស្សនាវដ្ដីមនោរម្យព័ងអាំងហ្វូ មិនទាន់ទទួលបានប្រតិកម្មពី មន្ត្រីជាន់ខ្ពស់ គ.ជ.ប នៅ​ឡើយទេ។

សូមរម្លឹកថា ការគម្រាមប្តឹងមន្រ្តី គ.ជ.ប ទៅតុលាការនោះ លោក កឹម សុខា អនុប្រធានគណបក្សសង្គ្រោះជាតិកាល​ពីថ្ងៃ​ទី២៦ ខែសីហានេះ នៅទីលានប្រជាធិបតេយ្យ ក៏ធ្លាប់បានប្រកាសទៅកាន់អ្នកគាំទ្ររបស់ខ្លួនដែរថា «គណបក្ស ​សង្គ្រោះ​ជាតិ និងប្តឹងពីមន្រ្តីនៃគ.ជ.ប ទៅតុលាការពាក់ពន្ធ័នឹងភាពមិនប្រក្រតីនៃការបោះឆ្នោតនេះ បើសិនជាគ្មានការដោះស្រាយ ដោយយុត្តិធម៌ណាមួយ ជូនដល់ម្ចាស់ឆ្នោតនោះទេ»៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី៣១ សីហា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ