បន្ទាប់ពីការរកឃើញភាពមិនប្រក្រតី យ៉ាងពិតប្រាកដ នៅក្រោយការបើកកញ្ចាប់សុវត្ថិភាព «ក» ក្នុងចំនួនតិចមួយ ក្នុង​ចំណោមកញ្ចប់សុវត្ថិភាព «ក»ជាច្រើនទៀត ដែលមិនទាន់បានបើកនោះ គណបក្សសង្រ្គោះជាតិ បានបន្តដាក់​សម្ភាធ​កាន់តែខ្លាំងថែមទៀត លើគណបក្សប្រជាជនកម្ពុជា ឲ្យមានការបង្កើតគណៈកម្មការចម្រុះ ដើម្បីស៊ើបអង្កេតភាព​មិន​ប្រក្រតី ក្នុងកំឡុងពេលបោះឆ្នោត។

លោក សម រង្ស៊ី (ខាងឆ្វេង) និងលោក កឹម សុខា នៅក្នុងសន្និសិទកាសែតរបស់គណបក្សសង្គ្រោះជាតិថ្ងៃទី២៦ខែសីហា។ (រូបថត MONOROOM.info/ U. Bory)

លោក សម រង្ស៊ី ប្រធានគណបក្សសង្រ្គោះជាតិ បានថ្លែងទៅកាន់អ្នកសារព័ត៌មាន ក្នុងកម្មវិធីសន្និសិទសារព័ត៌មាន ស្ថិត​នៅទីស្នាក់ការកណ្តាល របស់គណបក្សសង្រ្គោះជាតិនៅថ្ងៃទី២៦ ខែសីហា ឆ្នាំ២០១៣នេះថា៖ «យើងនៅតែទាមទារ ឲ្យ​បង្កើតគណៈកម្មការឯករាជ្យមួយ ដើម្បីស្រាវជ្រាវ ស៊ើបអង្កេតពីភាពមិនប្រក្រតី»។

ការលើកឡើងដូចច្នេះ ក៏ព្រោះតែមេដឹកនាំគណបក្សប្រឆាំងរូបនេះ បានដាក់ការសង្ស័យថា អាចមានការឃុបឃិតគ្នា​ជា​ប្រព័ន្ធ ក្នុងការលួចបន្លំសន្លឹកឆ្នោត រវាងគណៈកម្មាធិការជាតិរៀបចំការបោះឆ្នោត គ.ជ.ប និងគណបក្សប្រជាជនកម្ពុជា។

លោក សម រង្ស៊ី បានអះអាងថា គណបក្សសង្គ្រោះជាតិមានយុទ្ធវិធី៣យ៉ាង ក្នុងការទម្លុះម្លាយភាពទាល់ច្រកនយោបាយ ក្រោយការបោះឆ្នោត ទី១បន្តការដាក់ពាក្យបណ្តឹងតវ៉ាតាមនីតិវិធីច្បាប់ ទី២បន្តទាមទារឲ្យមានការ​បង្កើតគណៈកម្មការ​ចម្រុះ និងទី៣ការធ្វើមហាបាតុកម្មដោយអហិង្សា។

សូមរម្លឹកថារហូតមកដល់ពេលនេះ ការបង្កើតគណៈកម្មការចម្រុះដែលមានភាពឯករាជ្យ ដើម្បីស៊ើបអង្កេតពី​ភាពមិន​ប្រក្រតី ក្នុងកំឡុងពេលបោះឆ្នោត នៅតែមិនអាចសម្រេចទៅបាន បើទោះជាមានការជួបចរចារគ្នា ៣ដងរួចមកហើយ វាងមន្រ្តីជាន់ខ្ពស់របស់គណបក្សប្រជាជនកម្ពុជា និងគណៈបក្សសង្រ្គោះជាតិ។

លោក ជាម យៀប មន្រ្តីជាន់ខ្ពស់របស់គណបក្សប្រជាជនកម្ពុជា បានថ្លែងប្រាប់ទស្សនាវដ្តីមនោរម្យព័ងអាំងហ្វូ តាម​ទូរស័ព្ទក្នុងពេលកន្លងមកថា៖ «ការបង្កើតគណៈកម្មការចម្រុះ គឺហួសពេលហើយ ដោយសារតែ គ.ជ.ប បានប្រកាសថា ខ្លួនបានដោះស្រាយបណ្តឹងរួចរាល់ហើយ»។ មន្ត្រីជាន់ខ្ពស់គណបក្សប្រជាជនកម្ពុជារូបនេះ បន្ថែមថា ចំពោះបណ្តឹង​ដែល​ប្តឹងដោយគណបក្សសង្រ្គោះជាតិ ហើយនៅសេសសល់ ដោយសារតែមិនអាចដោះស្រាយ រួចត្រឹម គ.ជ.ប នឹងបន្តការ​ដោះស្រាយដោយក្រុមប្រឹក្សាធម្មនុញ។

លោក ទេព នីថា អគ្គលេខាធិការ គ.ជ.ប កន្លងមកបានបដិសេធ ចំពោះការបង្កើតគណៈកម្មការចម្រុះ ដែលស្មើរឲ្យបង្កើត​ដោយគណៈបក្សសង្រ្គោះជាតិ ដោយលើកហេតុផលថា វាហួសពីសមត្ថកិច្ចរបស់ គ.ជ.ប។

លោក កឹម សុខា អនុប្រធានគណបក្សសង្រ្គោះជាតិ បានថ្លែងទៅកាន់អ្នកសារព័ត៌មាននៅថ្ងៃទី២៦ ខែសីហា ឆ្នាំ២០១៣​នេះដែរថា គណបសង្រ្គោះជាតិអាចដាក់ពាក្យបណ្តឹង ប្តឹងមន្រ្តី គ.ជ.ប ទៅកាន់តុលាការប្រសិនបើ គ.ជ.ប មិនបង្កើតឲ្យមានការដោះស្រាយប្រកបដោយតម្លាភាព។

អនុប្រធានគណបក្សសង្រ្គោះជាតិរូបនេះ បានធ្វើការព្រមានថា អាចនឹងមានមហបាតុកម្មអហិង្សា ដែលមានការ​ងើប​ក្រោកឈរ តវ៉ាពីសំណាក់ក្រុមប្រជាជន និងប្រជាពលរដ្ឋប្រសិនបើ គ.ជ.ប និងគណបក្សប្រជាជន នៅតែមានៈប្រកាស​លទ្ធផលផ្លូវការ មុនការស៊ើបអង្កេតរបស់គណៈកម្មការឯករាជ្យ។

ប្រធានគណៈបក្សង្រ្គោះជាតិលោក សម រង្ស៊ី បានបង្ហាញគោលជំហរថា គណៈបក្សសង្រ្គោះជាតិ នឹងប្រកាសទទួល​ស្គាល់លទ្ធផល ដែលប្រកាសឲ្យដឹងដោយគណៈកម្មការចម្រុះ ដែលថាគណបក្សប្រជាជនកម្ពុជាជាអ្នកឈ្នះ។ ទន្ទឹម​នឹងនេះ លោកបានបន្ថែមថាគណបក្សប្រជាជនកម្ពុជា ក៏ត្រូវតែប្រកាសគាំទ្រជ័យជម្នះ របស់គណបក្សសង្រ្គោះផងដែរ ប្រសិនបើគណៈកម្មការចម្រុះ រកឃើញថាគណបក្សសង្រ្គោះជាតិជាអ្នកឈ្នះ៕

សូមទស្សនាវីដេអូ នៃសន្និសិទកាសែតនេះទាំងស្រុងដូចតទៅ៖

--------------------------------------------------------
ដោយៈ អ៊ុំ បូរី - ភ្នំពេញថ្ងៃទី២៦ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ