ក្រុមបាល់ទាត់របស់ប្រទេសអ៊ុយក្រែន ម៉េតាលីស ខាគិវ (Metalist Kharkiv) ត្រូវបានសហព័ន្ធបាល់ទាត់អ៊ឺរ៉ុប ដកសិទ្ធ​ក្នុងការប្រកួតក្របខ័ណ្ឌឆែមពានលីក (Champions League) ប្រចាំរដូវកាលនេះ បន្ទាប់ពីរកឃើញថា ក្រុមនេះបាន​រៀបចំ​លទ្ធផលទុកមុន (ប្រកួតបន្លំ) ពិតប្រាកដមែន កាលពីឆ្នាំ២០០៨។ ហើយយូហ្វា (UEFA) បានប្រកាសកាលពីថ្ងៃពុធថា ដំណែងនោះនឹងត្រូវជំនួស ដោយក្រុមភីអេអូឃេ (PAOK) របស់ប្រទេសក្រិកវិញ។

អ្នកគាំទ្រក្រុមបាល់ទាត់ភីអេអូឃេ។ (រូបថត zdfsport.de)

ភីអេអូឃេ ដែលប្រកួតចាញ់ក្រុមម៉េតាលីស ទាំង២ជើងនៅវគ្គជម្រុះជុំទី៣ ដោយលទ្ធផល ៣-១ នឹងត្រូវឡើងទៅជួបក្រុម ស្កាល់គេ០៤ (Schalke 04) របស់អាឡឺម៉ង់វិញ ក្នុងវគ្គជម្រុះចុងក្រោយ នៅថ្ងៃទី២១ ខែសីហា និងថ្ងៃទី២៧ ខែសីហា ដើម្បីកាត់ក្តីយកកៅអីទៅវគ្គចែកពូលជាបន្ត។

ក្នុងជំនួបនេះ មានន័យថា គ្រូបង្វឹករបស់ក្រុមភីអេអូឃេ លោក ហ័ប ស្តេវ៉ិន (Huub Stevens) ដែលធ្លាប់ដឹកនាំក្រុម​ស្កាល់គេ០៤ ឲ្យឈ្នះពានរង្វាន់ យូហ្វាខាប់ (UEFA Cup) កាលពីឆ្នាំ១៩៩៧ នឹងជួបជាមួយក្រុមចាស់របស់គាត់ បន្ទាប់ពី​គាត់បានចាកចេញពីដំណែង កាលពីឆ្នាំមុន។

គ្រូបង្វឹកវ័យ៥៩ឆ្នាំរូបនេះ បាននិយាយថា៖ «វាពិតជាអស្ចារ្យខ្លាំងណាស់សម្រាប់ក្រុមភីអេអូឃេ ដែលមានឱកាស​ឡើង​ទៅ​ប្រកួតជម្រុះវគ្គចុងក្រោយនេះ។ ក្នុងជំនួបជាមួយក្រុមស្កាល់គេ០៤ សម្រាប់ខ្ញុំនឹងជួបមិត្តភក្តិជាច្រើននៅទីនោះ។ តាម​ពិតវាពិតជាពិបាក ព្រោះក្រុមស្កាល់គេ ជាក្រុមខ្លាំង ប៉ុន្តែយើងនឹងប្រយុទ្ធដល់ទីបញ្ចប់ ដើម្បីឲ្យបានឡើងទៅវគ្គចែក​ពូល។»

អ្នកចាត់ការទូទៅរបស់ក្រុមស្កាល់គេ លោកហូស ហេល (Horst Heldt) ក៏បាននិយាយដែរថាក្រុម​របស់លោកក៏មិន​មាន​ភាពងាយស្រួលនោះដែរ ក្នុងជំនួបជាមួយនឹងក្រុមខ្លាំងរបស់ក្រិក ដែលបញ្ចប់ចំណាត់ថ្នាក់លេខ២ កាលពីរដូវកាលមុន (ភីអេអូឃេ) ខណៈដែលការប្រកួតជើងទី១ នឹងធ្វើឡើងនៅប្រទេសអាឡឺម៉ង់។

គួរបញ្ជាក់ថា សហព័ន្ធបាល់ទាត់អ៊ឺរ៉ុប ដែលហៅកាត់ថា «យូហ្វា» បានរកភស្តុតាងបញ្ជាក់ថា ក្រុមម៉េតាលីស ពិតជាបាន​រៀបចំលទ្ធផលទុកមុនមែន ក្នុងការប្រកួតក្របខ័ណ្ឌកំពូលរបស់ប្រទេសអ៊ុយក្រែន (Ukrainian league) ជាមួយនឹងក្រុម ខាផាធី ល្វីវ (Karpaty Lwiw) កាលពីឆ្នាំ ២០០៨។

ក្រុមម៉េតាលីស ដែលបានចូលលេងក្នុងក្របខ័ណ្ឌកំពូលរបស់អ៊ឺរ៉ុប ឆែមពានលីក ជាលើកដំបូងនៅក្នុង​ប្រវត្តិសាស្រ្ត​របស់ក្លិប នៅរដូវកាលនេះ បានជួបការខកចិត្តយ៉ាងខ្លាំង បន្ទាប់ពីតុលាការវិន័យរបស់យូហ្វា បានដាក់ពិន័យមិនឲ្យ​ចូលលេងក្នុងក្របខ័ណ្ឌអ៊ឺរ៉ុបរយះពេល ៥ឆ្នាំ។ ទោះបីជាយ៉ាងណា ម្ចាស់ក្លិបម៉េតាលីស លោកកូសយ៉ានធីន ភីវ៉ូវ៉ារ៉ូវ (Kostyantyn Pyvovarov) បានលើកឡើងថា គាត់មិនសុខចិត្តទេ ហើយគាត់នឹងប្តឹងបកយូហ្វាវិញ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៥ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ