គិតត្រឹមថ្ងៃទី៨ ខែសីហា ឆ្នាំ២០១៣ គេសង្កេតឃើញមានកងកម្លាំងយោធា នគរបាល កងរាជអាវុហត្ថជាតិ រួមទាំងអាវុធ​យុទ្ធភណ្ឌធន់ធ្ងន់ និងស្រាលបានធ្វើការចល័ត ចូលមករាជធានីភ្នំពេញ និងបណ្តាខេត្តធំៗ មួយចំនួន។

រថយន្ដដែលសាក្សីនិយាយថាបានដឹករនាំងបន្លាលួស ដែលដឹកចូលក្នុងរាជធានីភ្នំពេញ ថ្ងៃទី០៨ខែសីហានេះ។

សកម្មភាពចល័តកងទ័ពដ៏កម្រ បានកើតមានឡើង ក្រោយពីមេដឹកនាំគណបក្សប្រឆាំងលោក សម រង្ស៊ី បានព្រមាន​កាល​ពីពេលថ្មីៗនេះ ថានឹងដឹកនាំការធ្វើបាតុកម្មទ្រង់ទ្រាយធំ ប្រឆាំងទៅនឹងលទ្ធផលបោះឆ្នោត ដែលបង្ហាញថាគណបក្ស​កាន់​អំណាចជាអ្នកឈ្នះ តែលោកអះអាងថាមានការលួចបន្លំ និងភាពមិនប្រក្រដីជាច្រើន នៅក្នុងដំណើរការការបោះឆ្នោត។

ចំពោះបញ្ហានេះត្រូវបានលោក កែម ឡី អ្នកវិភាគឯករាជ្យ អំពីស្ថានការណ៍នយោបាយនៅកម្ពុជា វាយតម្លៃថា‍៖ «មេដឹកនាំ​ខ្មែរចូលចិត្តត្រៀមបង្ក្រាបបញ្ហា ជាជាងដោះស្រាយឬសគល់នៃបញ្ហា»។ អ្នកវិភាគរូបនេះបានពន្យល់ថា បញ្ហាដែល​ចោទ​ឡើង គឺភាពមិនប្រក្រតីនៃការបោះឆ្នោត ហើយភាគីទាំងពីរមិនចុះសម្រុងគ្នា ចំពោះការដាក់បញ្ចូល​សមាសភាព​អង្គការ​សហប្រជាតិ ទៅក្នុងគណៈកម្មការចម្រុះ ដើម្បីស៊ើបអង្កេតពីភាពមិនប្រក្រតី។

បន្ទាប់ពីភាពមិនចុះសម្រុងនេះ ប្រធានដឹកនាំគណបក្សសង្គ្រោះជាតិ លោក សម រង្ស៊ី បានបន្ថែមព្រឹត្តិការណ៍ថ្មីមួយទៀត នៅថ្ងៃទី៨ ខែសីហា ឆ្នាំ២០១៣នេះ ដោយបានផ្ញើរលិខិតមួយច្បាប់ទៅលោក បាន គីមូន អគ្គលេខាធិការអង្គការ​សហ​ប្រជាជាតិ ដើម្បីលើកឡើងអំពីភាពមិនប្រក្រតី អំពីដំណើរការបោះឆ្នោត និងទាមទារឲ្យអង្គការសហប្រជាជាតិ ចូល​អន្តរាគមន៍ស្វែងរកយុត្តិធម៌ និងជាការពង្រឹងលិទ្ធិប្រជាធិបតេយ្យនៅកម្ពុជា ដែលមេដឹកនាំគណបក្សប្រឆាំងរូបនេះ ចាត់​ទុកថានៅមានភាពផុយស្រួយនៅឡើយ។

ចំពោះដំណោះស្រាយភាពទាល់ច្រកនេះលោក កែម ឡី អត្ថាធិប្បាយថា ប្រសិនបើគណបក្សនយោបាយ និងអ្នកដឹកនាំ​មានឆន្ទះដោះស្រាយបញ្ហា វាមិនជាការលំបាកទេ ដូចនេះពួកគេគួរបន្តការចរចារជាមួយគ្នាឲ្យអស់លទ្ធភាព។ ព្រោះនៅ​មានយន្តការដោះស្រាយជាច្រើនទៀត រួមមាន តាមរយៈការសម្របសម្រួលពីព្រះមហាក្សត្រ ឬសង្គមស៊ិវិលជាដើម។ តែចំណុចសំខាន់ ដែលជាដំណោះស្រាយនោះ គឺត្រូវបង្កើតគណៈកម្មការចម្រុះ ដើម្បីស៊ើបអង្កេតរួមគ្នា។

ជាចំណុចសំខាន់ ដែលលោក ព្រាប កុល ប្រធានអង្គការតម្លាភាពកម្ពុជា មិនសូវមានសុទិដ្ឋិនិយម។ លោកធ្លាប់បាន​ពន្យល់ថា ប្រសិនបើគណបក្សប្រជាជនកម្ពុជា និង គ.ជ.ប ស្អាតស្អំ មិនមានជាប់ពាក់ព័ន្ធនឹងភាពមិនប្រក្រតី គួរតែ​«ឯកភាព»​ឲ្យបង្កើតគណៈកម្មការចម្រុះ ដែលមានការចូលរួមពីគ្រប់ភាគីដែលពាក់ព័ន្ធ ធ្វើការស៊ើបអង្កេតរួមគ្នា​ដើម្បី​ជម្រះមន្ទិលសង្ស័យ៕

--------------------------------------------------------
ដោយៈ អ៊ុំ បូរី - ភ្នំពេញថ្ងៃទី៨ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ