ក្រសួងការពារជាតិមិនទាន់ឆ្លើយតបចំពោះការអំពាវនាវរបស់សង្គមស៊ីវិល
ក្រសួងការពារជាតិកម្ពុជា រហូតមកដល់ពេលនេះ មិនទាន់មានការឆ្លើយជាផ្លូវការណ៍ណាមួយចំពោះការអំពាវនាវ និងការព្រួយបារម្ភរបស់ក្រុមអង្គការសង្គមស៊ីវិល អំពីគោលជំហ៊រយោធាកម្ពុជា ក្រោយការបោះឆ្នោត។
ទីបញ្ជាការដ្ឋាននៃកងយោធពលខេមរភូមិន្ទ នៅរាជធានីភ្នំពេញ។ (រូបថត panoramio.com)
កាលពីថ្ងៃទី២៤ខែកក្កដានេះ អង្គការសង្គមស៊ីវិលចំនួនប្រាំមួយ បានចេញនូវសេចក្តីថ្លែងការណ៍រួមមួយ ដោយអំពាវនាវដល់កងយុទ្ធពលខេមរភូមិន្ទ។ ឲ្យស្ថាប័នការពារជាតិមួយនេះ ចេញមុខអះអាងដល់ប្រជាពលរដ្ឋ ថានឹងគ្មានរដ្ឋប្រហារនោះទេ ទោះបីជាលទ្ធផលការបោះឆ្នោត បានជ័យជំនះទៅគណបក្សណាក៏ដោយ។
លោក ហង្ស ពុទ្ធា នាយកប្រតិបត្តិអង្គការនិកហ្វិច (NICFEC) ដែលបានចូលរួមក្នុងសេចក្តីថ្លែងការណ៍នោះរ បានបញ្ជាក់ថា៖ «រហូតមកដល់ពេលនេះក្រុមអង្គការសង្គមស៊ីវិល នៅមិនទាន់ឃើញមានការប្រតិកម្ម ឬការឆ្លើយបំភ្លឺពីភាគីក្រសួងការពារជាតិនៅឡើយទេ»។ លោកពន្យល់ថា មូលហេតុដែលនាំឲ្យមានការចេញសេចក្តីថ្លែងការណ៍នេះ ព្រោះក្រុមអង្គការសង្គមស៊ីវិលសង្កេតឃើញថា ប្រជាពលរដ្ឋមានការព្រួយបារម្ភអំពីដំណើរការណ៍បោះឆ្នោត។
កាលពីពេលកន្លងមកព្រះមហាក្សត្រកម្ពុជានរោត្តម សី ហមុនី បានមានព្រះបន្ទូលទៅកាន់ប្រជានុរាស្រ្តរបស់ព្រះអង្គ ដោយស្មើឲ្យពួកគេទៅបោះឆ្នោតតាមឆន្ទះ និងកុំមានការភ័យខ្លាច។
គួរកត់សម្ភាល់ថា ការចេញសេចក្តីថ្លែងការណ៍រួមនេះ ធ្វើឡើងក្រោយពីវិទ្យុក្នុងស្រុកឈ្មោះ ABC ១០៧.៥ បានផ្សាយថាពួកយោធាអាចនឹងធ្វើរដ្ឋប្រហារ ទម្លាក់រដ្ឋាភិបាលប្រសិនបើគណបក្សសង្រោះជាតិ ដែលជាគណបក្សប្រឆាំងឈ្នះឆ្នោត។
ប៉ុន្តែការផ្សាយរបស់វិទ្យុនេះ ត្រូវបានគណៈកម្មាធិការជាតិរៀបចំការបោះឆ្នោត គ.ជ.ប ធ្វើការព្រមានឲ្យបញ្ឍប់ ដោយ គ.ជ.ប ចាត់ទុកសកម្មភាពនេះ មានចរឹតញុះញង់ បំភិតបំភៃអ្នកបោះឆ្នោត ហើយក៏ជាបរិយាកាសបំពុលការបោះឆ្នោត។
ជាមួយគា្ននេះ លោក ហូ វ៉ាន់ ជាមន្ត្រីជាន់ខ្ពស់គណៈបក្សប្រឆាំង បានដាក់ពាកបណ្តឹងប្តឹងលោក សេង ប៊ុនវ៉េង ហៅអាចារ្យអេ ជាប្រធានស្ថានីយ៍វិទ្យុខាងលើ ទៅសាលាដំបូងរាជធានីភ្នំពេញពីបទញុះញង់ ឲ្យប្រព្រឹត្តបទឧក្រិដ្ឋ មកលើមេដឹកនាំ និងអ្នកគាំទ្រគណបក្សសង្រោះជាតិ កាលពីថ្ងៃទី២៣ ខែកក្កដា ឆ្នាំ២០១៣។
លោក នី ចរិយា ប្រធានផ្នែកស៊ើបបអង្កេត សមាគមអាដហុក (ADHOC) បានធ្វើការអត្ថាធិប្បាយថា អង្គការសង្គមស៊ីវិល ចង់ឲ្យពួកយោធាបង្ហាញគោលជំហ៊រថា ក្រោយការបោះឆ្នោតមិនមានហេតុការណ៍អ្វីកើតឡើង ដែលប៉ះពាល់ដល់សន្តិសុខជាតិយើង ដើម្បីឲ្យពលរដ្ឋមានជំនឿថាការបោះឆ្នោត អាចប្រព្រឹត្តទៅរលូន និងមានសន្តិភាពស្ថិរភាពក្រោយការប្រកាសលទ្ធផលបោះឆ្នោត៕
--------------------------------------------------------
ដោយៈ អ៊ុំ បូរី - ភ្នំពេញថ្ងៃទី២៦ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ