វិនាសកម្ម​គ្រោះថ្នាក់​រថភ្លើង​ខ្លាំង​ជាង​គេ​ទាំង​១១ ក្នុង​២៥​ឆ្នាំ​ចុង​ក្រោយ​នៅ​អ៊ឺរ៉ុប

Loading...
  • ដោយ: សេក មនោរកុមារ
  • កែប្រែចុងក្រោយ: August 04, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

គ្រោះថ្នាក់រថភ្លើងនៅភូមិ ស៊ាំងហ្សាក់ ឌឺ កុំប៉ូស្ទែល (Saint-Jacques de Compostelle) ប្រទេសអេស្ប៉ាញ ជាគ្រោះថ្នាក់​​មួយ ក្នុងចំណោមគ្រោះថ្នាក់ដ៏រង្គាល ក្នុងរយៈពេល២៥ឆ្នាំចុងក្រោយគេបង្អស់នេះ នៅអ៊ឺរ៉ុប។ យើងសូមត្រឡប់មក​ក្រោយវិញ ក្នុងរយៈពេលនេះ ដោយមានអមជាមួយនឹងរូបភាពផង ដើម្បីជម្រាបជូនពីគ្រោះថ្នាក់ ទាំង១១លើកកន្លងមក ដែលមានការខូចខាតច្រើនជាងគេ រាប់ចាប់តាំងពីឆ្នាំ១៩៨៨។

គ្រោះថ្នាក់ផ្លូវដែកនៅប្រទេសអេស្ប៉ាញ កាលពីរាត្រីថ្ងៃពុធទី២៤ខែកក្កដាកន្លងមកនេះ បានបន្ថែមតួលេខ ទៅឲ្យបញ្ជី​វិនាសកម្មដ៏សែនរង្គាល នៃគ្រោះថ្នាក់រថភ្លើង ក្នុងរយៈពេល២៥ឆ្នាំចុងក្រោយនៅទ្វីបអ៊ឺរ៉ុប។ តុល្យភាពដែលទទួលបាន ពីគ្រោះថ្នាក់ចុងក្រោយនេះ មកទល់នឹងបច្ចុប្បន្ន បានបង្កឲ្យមានភតក់ស្លុតជាទូទៅ ក្នុងចំណោមអ្នកដែល​ប្រើប្រាស់​រថភ្លើង ជាមធ្យោបាយធ្វើដំណើរ ព្រោះវាបានធ្វើឲ្យមនុស្សស្លាប់មិនតិចជាង ៨០នាក់ និងរបួសរាប់រនាក់ផ្សេងទៀត។

បើប្រៀបធៀបនឹងគ្រោះថ្នាក់រថភ្លើងដទៃទៀតនៅអ៊ឺរ៉ុប គ្រោះថ្នាកថ្ងៃទី២៤ខែកក្កដា ជាប់ចំណាត់ថ្នាក់លេខបី ក្នុង​ចំណោមគ្រោះថ្នាក់ដែលរងការខូចខាតច្រើនជាងគេ។ គ្រោះថ្នាក់រថភ្លើង ដែលមានមនុស្សស្លាប់ច្រើនជាងគេ រហូតដល់​ទៅ ១៥៥នាក់ បានកើតឡើងនៅប្រទេសអូទ្រីសក្នុងឆ្នាំ២០០១។ ចំណែកឯគ្រោះថ្នាក់ ដែលមានមនុស្សស្លាប់​បន្ទាប់​មក​ទៀត ក្នុងឆ្នាំ១៩៩៨ ក្នុងប្រទេសអាឡឺម៉ង់ រថភ្លើងមួយបានងាកចេញពីផ្លូវ ហើយមនុស្សចំនួន១០១នាក់ បានរលត់ជីវិត។

គួររំលឹកឡើងវិញផងដែរ ក្នុងឆ្នាំ១៩៤៤ (ថ្ងៃទី៣ខែ មិថុនា ឆ្នាំ១៩៩៤៤) រថភ្លើងបីខ្សែ បានជល់គ្នានៅក្នុងរូងក្រោមដី នៅ​ក្បែរភូមិ តូរ៉េ ដែល ប៊ីយ៉េសូ (Torre del Bierzo) ផ្នែកខាងជើងនៃប្រទេសអេស្ប៉ាញ ហើយតួលេខដែលបញ្ចេញឲ្យដឹង​ចុងក្រោយ មានមនុស្សស្លាប់យ៉ាងតិច ៣០០នាក់។ គ្រោះថ្នាក់នេះ បានចារទុកនៅក្នុងប្រវត្តិសាស្ត្រដ៏មហារង្គាល នៃ​គ្រោះថ្នាក់រថភ្លើងនៅអ៊ឺរ៉ុប។

សូមទស្សនារូបភាពនៃគ្រោះថ្នាក់ទាំង១១ ជាមួយនឹងអត្ថាធិប្បាយខ្លីៗ ដូចតទៅ៖

ថ្ងៃទី២៧ខែមិថុនាឆ្នាំ១៩៩៨៨៖ ក្នុងរូបភាព អ្នកជួយសង្គ្រោះបានលើកបំណែកជាច្រើន ពីទូរថភ្លើងខូចខាតទាំងនេះ បន្ទាប់​ពីរថភ្លើងដែលភ្ជាប់តំបន់ជាយក្រុងបារីស ចំនួនពីរខ្សែ បានបុកគ្នាកណ្ដាល ក្នុងស្ថានីយ ហ្គាឌឺលីយ៉ុង (Gare de Lyon) ទីក្រុងប៉ារីសប្រទេសបារាំង។ គ្រោះថ្នាក់នេះបង្កឲ្យមនុស្សស្លាប់ ៥៦នាក់ និង៥៥ផ្សេងទៀត រងរបួស ហើយ​មាន​មូលហេតុបណ្ដាលពីរថភ្លើងមួយ ចាប់ហ្វ្រាំងមិនស៊ី។ (រូបថត AFP)

ថ្ងៃទី០៣ខែមិថុនាឆ្នាំ១៩៩៨៖ រថភ្លើងល្បឿនលឿន អាទែស៊ីធី អិចស្ព្រេស (Intercity Express) មួយខ្សែ បានរត់​ទៅ​បុក​ស្ពានមួយ ហើយងាកចេញពីផ្លូវ នៅក្បែរទីក្រុង អេឆែដ ភាគកណ្ដាលនៃប្រទេសអាឡឺម៉ង់។ ជាមួយនឹងចំនួនជនរងគ្រោះ​ដល់ជីវិត ចំនួន១០១នាក់ គ្រោះថ្នាក់ជាមហន្តរាយខ្លាំងជាងគេ ក្នុងប្រវត្តិផ្លូវដែករបស់ប្រទេស។ (រូបថត INGO WAGNER / DPA / AFP)

ថ្ងៃទី០៥ ខែតុលាឆ្នាំ១៩៩៩៖ រថភ្លើងពីរខ្សែ ជល់គ្នា នៅក្បែរស្ថានីយ៍ចំណត ផាឌីនតុន (Paddington) នៃទីក្រុងឡុងដ៍ ហើយបានបង្កឲ្យមនុស្ស៣១នាក់ស្លាប់។ ក្រុមហ៊ុនគ្រប់គ្រងរថភ្លើង ត្រូវបានរកឃើញថាមានកំហុស ក្នុងកំហុស​ត្រួត​ពិនិត្យបច្ចេកទេស ហើយត្រូវបានតុលាការ ចាប់បង្ខំឲ្យបង់ប្រាក់ ៥,៩លានអ៊ឺរ៉ូ នៅឆ្នាំ២០០៧កន្លងទៅ។ (រូបថត AFP PHOTO/ADRIAN DENNIS)

ថ្ងៃទី ១១ខែវិច្ឆិការ ឆ្នាំ២០០០៖ នេះហើយជាគ្រោះថ្នាក់រថភ្លើង ដែលបានបង្កឲ្យមានជាអគ្គិភ័យ ឆាបឆេះនៅក្នុងផ្លូវរូង​ក្រោមដី នៅទីក្រុង កាប៉ង (Karpun) ប្រទេសអូទ្រីស។ ទ្វាទាំងឡាយនៃទូរថភ្លើង ត្រូវបានដាក់គន្លឹសជាប់ទាំងអស់ ហើយបានបង្ខាំងមនុស្ស១៥៥នាក់ ឲ្យឆេះខ្លួនស្លាប់នៅក្នុងនោះ។ មានមនុស្សតែ១២នាក់ប៉ុណ្ណោះ ដែលរួចរស់មាន​ជីវិត​ពីគ្រោះមហន្តរាយនេះ។ (រូបថត AFP)

ថ្ងៃទី៨ខែឧសភា ឆ្នាំ២០០៣៖ នៅស៊ីយ៉ូហ្វុក (Siofok) ប្រទេសហុងគ្រី រថភ្លើងមួយខ្សែបានបុក រថយន្ដក្រុងដឹក​អ្នក​ទេសចរណ៍អាឡឺម៉ង់មួយគ្រឿង បង្កឲ្យមានមនុស្ស៣៣នាក់ស្លាប់ និង៥០នាក់ផ្សេងទៀតរបួស។ រថយន្ដទេសចរណ៍​ដែលត្រូវបានបុកបាក់ជាពីរបំណែក ត្រូវបានរថភ្លើងអូសយកទៅជាមួយ នៅចម្ងាយច្រើនជាង ១៥០ម៉ែត្រ។ (រូបថត AFP)

ថ្ងៃទី៤ ខែមិថុនា ឆ្នាំ២០០៣៖ ព្រឹកទៀបភ្លឺ នៅភូមិមួយឈ្មោះ ឆិនឈីយ៉ា (Chinchilla) ដែលស្ថិតនៅមិន​ឆ្ងាយប៉ុន្មាន​ពី​ទីក្រុងអាលបាសេត (Albacet) ប្រទេសអេស្ប៉ាញ រថភ្លើងដឹកអ្នកដំណើរ មួយគ្រឿង មកពីរាជធានីម៉ាឌ្រីដ បានបុក​រថភ្លើងមួយទៀត ដែលដឹកទំនិញ បង្កឲ្យមនុស្សស្លាប់១៩នាក់។ (រូបថត AFP PHOTO/Christophe SIMON)

ថ្ងៃទី២៣ខែមករាឆ្នាំ២០០៦៖ រថភ្លើងមួយខ្សែបានងាកចេញពីផ្លូវ នៅក្បែរទីក្រុង ប៉ូដហ្គូរីកា (Podgorica) ប្រទេស​ម៉ុងតេនេហ្គ្រូ បង្កឲ្យមនុស្សស្លាប់៤៦នាក់ ក្នុងនោះ៥នាក់ជាកុមារ។ (រូបថត AFP PHOTO / SAVO PRELEVIC)

ថ្ងៃទី៣ខែកក្កដា ឆ្នាំ២០០៦៖ ខ្សែរថភ្លើងក្រោមដីមួយ នៃទីក្រុងវ៉ាឡង្ស៍ ប្រទេសអេស្ប៉ាញ បានងាកចេញពីផ្លូវ ហើយបាន​រួញខ្លួននៅក្នុងផ្លូវរូងក្រោមដី។ គ្រោះថ្នាក់នេះបង្កឲ្យមនុស្សស្លាប់ ៤១នាក់ និងមានការកាន់ទុក្ខ​ក្នុងប្រទេសទាំងមូល​ចំនួន​៣ថ្ងៃ។ (រូបថត sipa)

ថ្ងៃទី២២ ខែកញ្ញា ឆ្នាំ២០០៦៖រថភ្លើងល្បឿនលឿន ប្រើបច្ចេកវិទ្យាឆក់ជាប់ផ្លូវដែកមួយ នៅពេលធ្វើការសាកល្បងដំបូង បានជ្រុលទៅបុករថយន្ដដឹកអ្នកធ្វើការ នៅឡាថេន (Lathen)ផ្នែកពាយ័ព្យនៃប្រទេសអាឡឺម៉ង់។ គ្រោះថ្នាក់ដែលចេញ​ពី​​កំហុសជាយថាហេតុនេះ បានសម្លាក់មនុស្ស ២៣នាក់។ (រូបថត AFP PHOTO DDP/DAVID HECKER GERMANY OUT)

ថ្ងៃទី៣០ខែមិថុនា ឆ្នាំ២០០៩ នៅទីក្រុង វីយ៉ារ៉េជីយ៉ូ (Viareggio) ប្រទេសអ៊ីតាលី រថភ្លើងមួយខ្សែ​ដែលសុទ្ធតែជាស៊ីទែន​ផ្ទុកឧស្ម័នហ្គាស បានងាកចេញពីផ្លូវ ហើយបានផ្ទុះឡើង នៅមុនពាក់កណ្ដាលអាធ្រាត និងបានប៉ះពាល់យ៉ាងធ្ងន់ធ្ងរ​ទៅ​លើលំនៅដ្ឋាន នៃអ្នករស់នៅតំបន់នោះ។ គ្រោះថ្នាក់នេះ បានធ្វើឲ្យមនុស្សស្លាប់ ២២នាក់។ (រូបថត AFP PHOTO / DAMIEN MEYER)

ថ្ងៃទី២៤ខែកក្កដា ឆ្នាំ២០១៣៖ រថភ្លើងមួយខ្សែដែលកំពុងរត់ក្នុងល្បឿនលឿន បានងាកចេញពីផ្លូវនៅជិតភូមិ សាំងហ្សាក់ ឌឺកុំប៉ូស្ទែល (Saint-Jacques-de-Compostelle) ធ្វើឲ្យមនុស្សយ៉ាងហោចណាស់ ៨០នាក់ស្លាប់។ (រូបថត AFP)

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី០៤ ខែសីហា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...