ក្រុមហ៊ុនហ្គូហ្គល (Google) បានប្រកាសចេញជាផ្លូវការ នូវប្រព័ន្ធប្រតិបត្តិជំនាន់ថ្មីចុងក្រោយបង្អស់របស់ខ្លួន អេនដ្រយ ៤.៣ (Android 4.3) កាលពីថ្ងៃពុធម្សិលមិញ។ អេនដ្រយ ជំនាន់ថ្មីបំផុតនេះ បានធ្វើការកែប្រែបន្ថែមពីលើជំនាន់ចាស់ (អេនដ្រយ ៤.២) ជីលីបីន អូអេស (Jelly Bean OS) ពោលគឺវាអាចដំណើរការបានល្អជាងជំនាន់មុនៗ និងគាំទ្របន្ថែមនូវ​មុខងារអ្នកប្រើប្រាស់ច្រើននាក់ (multi-user)។

ផលិតផល អេនដ្រយ របស់ក្រុមហ៊ុនមហាយក្ស ហ្គូហ្គ័ល។ (រូបថត mashable.com)

ប្រព័ន្ធប្រតិបត្តិការណ៏ អេនដ្រយ ៤.៣ ជីលីបីន ក៏បានធ្វើកំណែប្រែ និងធ្វើការផ្លាស់ប្តូរកម្មវិធីមួយចំនួនទៅជាទ្រង់ទ្រាយថ្មី ដែលកម្មវិធីទាំងនោះមានដូចជា៖ ដ្រាយ (Drive), ផែនទី (Maps) និងហ្គ្រម (Chrome) ជាដើម។ ទម្រង់ការជូនដំណឹង (notification) ក៏បានផ្លាស់ប្តូរផងដែរ ពោលគឺ វាអនុញ្ញាតឲ្យអ្នកប្រើប្រាស់ អាចមើលពីប្រវត្តិការជូនដំណឹងបាន។

ចំពោះហ្គេម ហ្គូហ្គល បានចេញនូវកម្មវិធីថ្មីមួយ ឈ្មោះថា ហ្គូហ្គលផ្លេហ្គេម (Google Play Games) ដើម្បីផ្តល់ឲ្យ​អ្នក​ប្រើ​ប្រាស់ងាយស្រួល ក្នុងការទាញយកហ្គេមថ្មីៗបំផុត មកលេងកំសាន្តបាន។

រីឯមុខងារ អ្នកប្រើប្រាស់ច្រើននាក់ (multi-user) ធ្លាប់មាននៅលើជំនាន់ចាស់ អេនដ្រយ ៤.២ រួចហើយដែរ ប៉ុន្តែការ​ចេញ​នូវជំនាន់ថ្មីនេះ វាគ្រាន់តែបន្ថែមពីលើទៀត នូវមុខងារពិសេសមួយចំនួន ដែលជំនាន់ចាស់ពុំមាន។ មុខងារសំខាន់ៗ ក្នុង​ជំនាន់ថ្មីនេះ មានដូចជា៖ អនុញ្ញាតឲ្យអ្នកប្រើប្រាស់ អាចកំណត់នៅលើទម្រង់ (profile) ដំណើរការកម្មវិធីណា ដែលបាន​កំណត់ និងអាចកំណត់កំរិត (level) ក្នុងការលេងហ្គេម បានថែមទៀត។

អេនដ្រយ ៤.៣នេះ ក្នុងជំហ៊ានដំបូង អាចនឹងដំណើរការបានតែនៅលើទូរស័ព្ទដៃវ៉ៃឆ្លាត (Smart phone) ដូចជា៖ ស៊ាំស៊ុង​ហ្គាឡាក់ស៊ី ណិកស៊ឺស (Samsung Galaxy Nexus), ណឺកស៊ឺស ៤ (Nexus 4) និងពពួកថេប្លិត (Tablet)៖ ណិកស៊ឺស ៧ (Nexus 7) និង ណិកស៊ឺស ១០ (Nexus 10)តែប៉ុណ្ណោះ។

ប៉ុន្តែក្នុងពេលឆាប់ៗខាងមុខ ក្រុមហ៊ុនហ្គូហ្គល នឹងដាក់បញ្ចូលវាទៅក្នុង ហ្គូហ្គលផ្លេអេឌីសិន (Google Play Editions) ដើម្បីឲ្យទូរស័ព្ទដៃវ៉ៃឆ្លាតមួយចំនួនដូចជា៖ ស៊ាំស៊ុងកាឡាក់ស៊ី អេស៤ (Samsung Galaxy S4) និងអេចធីស៊ីវ័ន (HTC One) អាចទាញយកមកប្រើប្រាស់បានផងដែរ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៥ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ