នាងខេត មីលើតុន (Kate Middleton) ដែលជាមហេសីរបស់ព្រះអង្គម្ចាស់វីល្លីយ៉ាម (William) ចៅប្រុសនៃ​ព្រះមហាក្សត្រី​យ៉ានី អេលីហ្សាបេដ ទី២ (Elizabeth II) នៃចក្រភពអង់គ្លេស ទើបនឹងប្រសូតបានបុត្រាមួយអង្គ​នៅរសៀលម៉ោង៤និង​២៤នាទី ម៉ោងនៅរាជធានីឡុងដ៍ ថ្ងៃទី២២ខែកក្កដានេះ។

នាងខេត និងព្រះអង្គម្ចាស់វិល្លីយ៉ាម នៅក្នុងរទេះសេះ នៃពិធីចម្រើនព្រះជន្ម។ (រូបថត Kelly Lynch)

ដំណឹងនេះបានផ្សព្វផ្សាយភ្លាមៗ ដឹងពាសពេញពិភពលោក ដែលធ្វើឲ្យមានការអបអរសាទរយ៉ាងខ្លាំង ពីបណ្ដាជន​នានា​ក្នុងប្រទេសជាច្រើន ជាពិសេសប្រទេស ដែលធ្លាប់នៅក្រោមអាណានិគម នៃចក្រភពអង់គ្លេស និងបណ្ដាជនដែល​ស្រឡាញ់ចូលចិត្តគូស្វាមីភរិយាវ័យក្មេង វីល្លីយ៉ាម និងខេតនេះ។

សេចក្ដីប្រកាសព័ត៌មានជាផ្លូវការ បានធ្លាក់មកដល់នៅរាត្រីថ្ងៃដដែល ដោយបានបញ្ជាក់ថា ម្ដាយរបស់ទារក និងទារក មានសុខភាពល្អធម្មតា។

ទារកដ៏តូច ដែលមានសុខភាពល្អ បានក្លាយជារាជទាយាទទី៣ ដែលអាចនឹងទទួលស្នងរាជ្យសម្បត្តិនៅប្រទេសអង់គ្លេស បន្ទាប់ពីព្រះអង្គម្ចាស់ឆាល (Charles) ជាជីតា និងព្រះអង្គម្ចាស់វីល្លីយ៉ាម (William) ជាឪពុក។

ព្រះញាតិវង្សនៃរាជបល្ល័ង្គអង់គ្លេស បានថ្លែងថា មានសុភមង្គលណាស់ នឹងដំណឹងដ៏វិសេសវិសាលនេះ ជាពិសេស​នឹង​សមាជិកថ្មីម្នាក់ នៅក្នុងព្រះញាតិវង្សារបស់ពួកគេ។

នាង ខេត មីលើតុន បានចូលទៅកាន់មន្ទីរពេទ្យ សាំង ម៉ារី (St. Mary) កាលពីព្រឹកថ្ងៃច័ន្ទកន្លងមកនេះ ដើម្បីត្រៀម​ឆ្លង​ទន្លេ បន្ទាប់ពីម៉ោងការងាររដ្ឋបានចាប់ផ្ដើមបានបន្តិច។ តាំងពីជាងពីរសប្ដាហ៍មកហើយ ដែលប្រព័ន្ធផ្សព្វផ្សាយនានា​ក្នុង​ពិភពលោក បានមក«បោះជំរុំ» នៅពីមុខមន្ទីរពេទ្យនេះ ហើយនៅព្រឹកថ្ងៃច័ន្ត បន្ទាប់ពីទទួលដំណឹងថា ម្ដាយ​ទារកបាន​ចូលទៅកាន់មន្ទីរពេទ្យនោះ ភាពជ្រួលច្របល់ក៏បានកើតឡើងយ៉ាងខ្លាំងដែរ នៅក្នុងចំណោមពួកគេ។

រហូតមកដល់ម៉ោងនេះ គេនៅមិនទាន់ស្គាល់ព្រះនាមរបស់ ព្រះអង្គម្ចាស់តូចដែលមានអាយុទើបតែបាន៧-៨ម៉ោងនេះ ថាយ៉ាងដូចម្ដេចនោះនៅឡើយ។ តាមទម្លាប់របស់រាជវាំងអង់គ្លេស ព្រះនាមរបស់ទារក ទំនងជានឹងត្រូវឲ្យដឹង មិននៅ​ក្នុង​ពេលឆាប់ៗនេះទេ។ ជាឧទាហរណ៍កន្លងមក ព្រះអង្គម្ចាស់វីល្លីយ៉ាម ត្រូវបានឲ្យដឹងក្នុងមួយអាទិត្យក្រោយ និងព្រះអង្គ​ម្ចាស់ឆាល ក្នុងរយៈពេលរហូតដល់មួយខែក្រោយ។ ប៉ុន្តែព្រះអង្គម្ចាស់ និងមហេសី ជាឪពុកម្ដាយរបស់ទារកតូច នឹងត្រូវ​បង្ហាញខ្លួនជាសាធារណៈ នៅពេលឆាប់ៗខាងមុខ ដូចដែលប្រពៃណីធ្លាប់ធ្វើកន្លងមក៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី២២ ខែកក្កដា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ