គ្រូបង្វឹកឆែលស៊ី លោកជូសេ ម៉ូរីញ៉ូ (Jose Mourinho) បាននិយាយថា កីឡាករទាំង២រូប ទាំង ដេវីដ ល្វីស (David Luiz) និងចន ម៉ាតា (Juan Mata) និងមិនចាកចេញពីក្លិបនោះទេ បើទោះបីជាមាន សេចក្តីរាយណ៏ថា ពួកគេទាំង២នាក់ អាចនឹង​ចាកចេញពីកីឡាដ្ឋានស្តេមហ្វដប្រិជ្ជ (Stamford Bridge) នៅរដូវក្តៅនេះក៏ដោយ។

សេចក្តីរាយណ៏កាលពីថ្ងៃពុធ បានលើកឡើងថា ក្លិបឆែលស៊ី បានធ្វើការដោះដូរគ្នាជាមួយក្លិបម៉ែនឆេស្ទើ យូណៃធីត (Manchester United) រវាង ម៉ាតា ឬល្វីស និងថែមលុយប្រមាណ ១០លានផោនទៀត ដើម្បីយកខ្សែប្រយុទ្ធ វ៉ែន រ៉ូនី (Wayne Rooney)។

ភ្លាមៗនោះ ក្លិបឆែលស៊ីមិនពេញចិត្តទេ ចំពោះសេចក្តីរាយការណ៏មិនពិតទាំងនោះ ហើយលោកម៉ូរីញូ ក៏បានចេញមក​បក​ស្រាយថា គាត់បានដេញថ្លៃកីឡាកររ៉ូនីមែន ប៉ុន្តែគាត់ពុំបានចង់ដោះដូរកីឡាកររូបណាមួយនោះទេ គ្រាន់តែដេញថ្លៃជា​ទឹកប្រាក់សុទ្ធតែប៉ុណ្ណោះ។

កីឡាករទាំង២រូប របស់ឆែលស៊ី ម៉ាតា និងល្វីស បានពាក់ព័ន្ធនឹងការផ្ទេរចេញពីក្រុម​នៅភាគខាងលិចទីក្រុងឡុង​ដ៏​យ៉ាង​ខ្លាំង នៅរដូវក្តៅនេះ។

ក្លិបម្ចាស់ជើងឯកអេស្ប៉ាញ បាសេឡូណា (Barcelona) បានរាយការណ៏ថា ពួកគេចាប់អារម្មណ៏កីឡាករទាំង២ ខណៈ​ដែលនៅ​សប្តាហ៏នេះក្លិបម៉ែនញូ ក៏បានរាយការណ៏ថា ពូកគេក៏ចាប់អារម្មណ៏ខ្សែការពារ ល្វីសដែរ។

មានអ្នកកាសែតជាច្រើនចោទសួរទៅលោកម៉ូរីញ៉ូថា តើម៉ាតា និងល្វីស អាចនឹងចាកចេញពីឆែលស៊ី នៅរដូវក្តៅនេះទេ? គ្រូបង្វឹករូបនោះ បានឆ្លើយតបថា៖ «អត់ទេ! អត់ទេ! ពួកគេមិនទៅណានោះទេ ពួកគេនឹងនៅបន្តនៅទីនេះ។»

ខ្សែការពារ​កណ្តាលអន្តរជាតិប្រេស៊ីល (ល្វីស) បាននិយាយនៅក្នុងសន្និសិតកាសែត ក្នុងប្រទេសប្រេស៊ីលថា គាត់មិន​សប្បាយចិត្តទេ នៅពេលដែលលឺដំណឹងថា គាត់ទាក់ទងនឹងការចាកចេញពីក្រុមតោខៀវ។ ហើយគាត់បាននិយាយថា គាត់រីករាយនៅទៅនោះ និងចង់លេងនៅទីនោះបន្តទៀត៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៩ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ