ក្លិបហង្សក្រហមលីវើភូល (Liverpool) បានធ្វើឲ្យក្លិបកាំភ្លើងធំអាសឺណល (Arsenal) ចុកឈាមយ៉ាងខ្លាំង បន្ទាប់ពី​ពួកគេ​និយាយថា ពេលនេះពួកគេត្រូវការ ៥៥លានផោនវិញ សម្រាប់ខ្សែប្រយុទ្ធ ល្វីស ស្វារែស (Luis Suarez) ខណៈដែល​អាសឺណល ព្រមឲ្យ៤០លានផោនហើយ។

ល្វីស ស្វារ៉ែស កីឡាករខ្សែរប្រយុទ្ធរបស់ ក្រុមបាល់ទាត់លីវើភូល។

គួររំឮកថា កាលពីមុនក្លិបលីវើភូល បានប្រកាសថា ពួកគេនឹងយល់ព្រមលក់ស្វារែស បើក្រុមណាមួយ ហ៊ានឲ្យតម្លៃ៤០​លានផោន។ ប៉ុន្តែកន្លងមក ក្លិបអាសឺណល បានដេញថ្លៃ២ដងហើយ ពោលគឺ ៣៥លានផោន (បដិសេធ), ៣៧,៥លាន​ផោន (បដិសេធ) ហើយកាលពីយប់មិញ គ្រូបង្វឹកអាសឺណល លោកអាសិង វិងហ្គឺ (Arsene Wenger) បានសម្រេចចិត្ត​ឲ្យ​៤០ផោនពេញ ប៉ុន្តែក្លិបលីវើភូល បែរជាប្តូរចិត្តវិញថា ពេលនេះពួកគេត្រូវការ ៥៥លានផោន។

គ្រូបង្វឹកលីវើភូល លោកប្រេដិន រ៉ដចឺ (Brendan Rodgers) បាននិយាយថា៖ «នៅពេលដែលយើងឃើញថ អេឌីសិន កាវ៉ានី (Edinson Cavani) ផ្ទេរទៅកាន់ក្រុមប៉ារីស (PSG) ក្នុងតម្លៃ៥៥លានផោន ស្វារែសក៏មានតម្លៃដូចគ្នា ព្រោះពួកគេ​ជា​កីឡាករ​ដែលមានភាពប៉ិនប្រសព្វដូចគ្នា។ ការដេញថ្លៃរបស់ក្រុមអាសឺណល មិនសមនឹងសមត្ថភាពរបស់កីឡាករនោះទេ។»

បុរសវ័យ៤០ឆ្នាំ (រ៉ដចឺ) បានបន្តថា៖ «គោលដៅរបស់យើង យើងមិនចង់លក់កីឡាករល្អៗក្នុងក្រុមចេញនោះទេ ព្រោះយើង​កំពុងតែចង់ពង្រឹកក្រុមបន្ថែម។ យើងកំពុងតែត្រៀមលុយទិញកីឡាករល្អៗចូល ដោយមិនគិតថា នឹងលក់គាត់ (ស្វារែស) ចេញឡើយ។ តាមពិត យើងបានទទួលការដេញថ្លៃពីគេមែន ប៉ុន្តែយើងមិនយល់ព្រមទេ។»

មិត្តរួមក្រុមជម្រើសជាតិអ៊ុយរ៉ាហ្គាយ របស់ស្វារែស, អេឌីនសិន កាវ៉ានី បានចាកចេញពីក្រុមណាប៉ូលី (Napoli) ទៅចូលរួម​ជាមួយក្រុមម្ចាស់ជើងឯកបារាំង ប៉ារីស ហ្សិនជឺម៉ិន (Paris Saint-Germain) កាលពីថ្ងៃអង្គារ៏កន្លងទៅ។

ខណៈដែលបានលឺសម្តីរបស់លោករ៉ដចឺ និយាយដូចនោះ កាន់តែធ្វើឲ្យអាសឺណលមានក្តីព្រួយបារម្មណ៏ថា ពួកគេអាចនឹង​បាត់បង់ឱកាសទិញយកកីឡាករសំខាន់ៗ ដែលជាគោលដៅចំបងរបស់ក្លិបដូចជា ស្វារែស, វ៉ែន រ៉ូនី (Wayne Rooney) និង​ហ្គុនស្សាឡូ ហៃហ្គូន (Gonzalo Higuain) ជាដើម។

លោកវីងហ្គឺ ពេលនេះកំពុងតែនៅក្នុងប្រទេសជប៉ុន ខណៈដែលក្រុមរបស់លោកកំពុងតែត្រៀមប្រកួតមិត្តភាពនៅទីនោះ ហើយគាត់នឹងប្រឈមមុខនឹងសំនួររបស់អ្នកគាំទ្រជាច្រើន ដែលចោទសួរពីការពន្យាពេល នៃការទិញខ្សែប្រយុទ្ធចូល​ក្រុម។

លោករ៉ដចឺ បាននិយាយនៅក្នុងប្រទេសឥណ្ឌូនេស៊ី មុនពេលក្រុមរបស់លោកត្រូវប្រកួតនៅក្នុងទីក្រុងចាកាតា នៅថ្ងៃសៅរ៏​ចុងសប្តាហ៏នេះថា៖ «លីវើភូល ជាក្លិបដ៏ធំមួយ នៅលើពិភពលោក។ យើងមានការប្រកួតប្រជែងធំៗ និងមានគូប្រជែង​ខ្លាំងៗ ដូច្នេះយើងមិនចង់លក់កីឡាករល្អៗរបស់យើងចេញនោះទេ យើងចង់រក្សាពួកគេនៅជាមួយក្រុមបន្តទៀត»៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៩ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ