សម រង្សី ត្រូវបានព្រះមហាក្សត្រលើកលែងទោស?
ភ្នំពេញ៖ ពុំមានការបញ្ជាក់ច្បាស់ ពីមន្ត្រីរដ្ឋាភិបាលនៅឡើយនោះទេ ទាក់ទិនទៅនិងព័ត៌មានដែលព្រះមហាក្សត្រ បានព្រះរាជទានទោសដល់ប្រធានគណបក្សសង្គ្រោះជាតិលោក សមរង្ស៊ី ដែលកំពុងនិរទេសខ្លួននៅឯក្រៅប្រទេស ដើម្បីគេចពីការជាប់ពន្ធនាគារ បើទោះបីមានការអះអាងពីប្រភពពីមន្ត្រីជាន់ខ្ពស់ របស់គណបក្សសង្គ្រោះជាតិដែលសុំមិនបញ្ចេញឈ្មោះបាន អះអាងថា ព្រះមហាក្សត្របានឡាយព្រះហត្ថលេខា លើកលែងទោសដល់លោក សម រង្ស៊ី កាលពីយប់ ថ្ងៃទី១១ ខែកក្កដា ក៏ដោយ។
លោក សម រង្សី រូបថតនៅក្នុងបណ្ដាញហ្វេសប៊ុក របស់លោក។
អត្ថបទព័ត៌មានក្រោមចំណងជើងថា ព្រះមហាក្សត្រកម្ពុជា បានឡាយព្រះហត្ថលេខាលើកលែងទោសលោក សម រង្ស៊ី ត្រូវបានបង្ហោះឡើង នៅលើគេហទំព័រកោះសន្តិភាព នៅម៉ោងជាង៧ព្រឹក ថ្ងៃទី១២ខែកក្កដានេះ។ ព័ត៌មាននេះ ត្រូវបានគេចែករំលែកតៗគ្នា នៅលើបណ្តាញទំនាក់ទំនងសង្គម (Facebook) ដោយអ្នកខ្លះសម្តែងការត្រេកអរ អ្នកខ្លះមិនជឿ ប៉ុន្តែអ្នកខ្លះសង្ឃឹមថា រឿងនេះ នឹងក្លាយជាការពិត។
លោកអ៊ុំ តារាវុធ សមាជិកព្រះរាជខុទ្ទកាល័យព្រះហាក្សត្រ បានបដិសេធពុំធ្វើអត្ថាធិប្បាយទេ ដោយលោកបានថ្លែងថា ៖«ខ្ញុំមិនសម្ភាសន៍ទេ»។
ចំណែកលោកខៀវ សុភ័ក អ្នកនាំពាក្យក្រសួងមហាផ្ទៃបានមានប្រសាសន៍ថា លោកមិនបានទទួលព័ត៌មានអ្វី ជុំវិញរឿងលើកលែងទោសលោកសម រង្ស៊ី នោះឡើយ។ លោកបានឲ្យដឹងថា ៖«សួរទៅមន្ត្រីជាន់ខ្ពស់គណបក្សប្រជាជនកម្ពុជា ក្រែងគេដឹងរឿងនេះច្បាស់ជាងខ្ញុំ»។
លោក គៀត ចាន់ថារិទ្ធិ អ្នកនាំពាក្យនគរបាលជាតិ នៅតែប្រកានជំហរដដែល ដោយលោកមានបញ្ជាក់ថា លោកពុំបានទទួលព័តមានអំពីការលើកលែងទោសនោះទេ ប៉ុន្តែនគរបាលត្រៀមនឹងអនុវត្តដីកាចាប់ខ្លួន មេដឹកនាំគណបក្សសង្គ្រោះជាតិ ប្រសិនបើលោក សម រង្ស៊ី បង្ហាញខ្លួននៅកម្ពុជា។ លោកបានថ្លែងបន្តទៀតថា៖ «យើងជាស្ថាប័នអនុវត្តន៍ច្បាប់ គឺយើងធ្វើតាមតែដីការតុលាការ»។
មន្ត្រីជាន់ខ្ពស់គណបក្សសង្គ្រោះជាតិដែលសុំ«មិនបញ្ចេញឈ្មោះ»បានឲ្យដឹងថា ព្រះមហាក្សត្របានឡាយព្រះហត្ថលេខាលើកលែងទោសដល់លោក សម រង្ស៊ី រូចហើយ នៅម៉ោងប្រមាណ ១០យប់ ថ្ងៃទី១១ ខែកក្កដានេះ បន្ទាប់ពីលោកសមរង្ស៊ី បានដាក់លិខិតសើ្នសុំព្រះមហាក្សត្រព្រះរាជទានទោស កាលពីថ្ងៃទី ២៣ ខែមិថុនា។ មន្ត្រីដដែលនោះបានថ្លែងឲ្យដឹងថា ៖«នៅពេលនេះរង់ចាំតែការប្រកាសជាផ្លូវការតែប៉ុណ្ណោះ ពីសំណាក់មន្ត្រីរបស់រដ្ឋាភិបាល»។
លោក យឹម សុវណ្ណ អ្នកនាំពាក្យគណបក្សសង្រ្គោះជាតិ បានបញ្ជាក់ថា រហូតមកដល់ពេលនេះប្រធានបក្សរបស់លោក នៅមិនទាន់ទទួលបានការលើកលែងទោស ពីព្រះមហាក្សត្រនោះនៅឡើយទេ ប៉ុន្តែលោក សម រង្ស៊ី នឹងនៅតែវិលចូលប្រទេសកម្ពុជាវិញ ដូចការគ្រោងទុករបស់លោកយ៉ាងប្រាកដ។ លោកបានឲ្យដឹងទៀតថា ៖«នោះគ្រាន់តែជាពាក្យចចាមអារាមតែប៉ុណ្ណោះ»។
អ្នកនាំពាក្យក្រសួងយុត្តិធម៌ លោក សំ ប្រជាមានិត បានឲ្យដឹងថា លោកមិនបានទទួលព័ត៌មាននេះឡើយ ហើយសម្រាប់ក្រសួងយុត្តិធម៌ គឺមិនមានការស្នើលើកលែងទោសលោក សម រង្ស៊ី នោះទេ ៖ «ប៉ុន្តែដោយឡែក ទាក់ទងនឹងក្រសួងយុត្តិធម៌ គឺគ្មានទេ អំពីនឹងការស្នើសុំលើកលែងទោសនោះ គឺគ្មានទេ មិនមានទាល់តែសោះ»។
អតីតលេខាផ្ទាល់សម្តេចនរោត្តមសីហនុ ព្រះអង្គម្ចាស់ ស៊ីសុវត្ថិធម្មិកោ ក៏មានបន្ទូលដែរថា បើមានការលើកលែងទោសមែននោះ ព្រះរាជក្រឹត្យជាផ្លូវការ នឹងត្រូវចាក់ផ្សាយតាមរយៈទូរទស្សន៍ជាតិ ៖ «ប្រសិនជាព្រះករុណា ព្រះមហាក្សត្រ លោកព្រះរាជហរទ័យ លើកលែងទោសជូនឯកឧត្តម សម រង្ស៊ី គឺព្រោះរាជក្រឹត្យនោះ ផ្សព្វផ្សាយតាមរយៈទូរទស្សន៍ជាតិហើយ ជាពិសេស ទទក»។
គួរបញ្ជាក់ថា នៅយប់ថ្ងៃទី១១ ខែកក្កដាម្សិលមិញនេះ តាមរយៈបណ្ដាញសារព័ត៌មានសង្គម ក្រុមអ្នកគាំទ្រគណបក្សសង្គ្រោះជាតិ ក៏ដូចជាអ្នកប្រើប្រាស់ហ្វេសបុកមួយចំនួន បានសរសេរតៗគ្នាដោយនិយាយថា លោក សម រង្ស៊ី ប្រធានគណបក្សសង្គ្រោះជាតិត្រូវបានព្រះករុណាព្រះមហាក្សត្រ នរោត្តម សីហមុនី ព្រះរាជទានការលើកលែងទោស។
លោក សម រង្ស៊ី ប្រធានគណបក្សសង្គ្រោះជាតិ ដែលកំពុងនិរទេសខ្លួនទៅរស់នៅក្រៅប្រទេស បានសរសេរនៅក្នុងគេហទំព័រផ្លូវការលើបណ្ដាញសង្គមហ្វេសប៊ុករបស់លោកថា លោកនឹងធ្វើសន្និសិទការសែតនៅយប់ថ្ងៃនេះ ហើយនៅថ្ងៃទី១១ ខែកក្កដាម្សិលមិញលោកក៏បានចេញមុខ អំពាវនាវដល់អ្នកគាំទ្របក្សសង្គ្រោះជាតិ ពិសេសក្រុមយុវជនចូលរួមធ្វើជាអ្នកអង្កេតការណ៍ស្ម័គ្រចិត្ត ដើម្បីតាមដានការបោះឆ្នាតខាងមុខនេះ។
តាមរយៈសេចក្ដីអំពាវនោះ លោកសម រង្សី បានបញ្ជាក់ថា ៖«ដើម្បីការពារសន្លឹកឆ្នោត ដែលចេញពីឆន្ទះពិតប្រាកដរបស់ប្រជាពលរដ្ឋ ខ្មែរកុំឲ្យមានការលួចបន្លំនៅថ្ងៃទី២៨ ខែកក្កដាខាងមុខនេះ ខ្ញុំសូមអំពាវនាវដល់ឲ្យបងប្អូនជនរួមជាតិទាំងអស់ ពិសេសក្រុមយុវជន យុវតី ចូលរួមជាមួយគណបក្សសង្គ្រោះជាតិ ដើម្បីការពារសន្លឹកឆ្នោត តាមរយៈការចូលរួមធ្វើជាអ្នកអង្កេតការណ៍បោះឆ្នោត និងរាប់សន្លឹកឆ្នោត»។
លោកសម រង្ស៊ី ត្រូវបានតុលាការកាត់ទោសឲ្យជាប់ពន្ធនាគារចំនួន ១២ឆ្នាំ ពីបទបំផ្លាញតម្រុយបង្គោលព្រំដែនកម្ពុជា-វៀតណាម និងបទក្លែងបន្លំឯកសារពាក់ព័ន្ធនឹងផែនទីព្រំដែនកម្ពុជា-វៀតណាម ប៉ុន្តែបន្ទាប់ពីការនិរទេសខ្លួននៅឯក្រៅប្រទេសដើម្បីគេចពីការជាប់ពន្ធនាគារ ប្រមាណ៤ឆ្នាំ កាលពីថ្ងៃទី០៧ ខែកក្កដា លោក សម រង្ស៊ី បានបញ្ជាក់ថា លោកនឹងមកកម្ពុជាវិញ នៅមុនថ្ងៃបោះឆ្នោត ទី២៨ ខែកក្កដា ឆ្នាំ២០១៣នេះ ទោះជារដ្ឋាភិបាលចាប់ខ្លួនលោកក៏ដោយ៕
----------------------------------------------------
ដោយ៖ គិន ង៉ុយ - ភ្នំពេញ ថ្ងៃទី១២ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ