សម្ដេចដាឡៃឡាម៉ា ប្រារព្ធបុណ្យខួបកំណើត៧៨ឆ្នាំនៅឥណ្ឌា
ជនជាតិទីបេរាប់ពាន់បានជួបជុំគ្នា នៅក្នុងទីអារាមព្រះពុទ្ធសាសនាមួយ ផ្នែកខាងត្បូងនៃប្រទេសឥណ្ឌា ដើម្បីប្រារព្ធខួបកំណើតទី៧៨ឆ្នាំ របស់សម្ដេចដាឡៃឡាម៉ា (dalaï-lama) ជាមួយនឹងចម្រៀង ការរាំកំសាន្ដ និងការសូត្រធម៌ កាលពីថ្ងៃទី០៦ខែកក្កដាឆ្នាំ២០១៣។
សម្ដេចដាឡៃឡាម៉ា ក្នុងពេលប្រារព្ធបុណ្យខួបកំណើតរបស់សម្ដេច។ (រូបថត dalailama.com)
ថ្លែងនៅក្នុងការជួបជុំគ្នានោះ មេដឹកនាំសាសនារបស់ទីបេរូបនេះ បានធ្វើការអំពាវនាវ ដើម្បីផ្សព្វផ្សាយនូវសេចក្ដីស្រឡាញ់ និងមេត្តាធម៌ ក្នុងគោលបំណងលើកស្ទួយសន្តិភាពក្នុងពិភពលោក។
នៅពេលដែលសម្ដេចបានងាកបែរទៅនិយាយជាមួយអ្នកផ្សព្វផ្សាយសាសនាឥស្លាមម្នាក់នៅក្នុងពិធីនោះ សម្ដេចបាននិយាយថា ពាក្យថា «ជីហាដ (djihad)» មិនមានន័យថាប្រឆាំង ឬសម្លាប់អ្នកដទៃនោះទេ តែមានន័យថា ប្រយុទ្ធទល់នឹងអារម្មណ៍អវិជ្ជមានចេញ។
មេដឹកនាំសាសនាដ៏ល្បីរូបនេះ ក៏បានអះអាងដែរថា ជនជាតិទីបេ១៥០០០០នាក់ដែលរស់នៅឯបរទេស បានតំណាងឲ្យប្រជាជនទីបេទាំង៦លាននាក់ នៅប្រទេសចិន ដែលគ្មានសិទ្ធិសេរីភាព និងសិទ្ធិនៃការបញ្ចេញមតិ ពីអ្វីដែលពួកគេមានអារម្មណ៍។
សម្ដេចដាឡៃឡាម៉ា បានភៀសព្រះកាយចូលមកក្នុងប្រទេសឥណ្ឌាតាំងពីឆ្នាំ១៩៥៩។ ទីក្រុងប៉េកាំងបានចោទសម្ដេចថាមានបំណងចង់ស្វែងរកឯករាជ្យឲ្យតំបន់ទីបេ តែសម្ដេចបានអះអាងវិញថា សម្ដេចមានបំណងតែមួយគត់ គឺស្វ័យភាពដ៏ធំបំផុតសម្រាប់ប្រជាជនទីបេ ហើយមិនបានលើកសំនួរ ដែលទាក់ទងនឹងទីបេថាជាផ្នែកមួយនៃប្រទេសចិននោះទេ៕
--------------------------------------------------------
ដោយ ៖ កេសរកូល - ភ្នំពេញ ថ្ងៃទី ០៧ ខែកក្កដា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ