ក្រុមម្ចាស់ជើងឯកចម្ការកៅស៊ូបឹងកេត នឹងប្រកួតបង្គ្រប់សប្តាហ៏ទី១៧ ជាមួយនឹងក្រុមក្រសួងការពារជាតិ នៃពានរង្វាន់​មិត្តហ្វូនខេមបូឌានលីកឆ្នាំ២០១៣ នៅក្នុងពហុកីឡាដ្ឋានអូឡាំពិក នារសៀលម៉ោង០៣ ថ្ងៃទី០៣ ខែកក្កដា ស្អែកនេះ។

ក្រុមកីឡាករបឹងកេត ពាក់អាវពណ៌បែតង។

ការប្រកួតមួយនេះ អាចនិយាយបានថា ជាការប្រកួតបង្គ្រប់កិច្ចរបស់ក្រុមបឹងកេតក៏ថាបាន ព្រោះទោះបីជា​ក្រុមមួយនេះ​ចាញ់ ក៏ពួកគេនៅតែឈរនៅដំណែងលេខ១ដដែល ខណៈដែលបច្ចុប្បន្ន ពួកគេមានពិន្ទុនាំមុខគេដាច់ នៅក្នុងតារាង។

ប៉ុន្តែទោះជាយ៉ាងណា បឹងកេតមិនចង់ទទួលបានលទ្ធផលបរាជ័យនោះទេ ខណៈដែលការប្រកួតខ្វែង ដើម្បីយកដំណែង​ជើងឯក នឹងឈានមកដល់ក្នុងពេលឆាប់ៗខាងមុខនេះ។ លោកគ្រូបង្វឹក ប្រាក់ វុទ្ធី អាចនឹងដាក់កីឡាករ​ឈុតបម្រុងឲ្យចូល​លេងច្រើន ដើម្បីស្វែងយល់ពីបច្ចេកទេសរបស់ពួកគេ នឹងទុកជើងកីឡាករល្អៗ សម្រាប់ការប្រកួតចាំបាច់ធំៗ។

ក្រុមដែលមានមូលដ្ឋាននៅខេត្តកំពង់ចាមមួយនេះ ប្រកួត ១៦ប្រកួតកន្លងមក ឈ្នះ១២ ស្មើ១ និងចាញ់៣ ទាត់ចូលទី​បាន​៥១គ្រាប់ គេទាត់ចូលទីវិញ២១គ្រាប់ មាន៣៧ពិន្ទុ ឈរលើកំពូលតារាងដាច់គេ ខណៈដែលក្រុមលេខ២ ភ្នំពេញក្រោន ប្រកួត១៧ប្រកួត មានតែ ៣២ពិន្ទុ។

ចំណែកឯក្រុមក្រសួងការពារជាតិវិញ មិនដែលមានប្រវត្តិឈ្នះបឹងកេតទេ ក្នុងការប្រកួតជំនួបគ្នា ៣លើកចុងក្រោយនេះ ពោលគឺកាលពីរដូវកាល ២០១២ ជើងទី១ ស្មើគ្នា ១-១, រដូវកាល ២០១២ ជើងទី២ ចាញ់ ២-០ និងរដូវកាល ២០១៣នេះ កាលពីជើងទី១ ចាញ់បឹងកេត ៣-១ ទៀត។

ការប្រកួតនេះ ជាការប្រកួតសងសឹកសម្រាប់ក្រុមការពារជាតិ ខណៈដែលពួកគេចង់បំបែកប្រវត្តិសាស្ត្រ យកឈ្នះក្រុម​ជើង​ខ្លាំងឲ្យបាន។ ប៉ុន្តែទោះបីជាពួកគេចាញ់ ក៏ពួកគេនៅរក្សាកៅអីនៅក្នុងលីកកំពូលនេះបន្តទៀតដែរ ដូច្នេះក្នុងការ​ប្រកួត​មួយ​នេះ ពិតជាគ្មានសំពាធនោះទេ សម្រាប់ពួកគេ។

១៦ប្រកួតរបស់ការពារជាតិកន្លងមក ឈ្នះ៤ ស្មើ៦ និងចាញ់៦ មាន១៨ពិន្ទុ ឈរក្បែរតំបន់កាត់ចោល ស្ថិតនៅចំណាត់​ថ្នាក់​លេខ៨។

គួររំឮកថា ការប្រកួតពានរង្វាន់មិត្តហ្វូនខេមបូឌាលីកឆ្នាំ២០១៣ ជុំទី២ នឹងត្រូវបញ្ចប់នៅចុងសប្តាហ៏នេះ ហើយនឹងឈាន​ចូលដល់ការប្រកួតខ្វែង ដើម្បីស្វែងរកក្រុមម្ចាស់ជើងឯកថ្មី។ ក្រុមដែលត្រូវធ្លាក់ចេញពីលីកកំពូលនេះ បានរកឃើញហើយ ពោលគឺក្រុមសាកលវិទ្យាល័យអាស៊ីអ៊ឺរ៉ុប និងក្រុមព្រឹទ្ធសភា។

រីឯក្រុមកំពូលទាំង៤ (Top 4) ដែលនឹងត្រូវប្រកួតខ្វែងនោះ មិនទាន់ដឹងច្បាស់អស់នៅឡើយ មានតែក្រុមបឹងកេត​មួយ​ប៉ុណ្ណោះ ដែលបានកៅអីទៅមុនគេ ខណៈដែលក្រុម៣ទៀត នឹងត្រូវកាត់ក្តីគ្នា នៅចុងសប្តាហ៏នេះ ដើម្បីដណ្តើម​យកកៅអី​ទៅវគ្គខ្វែង។ ក្រុមដែលមានឱកាសប្រជែងយកកៅអីនេះ មានដូចជាក្រុម ភ្នំពេញក្រោន, ស្វាយរៀង, ណាហ្គាខប, គិរីវង់ និងក្រុមបៀលប្រាយ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០២ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ