បន្ទាប់ពីមានការបង្រ្កាបយ៉ាងចាស់ដៃពី កងកម្លាំងសមត្ថកិច្ច អ្នកភូមបឹងកក់ថ្ងៃទី២ខែកក្កដានេះ បានបន្តធ្វើបាតុកម្មទាមទារ​ឲ្យរដ្ឋាភិបាល ដោះស្រាយវិវាទដីធ្លីរបស់ពួកគេ ជាមួយក្រុមហ៊ុនស៊ូកាគូ (Shukaku) តែត្រូវកម្លាំងសមត្ថកិច្ចធ្វើការបង្រ្កាប​សារជាថ្មី។

អ្នកស្រី ទេព វន្នី (រូបកណ្ដាល) នៅចំពោះមុខការហាមឃាត់ របស់នគរបាលបង្ក្រាបបាតុកម្ម។ (រូបថត MONOROOM.info/ U. Bory)

ព្រឹកនេះអ្នកភូមបឹងកក់ បានបន្តប្រមូលផ្តុំគ្នាលើមហាវិថីព្រះមុនីវង្ស ទល់មុខសាលារាជធានីភ្នំពេញ ទាមទារឲ្យ លោកប៉ា សុជាតិវង្ស អភិបាលរាជធានីភ្នំពេញគោរពពាក្យសន្យាថា នឹងដោះស្រាយផ្តល់បណ្ណកម្មសិទ្ធិ ដល់ពួកគេឲ្យបានមុនពេល​បោះឆ្នោត ប៉ុន្តែរហូតមកដល់ពេលនេះ ពួកមិនបាទទទួលលទ្ធផលដូចការរំពឹងទុកនោះទេ។

បន្ថែមពីនេះ ពួកគាត់ក៏បានទាមទារឲ្យមានការចាប់ខ្លូនជនដៃដល់ ដែលបានប្រើអំពើហិង្សា លើអ្នកភូមិកាលពីម្សិលមិញ បណ្តាលឲ្យសន្លប់ពីរនាក់ ក្នុងនោះម្នាក់រងរបួសធ្ងន់ ដោយត្រូវរលូតកូន។

សូមបញ្ជាក់ថា មិ្សលមិញនេះ អ្នកភូមិក៏បានធ្វើបាតុកម្មនៅមុខសាលារាជធានីភ្នំពេញតាំងពីម៉ោងប្រាំបីព្រឹក រហូតដល់​មាន​ការបង្រ្កាប នៅម៉ោងជាងពីររសៀល។

ការបន្តបាតុកម្មនេះក្រុមអ្នកភូមិ ក៏បានទាមទារឲ្យ ដោះលែងអ្នកស្រី យ៉ោម បុប្ផា អ្នកតវ៉ានៃសហគមន៍បឹងកក់ខ្លាំងក្លាមួយរូប ដែលត្រូវចាប់ខ្លួននិង ផ្តន្ទាទោសឲ្យជាប់ពន្ធនាគារ ចំនួនបីឆ្នាំពីបទបង្កហិង្សា ខណៈដែល លោកស្រី ត្រូវបានអង្គការលើក​លែងទោសអន្តរជាតិ ផ្តល់ការលើកលែងទោស និងស្មើរឲ្យរដ្ឋាភិបាលដោះលែង។

បន្ទាប់ពីគ្មានដំណោះស្រាយ ពីខាងភាគីសាលារាជធានីភ្នំពេញ អ្នកភូមិបានឡើងជិះម៉ូតូកង់បី បន្តដំណើរឆ្ពោះទៅកាន់ផ្ទះ លោកនាយករដ្ឋមន្រ្តី ហ៊ុន សែន។ ប៉ុន្តែក្បួនម៉ូតកង់បី របស់ពួកគាត់បានពើបប្រទះ ជាមួយនឹងក្រុមយុវជនឃោសនា​បោះ​ឆ្នោតរបស់គណបក្សប្រជាជនកម្ពុជា គាំទ្រដោយប៉ូលីលបង្រ្កាបបាតុកម្ម កំពុងឈរចាំរួចជាស្រេចនៅក្បែរ សួនច្បារវិមាន​ឯករាជ្យរួចជាស្រេច។

ក្នុងការប៉ះទង្គិចនេះមានការប្រទាញប្រទង់ និងស្រែកដាក់គ្នាទៅវិញទៅមក រវាងអ្នកភូមិបឹងកក់ និងក្រុមយុវជនគណបក្ស​ប្រជាជនកម្ពុជា។ដោយមិនអាចទំលុះរនាំងដែក ដែលបានដាក់ដោយក្រុមយុវជន និងប៉ូលីលបង្រាបបាតុកម្ម អ្នកភូមិបាន​ដកថយ និងបន្តដំណើរទៅកាន់ផ្លូវក្បែរនោះ។

ពេលមកដល់មាត់ច្រកផ្លូវថ្មី អ្នកភូមិបានរាំងខ្ទប់ដោយប៉ូលីបង្រា្កបបាតុកម្មសាជាថ្មី តែលើកនេះចំនួនប៉ូលីមាន​ការកើន​ឡើង​បួនដង លើសពីចំនួនអ្នកភូមិន និងថែមទាំងមានកម្លាំងអន្តរាគមន៍ ក្បែរនោះទៀត។ ការប៉ះទង្គិចបានកើតឡើងនៅគ្រានោះ ដែលបណ្តាលអ្នកភូមិចំនួនបីនាក់បានសន្លប់ ក្នុងនោះមានស្រ្តីពីរនាក់ និងកុមារមួយ​នាក់។

បាតុកម្មនេះបានបន្តរហូតដល់ម៉ោងពីររសៀល ប៉ុន្តែនៅតែគ្នានដំណោះស្រាយ ខណៈដែលអ្នកភូមិបានថ្លែងថា ពួក​គេនឹងធ្វើរហូតដល់ទីបញ្ចប់។ បញ្ហាដីនៅបឹងកក់នេះ បន្តរ៉ាំរ៉ៃតាំងពីឆ្នាំ២០០៧មិនអាចដោះស្រាយរួច បើទោះជាមានការផ្លាស់ប្តូរអភិបាលក្រុងថ្មីក៏ដោយ។

លោក ណៃ វង្សដា ជាអនុប្រធានស៊ើបអង្កេតសិទ្ធិមនុស្សរបស់ក្រុមមេធាវី សមាគមន៍អាតហុក(ADHOC) បានថ្កោលទោស​ចំពោះការបង្រាបនេះ និងចាត់ទុកការបង្រ្កាបនេះ ជាការប្រើអំពើហិង្សា ទៅលើប្រជាពលរដ្ឋយ៉ាងពិតប្រាកដ។ លោក បន្ថែម​ថា៖ «បើរដ្ឋាភិបាលមានឆន្ទះ ដោះស្រាយបញ្ហានេះ នឹងអាចដោះស្រាយរួចក្នុងរយៈពេល មិនលើសពី​ប្រាំពីរ(៧)ថ្ងៃនោះ​ទេ»។

លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ មិនអាចសុំការអាត្ថាធិប្បាយបានទេនៅថ្ងៃនេះ ដោយទូរស័ព្ទរបស់​លោកគ្មានអ្នកទទួល។

សូមរំលឹកថា កាលពីថ្ងៃទី២៩ ឧសភា កន្លងទៅ ក្រុមអ្នកភូមិក៏បានធ្វើបាតុកម្ម នៅមុខសាលារាជធានី ភ្នំពេញផងដែរ កាល​នោះអាជ្ញាធរ បានប្រើរថយន្តពន្លត់អគ្គិភ័យចំនួន៣គ្រឿង បាញ់ទឹកសន្ធាប់ទៅលើពួកគាត់ ដែលបណ្ដាលឲ្យស្ត្រី ៣នាក់ សន្លប់នៅនឹងកន្លែង៕

----------------------------------------------------
ដោយៈ អ៊ុំ បូរី - ភ្នំពេញថ្ងៃទី២ ខែកក្កដា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ