កីឡាករប្រធានក្រុម ទីចាហ្គូ អាល់ខាន់តារ៉ា (Thiago Alcantara) រកគ្រាប់បាល់បញ្ចូលទីបាន ៣គ្រាប់តែម្នាក់ឯង ហើយ​ជួយ​ឲ្យក្រុមជម្រើសជាតិអេស្ប៉ាញ យកឈ្នះក្រុមជម្រើសជាតិអ៊ីតាលី ដោយលទ្ធផល ៤-២ ក្នុងការប្រកួតផ្តាច់ព្រ័ត្រ​ពាន​រង្វាន់អ៊ឺរ៉ូអាយុក្រោម២១ឆ្នាំ (European Under-21) កាលពីយប់ថ្ងៃអង្គារ៏។

ទីចាហ្គូ អាល់ខាន់តារ៉ា កីឡាករជម្រៀសជាតិអេស្ប៉ាញ ក្រោមអាយុ២១ឆ្នាំ។

ម្ចាស់ការពារដំណែងជើងឯក (អេស្ប៉ាញ) ហាក់ដូចជាមានការពិបាកបន្តិច ក្នុងការគ្របដណ្តប់ទៅលើក្រុមអ៊ីតាលី ប៉ុន្តែ​ទោះជាយ៉ាងណា ក៏មានការធូរស្បើយមកវិញ បន្ទាប់ពីកីឡាករទីចាហ្គូ របស់ក្រុមបាសេឡូណា (Barcelona) តែតបញ្ចូល​ទីយ៉ាងងាយស្រួលនៅនាទីទី៦, កាប់ពីចំងាយបញ្ចូលទីនៅនាទីទី៣១ និងទាត់បាល់ពិន័យ (ប៉េណាល់ទី) ១គ្រាប់ទៀត នៅនាទីទី៣៨។

ការឈ្នះពានរង្វាន់អ៊ឺរ៉ូ អាយុក្រោម២១ឆ្នាំនេះ មានន័យថាក្រុមជម្រើសជាតិអេស្ប៉ាញ បានកាន់កាប់ពានរង្វាន់ធំៗ​អន្តរជាតិ​ទាំងអស់ រួមមានបាល់ទាត់ពិភពលោក (World Cup), អ៊ឺរ៉ូ (ឈុតធំ) និងពានរង្វាន់អ៊ឺរ៉ូ អាយុក្រោម១៩ឆ្នាំផងដែរ។

ទីចាហ្គូ បានក្លាយជាកីឡាករដំបូងគេបង្អស់ ដែលអាចរកគ្រាប់បាល់បញ្ចូលទីបាន ៣គ្រាប់តែម្នាក់ឯង ក្នុងវគ្គផ្តាច់ព្រ័ត្រ បើគិតចាប់តាំងពីឆ្នាំ១៩៩៤មក។

ក្រុមអ៊ីតាលី ក៏មានសង្ឃឹមមកវិញដែរ ខណៈដែលខ្សែប្រយុទ្ធក្រុមជីណូអា (Genoa) ស៊ីរ៉ូ អ៊ីម៉ូបៃ (Ciro Immobile) ទាត់​បំប្លោងផុតដៃអ្នកចាំទីអេស្ប៉ាញ ដេវីដ ដេហ្គែ (David De Gea) នៅនាទីទី៩ ហើយបានជួយឲ្យអ៊ីតាលី តាមបានស្មើ ១-១។ ប៉ុន្តែក៏ត្រូវក្រុមអេស្ប៉ាញ វាយបកបាន ៤-១ វិញ បន្ទាប់ពីកីឡាករអ៊ីស្កូ (Isco) ទាត់បាល់ពិន័យប៉េណាល់ទី គ្រាប់ទី៤ បាន​សម្រេចនៅនាទីទី៦៦។

ខ្សែប្រយុទ្ធរបស់ក្រុមហង្សក្រហមលីវើភូល (Liverpool) ហ្វាប៊ីយ៉ូ បូរីនី (Fabio Borini) រកគ្រាប់បាល់ទី២ ឲ្យក្រុមអ៊ីតាលី បានសម្រេចនៅនាទីទី៨០ បន្ទាប់ពីទាត់កាប់មួយទំហឹងពីចំងាយក្រៅតំបន់គ្រោះថ្នាក់ បានយ៉ាងល្អ។ ប៉ុន្តែទោះ​ជា​យ៉ាង​ណា ក៏មិនអាចជួយឲ្យអ៊ីតាលី តាមបានស្មើវិញដែរ។

គ្រូបង្វឹកអេស្ប៉ាញ លោកជូឡិន ឡូប៉េតេហ្គី (Julen Lopetegui) បាននិយាយថា «យើងពិតជារីករាយខ្លាំងណាស់ មិនត្រឹម​តែជ័យជំនះទេ ពោលគឺយើងពេញចិត្តនូវទម្រង់លេងរបស់ក្រុម។ ខ្ញុំគិតថា កីឡាកររបស់យើង សម្រេចចិត្តលេង​លក្ខណៈ​បច្ចេកទេសរៀងៗខ្លួន បានយ៉ាងឥតខ្ចោះ។ ហើយខ្ញុំជឿថា នេះជាចំនុចសំខាន់របស់ក្រុមយើង។»

ចំណែកឯគ្រូបង្វឹកអ៊ីតាលីវិញ លោកដេវីស ម៉ាំងហ្គែ (Devis Mangia) បានលើកឡើងថា ក្រុមរបស់លោកខ្វះ​នូវបទ​ពិសោធន៏ ក្នុងការប្រកួតពានរង្វាន់ធំៗ។

លោកម៉ាំងហ្គែ បាននិយាយថា «ប្រហែលជាកីឡាកររបស់ខ្ញុំ ខ្វះនូវបទពិសោធន៏ ព្រោះការប្រកួតធំៗដូចនេះ អ្នកចាំបាច់​ត្រូវតែមានបទពិសោធន៏។ ពួកគេមានបទពិសោធន៏ តិចជាងក្រុមអេស្ប៉ាញ។ ប៉ុន្តែកីឡាកររបស់ខ្ញុំ ក៏លេងបានយ៉ាង​អស្ចារ្យដែរ៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៩ ខែមិថុនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ