រូបថតនិងវីដេអូ៖ រាជធានីបូរាណ «មហិន្ទ្របព៌ត» លាក់ខ្លួនលើភ្នំគូលែន
ក្រោយពីយុទ្ធនាការថតរូបពីលើអាកាស ត្រូវបានធ្វើកាលពីពេលថ្មីៗនេះ ក្រុមអ្នកស្រាវជ្រាវបានប្រកាសថា ពួកខ្លួនរកឃើញ រាជធានីមួយលាក់ខ្លួននៅលើជ្រលងភ្នំគូលែន មានឈ្មោះថា មហិន្ទ្របព៌ត មានចម្ងាយច្រើនជាង៤០គីឡូម៉ែត្រ ពីរាជធានីអង្គរ។
ផែនទី ដែលគេបានថតពីលើអាកាស ហើយបានបង្ហាញពីសណ្ឋាននៃទីក្រុងបូរាណមួយ បានលាក់ខ្លួន នៅខ្នងភ្នំ។
តាមរយៈសារព័ត៌មានជាច្រើនទាំងក្នុងស្រុក និងនៅក្រៅស្រុក ក្រុមអ្នកស្រាវជ្រាវបូរាណវិទ្យាបាននិយាយថា រាជធានីមហិន្ទ្របព៌ត នេះ មានចំណាស់យ៉ាងហោចណាស់ ១២០០ឆ្នាំមុន ដែលបើតាមការគិតគូរមើលទៅ រាជធានី ត្រូវបានសាងសង់មុនប្រាសាទអង្គវត្ត ដល់ទៅជាង៣៥០ឆ្នាំ។ សូមបញ្ជាក់ថាចក្រភពខ្មែរអង្គរ បានចាប់ផ្ដើមនៅឆ្នាំ៨០២ក្រោយគ.ស ដូច្នេះរាជធានីបូរាណនេះ ទំនងជាត្រូវបានបោះបង់ចោល នៅពេលអរិយធម៌អង្គរបានចាប់ផ្ដើមចាក់ឬស។
ប៉ុន្តែបូរាណវិទូបារាំងមួយរូប លោកហ្សង់បាទីស ឆឺវ៉ស៍ (Jean-Baptiste Chevance) បានថ្លែងប្រាប់កាសែតក្នុងស្រុកឌឺខេបូឌៀដេល្លីថា «វាដូចជាជ្រុលបន្តិច ដែលនិយាយថា រាជធានីបាត់បង់មួយ ត្រូវបានរកឃើញឡើងវិញនោះ» ព្រោះមហាប្រាសាទខ្មែរជាច្រើន នៅក្នុងតំបន់ត្រូវបានគេស្គាល់ តាំងពីយូរមកហើយ ហើយជាពិសេសរាជធានី មហិន្ទ្របព៌ត របស់ព្រះមហាក្សត្រជ័យវរ្ម័នទី២នេះ ត្រូវបានពួកអ្នកប្រវត្តិវិទូ និងបូរាណវិទូសរសេរទុកនៅក្នុងសៀវភៅរបស់ពួកគេរួចហើយ។
អ្វីដែលការសិក្សាស្រាវជ្រាវបានបង្ហាញនោះ គឺជាផ្ទាំងរូបចម្លាក់ ឬទីសក្ការៈបូរាណទាំងឡាយ រុំព័ទ្ធជុំជិតដោយព្រៃឈើក្រាស់ឃ្មឹក នៃរាជធានីបូរាណមួយ ដែលមានការសាងសង់ប្រកបដោយហេដ្ឋារចនាសម្ព័ន្ធច្បាស់លាស់ មានការលើទ្រនប់ធ្វើប្រលាយធារាសាស្ត្រ ហើយវាជារាជធានីដំបូង ដែលឈានទៅដល់ការចាប់ផ្ដើមមានរូបរាងនៃចក្រភព។
សូមទស្សនារូបភាព និងវីដេអូ ដែលគេហទំព័រសារព័ត៌មានបរទេស (The Sydney Morning Herald) បានផ្សាយដូចតទៅ៖
វីដេអូ៖
------------------------------------------------
ដោយ ឈូករ័ត្ន - ប៉ារីស ថ្ងៃទី១៧ ខែមិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ