សាន់ហ្វ្រាន់ស៊ីស្កូ៖ អ្នកសម្ដែងសៀកម្នាក់ ស្រាតដើរវាយគេក្នុងរន្ធរថភ្លើងក្រោមដី (VDO)
- ដោយ: សេក មនោរកុមារ
- កែប្រែចុងក្រោយ: June 16, 2013
- ប្រធានបទ:
- អត្ថបទ: មានបញ្ហា?
- មតិ-យោបល់
-
បុរសដ៏ចម្លែកម្នាក់នេះអាយុ២៤ឆ្នាំ ត្រូវបានគេរកឃើញអត្តសញ្ញាណរបស់គាត់ ដែលធ្លាប់ជាអ្នកសម្ដែងសៀក ខាងលោតហក់កាយវប្បកម្មមួយរូប។ គាត់អាចនឹងត្រូវតុលាការចោទប្រកាន់គាត់ ក្នុងពេលខាងមុខ។
រូបថតចម្លងពីវីដេអូ ឃើញបុរសអត់ខោរូបនេះ លោតហក់រំលង នៅលើម៉ាស៊ីនត្រួតពិនិត្យសំបុត្ររថភ្លើង។
គ្រប់កាយវិការដែលបុរសបានធ្វើ្ ដូចជាលោតរំលោង បង្វិលខ្លួនត្រឡប់ក្រោយ ទាញជើងទាំងពីរឲ្យញែកពីគ្នា ... បានទាក់ទាញការចាប់អារម្មណ៍ របស់គ្រូបង្វឹកជាច្រើននាក់ នៅសាលាជាន់ខ្ពស់ខាងកាយវប្បកម្ម។ តែគួរឲ្យស្ដាយ ដែលកាយវិការទាំងនេះ បានធ្វើចេញពីបុរសម្នាក់ដែលស្រាតខ្លួននៅននលគោក ហើយដើរទៅរំខានគេឯង សឹងតែគ្រប់គ្នានៅក្នុងរន្ធរថភ្លើងក្រោមដី នៃក្រុងសាន់ហ្វ្រាន់ស៊ីស្កូ (San Francisco) កាលពីថ្ងៃ១០ឧសភាមុន។
រឿងនេះទើបនឹងត្រូវបានគេចាប់អារម្មណ៍ ដោយសារតែអ្នកបម្រើការម្នាក់ នៅនឹងកន្លែងលក់សំបុត្ររថភ្លើង បានថតជាវីដេអូ នូវគ្រប់សកម្មភាពរបស់បុរសនេះ ហើយទើបនឹងយកវីដេអូនេះ ទៅដាក់នៅលើបណ្ដាញចែកផ្សាយវិដេអូ កាលពីសប្ដាហ៍មុននេះប៉ុណ្ណោះ។ រហូតមកទល់នឹងពេលនេះ វីដេអូនេះ ទទួលបានការចុចចូលទៅទស្សនា ប្រមាណជា ៥៤៧០០០ ដងទៅហើយ។
នគរបាលបានប្រាប់ឲ្យដឹងថា យេន័រ ហ្គារីហ្សាបាឡូ (Yeiner Garizabalo) ជាអ្នកសម្ដែងសៀក ខាងកាយវប្បកម្មមួយរូបអាយុ២៤ឆ្នាំ។ នៅក្នុងវីដេអូ បុរសនេះត្រូវបាននគរបាលចាប់គ្រៀក ដើម្បីធ្វើការឃាត់ខ្លួន និងត្រូវបានបញ្ជូនទៅធ្វើការវាយតម្លៃពីស្ថានភាពសុខភាពរបស់គាត់ ជាមួយនឹងគ្រូពេទ្យខាងរោគចិត្ត មុននឹងត្រូវបានដោះលែង នៅរយៈពេល៤៨ម៉ោងក្រោយមក។ ប៉ុន្តែជាមួយនឹងការដាក់ផ្សាយវីដេអូខាងក្រោម រដ្ឋអាជ្ញាប្រចាំតំបន់អាចនឹងមានភស្ដុតាងគ្រប់គ្រាន់ ដើម្បីធ្វើការចោទប្រកាន់បុរសមិនមានអាវខោនេះ ពីបទវាយតប់ និងធ្វើឲ្យរបួសស្នាម។
បញ្ហាដែលមិនអាចពន្យល់បាន !
យេន័រ ហ្គារីហ្សាបាឡូ ធ្លាប់ជាសមាជិកម្នាក់របស់ក្រុមសម្ដែងសៀក ឈ្មោះ ក្លោវស្នូតប៊ុម (ClownSnotBombs)។ អ្នកដឹកនាំ ក្រុមសៀកនេះ បាននិយាយថា យេន័រ បានឈប់មកហាត់សម្ដែង តែប៉ុន្មានថ្ងៃប៉ុណ្ណោះ មុនហេតុការណ៍កើតឡើង។ អ្នកទទួលខុសត្រូវដដែលរូបនោះ បានបន្ថែមថា «យេន័រ នៅពេលនោះ មានសភាពតឹងតែងខ្លាំង ដូចជាបានទទួលរងអ្វីមួយ ដែលធ្វើឲ្យគាត់ខឹងខ្លាំងមែនទែន»។
ប៉ុន្តែនគរបាលមិនបាននិយាយទេ ថាតើបុរសនេះ ត្រូវបានបញ្ជាឲ្យឆ្លងកាត់ការវិភាគ ដើម្បីរកពីវត្តមានថ្នាំស្រវឹង មាននៅក្នុងខ្លួនឬទេ នៅអំឡុងខែឧសភានោះ៕
សូមទស្សនាវីដេអូខាងក្រោមទាំងពីរ ដែលបង្ហាញពីសកម្មភាពរបស់បុរសនេះ រហូតដល់នគរបាលឃាត់ខ្លួន៖
-----------------------------------------------------
ដោយ សេក មនោរកុមារ - ប៉ារីស ថ្ងៃទី១៥ ខែមិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ