ពានរង្វាន់សហព័ន្ធ៖ ជប៉ុនបើកឆាក ប៉ះក្រុមខ្លាំងម្ចាស់ផ្ទះប្រេស៊ីល
- ដោយ: វិន ជីវ័ន្ត
- កែប្រែចុងក្រោយ: June 14, 2013
- ប្រធានបទ:
- អត្ថបទ: មានបញ្ហា?
- មតិ-យោបល់
-
ក្រុមបាល់ទាត់ស៊ាំមួរៃខៀវជប៉ុន ដែលដឹកនាំដោយលោកគ្រូបង្វឹក អាល់បឺតូ ស្សាក់ចឺរ៉ូនី (Alberto Zaccheroni) នឹងត្រូវប្រកួតបើកឆាកមុនគេ ក្នុងព្រឹត្តិការណ៏ពានរង្វាន់ខុនហ្វេដឺរ៉េសិនខាប់ (Confederations Cup) ជាមួយនឹងក្រុមម្ចាស់ផ្ទះស៊ាំបាប្រេស៊ីល នៅថ្ងៃសៅរ៏ទី១៥ ខែមិថុនានេះ។
ក្រុមបាល់ទាត់ជប៉ុន នៅពេលដឹងថាខ្លួនឯង ជាប់មកទាត់នៅបាល់ទាត់ពិភពលោក២០១៤មុនគេ។ (រូបថត AP)
កាលពីគ្រូបង្វឹកចាស់ លោកតាគេស្សី អូកាដា (Takeshi Okada) ដឹកនាំ គាត់បានជួយឲ្យជប៉ុនឆ្លងផុតវគ្គចែកពូល ក្នុងព្រឹត្តិការណ៏បាល់ទាត់ពិភពលោក២០១០ នឹងធ្វើឲ្យពិភពលោកមានការភ្ញាក់ផ្អើលយ៉ាងខ្លាំង បន្ទាប់ក្រុមស៊ាំមួរៃខៀវមួយនេះ បានយកឈ្នះក្រុមកាមេរ៉ូន និងក្រុមដិនម៉ាក មុនពេលដែលចាញ់ក្រុមប៉ារ៉ាហ្គាយ ដោយបាល់កាត់ក្តីប៉េណាល់ទី។
បញ្ជាក់ការប្រកួតមាន៨ក្រុម ចែកជា២ពួល៖
• ពូលអេ (A) មាន៖ ម្ចាស់ផ្ទះប្រេស៊ីល, អ៊ីតាលី, ម៉ិកស៊ីកូ និងជប៉ុន
• ពូលប៊ី (
មាន៖ អេស្ប៉ាញ, អ៊ុយរ៉ាហ្គាយ, នីហ្សេរីយ៉ា និងតាហ៊ីទី។
ហេតុផលដែលទទួលបានសិទ្ធចូលរួមប្រកួត៖
• ប្រេស៊ីល៖ ម្ចាស់ផ្ទះជាប់ដោយស្វ័យប្រវត្តិ
• អេស្ប៉ាញ៖ ម្ចាស់ជើងឯកបាល់ទាត់ពិភពលោក ឆ្នាំ២០១០
• អ៊ីតាលី៖ ជើងឯករងអ៊ឺរ៉ូ ឆ្នាំ២០១២ (អេស្ប៉ាញជើងឯកមានឈ្មោះលេងហើយ)
• ម៉ិកស៊ីកូ៖ ម្ចាស់ជើងឯកតំបន់ខុនខាខេហ្វ (CONCACAF) ឆ្នាំ២០១១
• ជប៉ុន៖ ម្ចាស់ជើងឯកទ្វីបអាស៊ី ឆ្នាំ២០១១
• អ៊ុយរ៉ាហ្គាយ៖ ម្ចាស់ជើងឯកខូផាអាមេរិខា (Copa America)
• នីហ្សេរីយ៉ា៖ ម្ចាស់ជើងឯកទ្វីបអាហ្វ្រិក ឆ្នាំ២០១៣
• តាហ៊ីទី៖ ម្ចាស់ជើងឯកទ្វីបអូសេអានី ឆ្នាំ២០១២
ម្ចាស់ជើងឯកអាស៊ី (ជប៉ុន) មិនដែលឈ្នះក្រុមប្រេស៊ីលទេ ក្នុងការជួបគ្នាចំនួន៩លើកកន្លងមក ហើយក្រុមស៊ាំបាប្រេស៊ីល បានយកឈ្នះ៧លើក និងទាត់ចូលទីបាន ២៤គ្រាប់ថែមទៀត។ ជំនួបមិត្តភាពចុងក្រោយ ប្រេស៊ីលបំបាក់ជប៉ុនដោយលទ្ធផល ៤-០។
គ្រូបង្វឹកជប៉ុន លោកស្សាក់ចឺរ៉ូនី បាននិយាយថា «ការប្រកួតខុនហ្វេដឺរ៉ាសិនខាប់នេះ នឹងមានការលំបាកសម្រាប់ក្រុមយើង ព្រោះសុទ្ធសឹងតែជាក្រុមខ្លាំងកំពូលៗទាំងអស់។ ដូច្នេះយើងត្រូវតែប្រកួតប្រជែងឲ្យដល់ទីបញ្ចប់ និងព្យាយាមធ្វើឲ្យបានល្អបំផុតសម្រាប់ខ្លួនឯង។»
បុរសសញ្ជាតិអ៊ីតាលី បានបន្ថែមថា «ខ្ញុំមិនដឹងថា យើងអាចឡើងដល់វគ្គណាទេ។ ប៉ុន្តែយើងត្រូវតែផ្តោតអារម្មណ៏ក្នុងការប្រកួតបើកឆាកជាមួយនឹងប្រេស៊ីលនេះ ធ្វើយ៉ាងណាឲ្យទទួលបានលទ្ធផលមួយប្រសើរ នោះយើងនឹងមានសង្ឃឹមបន្តទៀត៕»
----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៤ ខែមិថុនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ