អ្នកនាំពាក្យគណកម្មាធិការកូរ៉េខាងជើង ស្តីពីកិច្ចការរួមរវាងប្រទេសទាំងពីរ បានថ្លែងឲ្យដឹងថា «ប្រទេសកូរ៉េខាងត្បូង មិនមានបំណងសូម្បីបន្តិច ក្នុងការបើកទ្វាទៅរកការជជែកគ្នា តាំងពីដំបូងទីមក»។

ដកស្រង់សម្ដីដោយភា្នក់ងារសារព័ត៌មានផ្លូវការ (KCNA) របស់ប្រទេសកុម្មុយនីស អ្នកនាំពាក្យបានបន្តថា «ប្រទេសនេះ បានត្រឹមតែបង្កើតនូវឧបសគ្គ ដើម្បីពន្យាពេលការជួបជជែកគ្នា រួចសម្រេចចេញនូវភាពឃ្លីងឃ្លោងមួយមិនច្បាស់លាស់»។ អ្នកនាំពាក្យរូបនេះ បានចោទទីក្រុងសេអ៊ូល ពី«អំពើអមិត្ត» និង«ការរំខានជាចំហរ» ដែលឈានទៅដល់ការលប់ចោល នូវគម្រោងចរចារទាំងនេះ។

«ចរិកឆ្មើងឆ្មៃ អវិជ្ជមាន និងប្រកបដោយការបង្កហេតុនេះ បានជម្រុញឲ្យយើងចោទសួរជាថ្មីម្ដងទៀត ពីលទ្ធភាពដើម្បី​រក្សាការចរចារយ៉ាងម៉ឺងម៉ាត់ ពន្លឿនចំណងទាក់ទងឲ្យប្រសើរឡើង» អ្នកនាំពាក្យរូបនេះ បានបន្ថែម ដែលមើលទៅមាន​លក្ខណៈដដែលៗ ដូចនឹងសកម្មភាពរាល់ដងរបស់កូរ៉េខាងជើង។

សេចក្ដីថ្លែងការណ៍នេះ បានកើតឡើងក្រោយពីគម្រោងនៃការជួបគ្នាមួយកាលពីថ្ងៃពុធទី១២ខែមិថុនា ហើយបើតាម​គម្រោងនោះ គណប្រតិភូរបស់ប្រទេសកូរ៉េខាងជើង នឹងត្រូវធ្វើដំណើរមកកាន់សណ្ឋាគារហ៊ីលតុន (Hilton) ដ៏ទំនើបមួយ​ក្នុងរដ្ឋធានីនៃកូរ៉េខាងត្បូង ដើម្បីការជជែកគ្នាមួយដែលមានរយៈពេលពីរថ្ងៃ។ គម្រោងជជែកគ្នានេះ ជាគម្រោងជួបគ្នា​ថ្នាក់រដ្ឋមន្ត្រីលើកដំបូងមួយ ចាប់តាំងពី៦ឆ្នាំកន្លងមក។

ប៉ុន្តែការណាត់ជួបនេះ ត្រូវបានលប់ចោលទៅវិញ នៅយប់ថ្ងៃអង្គារទី១១ ដោយមិនបានបញ្ជាក់ពីមូលហេតុច្បាស់លាស់។ គេគ្រាន់តែដឹងថា វាត្រូវបានលើកពេល និងលប់ចោលតែប៉ុណ្ណោះ។

បើតាមអ្នកទទួលខុសត្រូវមួយរូបនៃរដ្ឋាភិបាលកូរ៉េខាងត្បូង ក្នុងលក្ខខ័ណ្ឌមិនបញ្ចេញឈ្មោះ បានបង្ហើបឲ្យដឹងថា ប្រទេស​ទាំងពីមិនយល់ស្របគ្នា អំពីសមាសភាពនៃគណប្រតិភូតំណាងប្រទេសរៀងៗខ្លួន។ ប្រទេសកូរ៉េខាងជើង បានឲ្យដឹងថា ប្រធានដឹកនាំប្រតិភូរបស់កូរ៉េខាងត្បូង ធ្លាប់បាន«បង្កបញ្ហាឲ្យខ្លួន»។

ប្រទេសកូរ៉េខាងជើង បានទាមទារឲ្យមានអ្នកទទួលខុសត្រូវជាន់ខ្ពស់បំផុតមួយ ជៀសជាងនឹងអ្នកទទួលខុសត្រូវ​ដែល​ទីក្រុងសេអ៊ូល បានជ្រើសរើសរួច ឲ្យធ្វើជាប្រធានប្រតិភូក្នុងការទៅចរចារ។ តែទីក្រុងសេអ៊ូល បានបញ្ជាក់ទៅវិញថា អនុរដ្ឋមន្ត្រីដែលទទួលបានការចាត់តាំងទៅនោះ មានជួរបន្ទាត់ស្មើនឹងអ្នកដឹកនាំប្រតិភូរបស់ប្រទេសកូរ៉េខាងជើងដែរ ដែលតាមធម្មតា ទីក្រុងព្យុងយ៉ាងត្រូវតែទទួលយក បើគេគិតតាមមាត្រាដ្ឋាននៃកិច្ចការទូតអន្តរជាតិនោះ។

បណ្ដាអ្នកវិភាគបានគិតថា ការលប់ចោលជាបន្ទាន់នូវការជជែកគ្នានេះ ឆ្លុះបញ្ចាំងពីភាពលំបាក នៃការចាប់ផ្ដើមភាពទុក​ចិត្តគ្នា នៅលើឧបទ្វីបកូរ៉េ ដែលបានបានបំបែកចេញជាពីរប្រទេស តាំងពី៦ទស្សវត្តន៍មកហើយ។ អ្នកជំនាញជាច្រើន បាន​បកស្រាយថា របបដឹកនាំរបស់ប្រទេសកូរ៉េខាងជើង ដែលជាប្រទេសកុម្មុយនីសក្រីក្រមួយ និងនៅឯកោជាងគេនៅ​ក្នុង​ពិភពលោក ភ័យខ្លាចពីភាពផុយស្រួយក្នុងការកាន់អំណាចរបស់ខ្លួន។ ហេតុដូច្នេះហើយ ទើបប្រទេសនេះ មិនសូវជាចង់​ផ្ដល់នូវការសម្រុះសម្រួលប៉ុន្មានទេ។

ការទន្ទឹងរងចាំទាំងឡាយ មិនមែនមានត្រឹមតែប្រទេសកូរ៉េខាងត្បូងប៉ុណ្ណោះនោះទេ តែសម្ព័ន្ធមិត្តរបស់ប្រទេសនេះ និង​មហាអំណាចផ្សេងទៀតក្នុងតំបន់ ដូចយ៉ាងចិន និងជប៉ុនជាដើមនោះ បានសម្ដែងនូវអំណរសាទរយ៉ាងខ្លាំង នៅពេល​ដែលទីក្រុងព្យុងយ៉ាង បង្ហាញនូវបំណងចង់ជជែកពិភាក្សា នៅក្រោយភាពតានតឺងប៉ុន្មានខែចុងក្រោយនេះ ដែលគ្រប់គ្នា​បារម្ភនឹងការផ្ទុះសង្គ្រាមក្នុងឧបទ្វីបផងនោះ៕