បវរកញ្ញាប៊ែលហ្សិកស្រក់ទឹកភ្នែកខ្លោចចិត្តអាណិតកុមារកម្ពុជា (រូបថត)
ប៉ុន្មានសប្ដាហ៍មុននេះ បវរកញ្ញានៃប្រទេសប៊ែលហ្សិក នាងកញ្ញា ណូអេមី ហាប៉ាត៍ (Noémie Happart) បានធ្វើដំណើរទៅកាន់ប្រទេសកម្ពុជា ដើម្បីដាក់ឲ្យប្រើប្រាស់ នូវសាលារៀនមួយ ដែលជួយឧបត្ថម្ភដោយបវរកញ្ញា និងអ្នកជាប់ចំណាត់ថ្នាក់ខ្ពស់ជាងគេ នៃការប្រលងជ្រើសរើសបវរកញ្ញាកាលពីឆ្នាំកន្លងទៅ។ នាងបានផ្ដល់កិច្ចសម្ភាសមួយ ដោយនិយាយទាំងទឹកភ្នែកថា នាងខ្លោចចិត្តអាណិតកុមារនៅទីនោះជាទីបំផុត។ ជាព្រឹត្តិការណ៍ ដែលបានធ្វើឲ្យនាង«ផ្លាស់ប្ដូរជីវិត»។
នាងកញ្ញា ណូអែមី ហាប៉ាត៍ នៅមុនពេលទទួលទានបាយថ្ងៃត្រង់។ (រូបថត Miss Belgique)
នៅក្នុងឱកាសនោះ នាងកញ្ញា ណូអេមី ដែលមានរូបសម្ផស្សស្អាតប្រឹមប្រិយ៍ និងមានសក់ពណ៏មាសមួយរូបនេះ បានធ្វើបុណ្យខួបកំណើតរបស់នាងគម្រប់២០ឆ្នាំ ជាមួយនឹងកុមារខ្មែរ និងអ្នកភូមិនៅទីនោះជាច្រើននាក់។ សាលារៀនដែលនាងទៅសម្ភោធដាក់ឲ្យប្រើប្រាស់ ស្ថិតនៅក្នុងភូមិរង្វាន ឃុំណាំតៅ ស្រុកភ្នំស្រុក ខេត្តបន្ទាយមានជ័យ ដែលមានប្រជាជនរស់នៅប្រមាណជា ៧៩២នាក់ ក្នុងនោះ១៣៥នាក់ជាកុមារ។ ជាសាលាដែលចេញពីប្រាក់ឧបត្ថម្ភធន់ ចំនួន១៣ពាន់អ៊ឺរ៉ូ ហើយត្រូវបានផ្ដល់តាមរយៈអង្គការអន្តរជាតិមួយ ឈ្មោះថា«ក្ដីសង្ឃឹមនៃកុមារ (Hope for Children)»។
នាងណូអេមី បានពន្យល់ថា «នៅភូមិនោះ មិនមានចរន្ដអគ្គិសនី ហើយក៏គ្មានទឹកស្អាត់ប្រើប្រាសដែរ។ ខ្ញុំមានបំណង ចង់ជួបប្រជាជនរស់នៅទីនោះណាស់។» នាងបាននិយាយថា នាងបានចែកសម្លៀកបំពាក់ទៅឲ្យកុមារ ដែលជាភាពសប្បាយរីករាយមួយ សម្រាប់បណ្ដាជននៅទីនោះ។ «នៅអាស៊ី ឯកសណ្ឋានកូនសិស្សសាលា ជាការចាំបាច់ ហើយគ្រួសារខ្លះនៅទីនោះ មិនមានប្រាក់គ្រប់គ្រាន់ និងទិញសម្លៀកបំពាក់សិក្សាទាំងនោះ ឲ្យកូនចៅខ្លួននោះទេ។ រហូតដល់មានគ្រួសារខ្លះ បានបោះបង់ចោល នូវគំនិតដែលត្រូវបញ្ជូនកូនទៅសាលាទៀតផង។»
នាងនិយាយដោយក្ដីរំភើបថា «នាងខ្ញុំ មិនដឹងថា តើនឹងត្រូវពន្យល់យ៉ាងដូចម្ដេច ពីអ្វីដែលនាងខ្ញុំមានអារម្មណ៍ នៅពេលបានឃើញសំណើចក្អាកក្អាយរបស់ពួកគេនោះទេ។ ខ្ញុំមានមោទនភាព នឹងខ្លួនឯងខ្លាំងណាស់។»
«តើហេតុអ្វីបានយើងនៅប៊ែលហ្សិក ចេះតែទាមទារតវ៉ារហូត?»
ប៉ុន្តែនាងមិនភ្លេចទេ នៅពេលដែលនាងបានទៅឃើញដោយផ្ទាល់ភ្នែក ពីភាពក្រីក្រតោកយ៉ាករបស់ប្រជាជនកម្ពុជា ជាពិសេសបណ្ដាជនដែលរស់នៅតំបន់នោះ។ «នាងខ្ញុំមានភាពក្ដុកក្តួលណាស់ នឹងឃើញភាពក្រីក្ររបស់អ្នកទាំងនោះ។ នាងខ្ញុំពិបាកនឹងថតយករូបភាព នៅពីមុខផ្ទះរបស់ពួកគេ ខណៈពេលដែលបេះដូងរបស់នាងខ្ញុំ គ្រប់ដណ្ដប់ដោយភាពសង្វេកនោះ។ នាងខ្ញុំមិនចង់ជឿនឹងភ្នែកផង ថាពួកគេនឹងរស់នៅក្នុងសភាពបែបនេះ ពេញមួយជីវិតរបស់ពួកគេ នៅក្នុងផ្ទះធ្វើពីឈើ គ្មានអគ្គិសនី គ្មានទឹកស្អាត។»
នាងបានបន្ថែមថា «ត្រូវទៅឃើញផ្ទាល់ ដើម្បីជឿរឿងនេះ» ហើយនាងបានចោទសួរទៅ ជនរួមជាតិរបស់នាងថា «តើហេតុអ្វីបានយើងនៅប៊ែលហ្សិក ចេះតែទាមទារតវ៉ាមិនចេះស្រាកស្រាន្ដ ខណៈពេលដែលមានមនុស្សនៅជើងមេឃម្ខាង បានប្រឹងប្រែងសព្វគ្រប់បែបយ៉ាងទាំងអស់ ដើម្បីចិញ្ចឹមកូនចៅរបស់ពួកគេ?»
ជាមួយនឹងភ្នែកដែលទំនងជាចង់រលីងរលោងផងនោះ នាងបានបញ្ជាក់ថា «អ្វីដែលនាងខ្ញុំបានឃើញបានជួបនេះ បានធ្វើឲ្យខ្ញុំផ្លាស់ប្ដូរជីវិត។ នាងខ្ញុំនឹងមិនភ្លេចទេ ពីទិដ្ឋភាពទាំងនោះ។» ប៉ុន្តែកញ្ញារូបស្រស់នៅតែមិនអាចទប់ទឹកភ្នែកបាន នៅពេលដែលនាងបានចាកចេញពីកុមារទាំងនោះ ហើយពួកគេបានសរសេរនៅលើកំណាត់មួយផ្ទាំង ដែលជូនពរឲ្យនាងបានជាប់ជា«បវរកញ្ញាពិភពលោក» ក្នុងពេលខាងមុខ។
«រឿងមួយដែលប្រាកដនោះ គឺនេះជាលើកទីមួយ តែក៏មិនមែនជាលើកចុងក្រោយដែរ ដែលនាងខ្ញុំនឹងត្រឡប់ទៅជួបពួកគេវិញ។ បើនាងខ្ញុំអាច នាងខ្ញុំនឹងបន្តជួយពួកគេ ហើយនាងខ្ញុំនឹងនៅតែធ្វើ បើទោះជានាងខ្ញុំលែងជាបវរកញ្ញាប៊ែលហ្សិកនោះក៏ដោយ៕»
សូមទស្សនារូបភាព ដែលនាងចុះទៅជួបកុមារនៅភូមិរង្វាន ដូចខាងក្រោម៖
------------------------------------------------
ដោយ ឈូករ័ត្ន - ប៉ារីស ថ្ងៃទី១២ ខែមិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ