តួលេខនៃភាពគ្មានការងារធ្វើ ចេញតែបន្តកើនឡើង នៅរយៈពេលពីឆ្នាំចុងក្រោយនេះ នៅប្រទេសបារាំង។ តួលេខ​ចុង​ក្រោយ ដែលទើបនឹងត្រូវបានប្រកាស បានកើនមកដល់ ១០,៨% បើគិតមកដល់ត្រីមាសទីមួយនេះ។

បណ្ដាជន បន្តកន្ទុយគ្នា ដើម្បីរកការងារធ្វើ។ (spencer platt/getty images/afp)

វិទ្យាស្ថានជាតិសម្រាប់ការធ្វើស្ថិតិ និងសម្រាប់ការសិក្សាផ្នែកសេដ្ឋកិច្ច (Insee) បានចង្អុលបង្ហាញថា តួលេខនៃ​ភាព​គ្មាន​ការងារធ្វើ បានបន្តងើបឡើងទៀត បើប្រៀបធៀបនឹងចុងឆ្នាំមុន ដែលមានតែ១០,៥%នោះ។

ប្រធានាធិបតីបារាំង លោកហ្វ្រង់ស៊័រ ហូឡង់ (François Hollande) បានសន្យាថានឹងធ្វើឲ្យផ្លាស់ប្ដូរ នូវការបន្ដកើនឡើងនេះ ពីពេលនេះទៅដល់ចុងឆ្នាំនេះ។ តែទោះបីជាយ៉ាងណាក៏ដោយ ក៏អ្នកជំនាញសេដ្ឋកិច្ចមួយចំនួន បានជឿជាក់ថា ដំណោះ​ស្រាយនឹងមិនអាចធ្វើបាន នៅមុនពាក់កណ្ដាលឆ្នាំក្រោយនោះឡើយ។

សម្រាប់ភ្នាក់ងារស្ថិតិអ៊ឺរ៉ុបមួយទៀត មានឈ្មោះថា អ៊ឺរ៉ូស្ដារ (Eurostat) ដែលមានរបៀបបច្ចេកទេស ក្នុងការធ្វើស្ថិតិ​ដោយ​ឡែកពីបារាំង បានបង្ហាញពីតួលេខមួយទៀតខ្ពស់ជាង និងខុសគ្នាបន្ដិច៖ ១១%។

រហូតមកដល់ពេលនេះ ប្រទេសបារាំងបានជៀសផុត ពីភាពគ្មានការងារធ្វើ ដែលមានចំនួនដ៏លើសលប់មួយ ដូចដែល​ប្រទេសជាប់ភូមិផងរបងជាមួយបានប៉ះពាល់រួចមកហើយ ដូចជាប្រទេសអេស្ប៉ាញជាដើម។ ប៉ុន្តែបញ្ហាសង្គមនេះនឹង​អាចមានសភាពធ្ងន់ធ្ងរជាងនេះ ដោយសារតែស្ថានភាពសេដ្ឋកិច្ចបារាំងកំពុងតែជួបជាថ្មី នូវការធ្លាក់ចុះ ហើយ​ផលិតផល​ក្នុងស្រុកគិតជាតួលេខ ក៏បានធ្លាក់០,២% នៅក្នុងត្រីមាសទីមួយនេះដែរ។

វិទ្យាស្ថានជាតិសម្រាប់ការធ្វើស្ថិតិ និងសម្រាប់ការសិក្សាផ្នែកសេដ្ឋកិច្ច បានបញ្ជាក់ដែរថា តួលេខដែលខ្លួនបានបង្ហាញនេះ នៅមានលក្ខណៈជាការព្រមានទុកជាមុនមួយ៕

-----------------------------------------------------------------
ដោយ សេក មនោរកុមារ - ប៉ារីស​ ថ្ងៃទី០៦ ខែមិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ