អភិបាលនៃតំបន់ប៉េនហ្សា ផ្នែកនារតីនៃប្រទេសរ៉ូស្សី លោក វ៉ាស៊ីលី បុតឆ្ការ៉េវ (Vassili Botchkarev) បានដាក់បញ្ជា​ទៅ​មន្ត្រីជាន់ខ្ពស់ នៅក្រោមឱវ៉ាទរបស់លោកម្នាក់ ដែលធ្វើការនៅក្នុងវិស័យកីឡា និងសុខាភិបាល ឲ្យកាត់បន្ថយទម្ងន់ ជាថ្នូរ​ទល់​នឹងមុខតំណែងរបស់គាត់ ដើម្បីបង្ហាញគំរូដល់អ្នកផ្សេង។

បុរសដុះពោះ ដែលនៅកម្ពុជា គេច្រើនឲ្យតម្លៃ ថាជាអ្នកមានលុយ មានអំណាច ...។ (រូបជំនួស)

«ខ្ញុំបញ្ជាឲ្យលោកសម្រកទម្ងន់ ឲ្យបាន១៦គីឡូក្រាម ក្នុងរយៈពេល៦ខែ» លោកអភិបាលបានប្រកាសយ៉ាងដូច្នេះ ទៅ​កាន់មន្ត្រីទទួលខុសត្រូវខាងកីឡា និងសុខាភិបាលប្រចាំតំបន់ លោក វ្លាឌីមៀរ ស្ទ្រីអាតឆ្កូវ (Vladimir Strioutchkov)។ នេះបើតាមការឲ្យដឹង របស់ទីភ្នាក់ងារសារព័ត៌មានរ៉ូស្សី នៅថ្ងៃច័ន្ទទី៣ខែមិថុនានេះ។

«បើអ្នក មិនសម្រកទម្ងន់ខ្លួនចេញ ហើយបើអ្នកមិនមានរាងរៅធម្មតាទេ ៖ ចេញពីរដ្ឋាភិបាលទៅ» លោកអភិបាលបាន​បន្ថែម ដោយបាននិយាយជាទូទៅ ទៅកាន់មន្ត្រីជាន់ខ្ពស់ដទៃទៀត នៅក្នុងវិស័យកីឡារ និងសុខាភិបាល។

លោកអភិបាល បាននិយាយពន្យល់បែបនេះ នៅក្នុងអង្គប្រជុំមួយ ដែលបានរៀបចំធ្វើឡើងសម្រាប់អាជ្ញាធរប្រចាំតំបន់ ហើយលោកបានយកឱកាសនោះ ដើម្បីថ្លែងឲ្យដឹង ពីការទទូចទាមទាររបស់លោក សុំឲ្យមានអនាម័យជីវិតដ៏ល្អមួយ សម្រាប់​ពលរដ្ឋ។

«នៅក្នុងតំបន់ប៉េនហ្សា យើងធ្វើការប្រយុទ្ធប្រឆាំង ទល់នឹងការជក់បារី និងការញៀនស្រា នៅក្នុងចំណោមប្រជាពលរដ្ឋ។ តែថ្ងៃនេះ យើងត្រូវប្រយុទ្ធតស៊ូ ដើម្បីថែរក្សាជីវិតររបស់ប្រជាពលរដ្ឋ ជាពិសេសទៅក្នុងចំណោមក្មេងជំនាន់ក្រោយ។» លោកបានបន្ថែមយ៉ាងដូច្នេះ តាមរយៈគេហទំព័ររដ្ឋបាលក្នុងស្រុកមួយ៕

-------------------------------------------------
ដោយ ៖ កេសរកូល - ភ្នំពេញ ថ្ងៃទី០៤ ខែមិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ