បេក្ខជនទាំងប្រាំបីរូប នៃការបោះឆ្នោតប្រធានាធបតីនៅប្រទេសអៀរ៉ង់ បានជួបជជែកគ្នានៅតាមកញ្ចក់ទូរទស្សន៍ ស្ដីពី​ប្រធានបទសេដ្ឋកិច្ច នៅយប់ថ្ងៃសុក្រកន្លងមកនេះ។

បេក្ខជនទាំងប្រាំបីរូប នៃការបោះឆ្នោតប្រធានាធបតីនៅប្រទេសអៀរ៉ង់។

បេក្ខជនអភិរក្សនិយមម្នាក់ បានអំពាវនាវឲ្យមាន«ការផ្សះផ្សារជាមួយពិភពលោក» ដើម្បីទម្លាក់តួលេខអ្នកគ្មានការងារធ្វើ ដែលបានឡើងខ្ពស់ និងអត្រាអតិផរណា នៅប្រទេសអៀរ៉ង់។

បេក្ខជនម្នាក់ទៀត លោកអាលី អាក្បា វេឡាវ៉ាទី (Ali Akbar Velayati) អតីតទីប្រឹក្សាដ៏សំខាន់មួយរូប​ នៃអ្នកទទួល​ខុសត្រូវ​ជាន់ខ្ពស់ខាងនយោបាយ និងសាសនា បានគិតថា អៀរ៉ង់មិនអាចអភិវឌ្ឍន៍កម្លាំងរបស់ខ្លួនបានទេ បើមិនធ្វើឲ្យប្រសើរឡើង នូវទំនាក់ទំនងជាមួយប្រទេសជិតខាង និងប្រទេសផ្សេងៗទៀតក្នុងពិភពលោក។

សេដ្ឋកិច្ចរបស់ប្រទេសប្រកាន់សាសនាឥស្លាមមួយនេះ បានជួបការពិបាក ដោយសារមួយផ្នែកបានរងនូវទណ្ឌកម្មអន្តរជាតិ ប្រឆាំងទល់នឹងគម្រោងនុយក្លេអ៊ែរ ដែលត្រូវបានហាមឃាត់ដោយអង្គការសហប្រជាជាតិ។

បេក្ខជនតិចណាស់ដែលបាននិយាយពីបញ្ហាទណ្ឌកម្ម នៅក្នុងការជជែកពិភាក្សានោះ។ ប៉ុន្តែបេក្ខជនម្នាក់ពីក្នុង​ចំណោម​នោះ លោកម៉ូសេន រ៉េហ្សៃ (Mohsen Rezaei) អតីតនាយទាហានបដិវត្តន៍ជើងចាស់មួយរូប បានប្រកាសថា អៀរ៉ង់ត្រូវរក​«ដំណោះស្រាយសមស្រប»មួយ ឆ្លើយតបទៅនឹងទណ្ឌកម្មទាំងនេះ ដើម្បី«បញ្ឈប់អតិផរណា»។

ប្រទេសអៀរ៉ង់ បានប្រឈមនឹងអត្រាអតិផរណាប្រមាណជា ៣០% និងអត្រាអ្នកគ្មានការងារធ្វើប្រមាណជា១៤% ហើយ​វា​បានក្លាយជាបញ្ហាស្នូលយ៉ាងសំខាន់ នៅក្នុងការបោះឆ្នោតជ្រើសរើសប្រធានាធិបតី ក្នុងថ្ងៃ១៤ខែមិថុនាខាងមុខ៕

-------------------------------------------------
ដោយ ៖ កេសរកូល - ភ្នំពេញ ថ្ងៃទី៣១ ខែឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ