មនុស្ស៣០នាក់ក្នុងនោះ បីនាក់ជាកម្លាំងសមត្ថកិច្ច បានរងរបួស កាលពីថ្ងៃច័ន្ទនេះ នៅក្នុងហេតុការណ៍មិនបានគ្រោងទុក នៃ​ការអបអរជើង​ឯកឆ្នាំ២០១៣ប្រចាំប្រទេសបារាំង នៃក្រុមបាល់ទាត់ទីក្រុងប៉ារីស។

ក្រុមអ្នកគាំទ្របាល់ទាត់ បានវាយរថយន្ដក្រុងចំនួនបីគ្រឿង នៅក្រោមតួរអេហ្វែល។ (រូបថត D.KEO/ MONOROOM.info)

អាជ្ញាធរបានប្រកាសថា កម្លាំងនគរបាលចំនួន៨០០នាក់ បានដាក់ពង្រាយដើម្បីការពារសន្តិសុខ ឲ្យពិធីអបអរសាទរនេះ ហើយមនុស្សចំនួន២១នាក់ត្រូវបានឃាត់ខ្លួន ពីបទចោលកាំជ្រួចភ្លើង និងពីបទឆាឆៅអុកឡុកទីក្រុង។ អាជ្ញាធរបាន​បន្ថែម​ថា មានពួកអ្នកបផ្លិចបំផ្លាញជាច្រើនពាន់នាក់ បានធ្វើសកម្មភាពនៅពេលនោះ។

ស្នងការទីក្រុងប៉ារីស លោកប៊ែរណាដ ប៊ូកូ (Bernard Boucault) បានថ្លែងថា «នឹងមិនមានព្រឹត្តិការណ៍ កំសាន្ដសប្បាយ​ទៀតទេ នៅតាមផ្លូវសាធារណៈ របស់ក្រុមកីឡាបាល់ទាត់នេះ»។

ការអបអរជើង​ឯករបស់ក្រុមបាល់ទាត់របស់ក្រុងប៉ារីស ដែលបណ្ដាជនអ្នកគាំទ្រទន្ទឹងរងចាំតាំងពី១៩ឆ្នាមកហើយ បាន​ប្រព្រឹត្តិទៅត្រឹមតែប្រមាណជា៥នាទីប៉ុណ្ណោះ។ រយៈពេលនេះ គ្រប់សមល្មមនឹងក្រុមកីឡាករបាល់ទាត់របស់ក្រុម បាន​លើក​ពានរង្វាន់ជើង​ឯកនេះ នៅមុខហ្វូងអ្នកគាំទ្រប្រមាណជា១៥០០០នាក់ នៅលើទីលានត្រូកាដេរ៉ូ (Trocadéro) ជិត​តួរអេហ្វែល។ បន្ទាប់ពីនោះមក ក្រុមអ្នកគាំទ្រមួយចំនួន បានប្រែក្លាយពិធីនេះ ទៅជាមិនអាចគ្រប់គ្រងបាន ហើយបាន​បង្ខំអោយអ្នករៀបចំ កាត់ចោលកម្មវិធីមួយចំនួនចោលទៀត។

ក្រុមបាល់ទាត់ខ្លួនឯង ក៏បានដាក់ពង្រាយក្រុមសន្តិសុខឯកជនជាច្រើនសិបនាក់ នៅក្នុងនិងជុំវិញពិធីនោះដែរ។ នៅពេល​រងចាំការមកដល់នៃក្រុមកីឡាករ អ្នកគាំទ្រមួយចំនួនបានដណ្ដើមយកបាន នូវជណ្ដើរដែកដែលដាក់តម្លើង​ សម្រាប់​ជួសជុលសារមន្ទីមួយនៅជាប់នោះ។ អ្នករៀបចំកម្មវិធីបានសុំអោយក្រុមអ្នកបំពារបំពានទាំងនោះ ចុះពីជណ្ដើរដែកនោះ​សិន មុននឹងគេចាប់ផ្ដើមទទួលពួកកីឡាករ។ បន្តិចក្រោយមកទៀតទីកន្លែងមួយទៀត ដែលគេរៀបចំសម្រាប់​ទទួលអ្នក​កាសែត ក៏ត្រូវបានពួក«អ្នកសម្បើម»ទាំងនោះ ឡើងកាន់កាប់ទន្ទ្រានដែរ។

«ពីធីបុណ្យ ត្រូវបានឆាឆៅ។​ ខ្ញុំជាអ្នករស់នៅក្នុងសង្កាត់នេះ ចំជាគួរអោយមួម៉ៅមែន។» អ្នកគាំទ្រក្រុមកីឡាករ​ម្នាក់ បាន​និយាយឡើង ជាមួយនឹងទឹកភ្នែកហូរមក ដោយសារទទួលឧស្ម័នបង្ហូទឹកភ្នែក របស់កម្លាំងនគរបាល។ យុវជននេះ បាន​បន្ថែមថា «ជា​កំហុសរបស់ពួកអ្នកសម្បើម (ULTRAS)។ យើងអស់មានបុណ្យសប្បាយ ដោយសារពួកវា។»

សហជីបនៃសម្ព័ន្ធភាពកងកម្លាំងនគរបាល បានចង្អុលម្រាមដៃដាក់ស្នងការនគរបាលទីក្រុង ថា«ការជួបជុំគ្នានេះ ត្រូវបាន​វាយតម្លៃខុស» ហើយថាអាជ្ញាធរមិនបានដាក់ពង្រាយកម្លាំង ឲ្យសមធន់ល្មម ដើម្បីការពារសន្តិសុខពិធីបុណ្យនេះទេ៕

---------------------------------------------------
ដោយ សេក មនោរកុមារ - ប៉ារីស​ ថ្ងៃទី១៣ ខែឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ