ហ្គោហ្គ័ល ចង់ធ្វើជាអ្នកអង្កេតលើទូរសារអេឡិកត្រូនិក របស់យើងគ្រប់គ្នា
ក្រុមហ៊ុនបច្ចេកវិទ្យាដ៏ធំរបស់អាមេរិក ចង់បង្កើតសាលាកប័ត្រទៅលើកម្មសិទ្ធបញ្ញាមួយ ដែលនឹងត្រួតពិនិត្យទៅលើភាពស្របច្បាប់ នៃបណ្ដាទូរសារអេឡិកត្រូនិក (E-mails) ទាំងឡាយ។ មិនត្រឹមតែប៉ុណ្ណោះ ប្រសិនជាចាំបាច់ ហ្គោហ្គ័ល (Google) នឹងរាយការណ៍ពីទូរសារដ៏គួរអោយសង្ស័យនេះ នៅមុនទូរសារត្រូវបានផ្ញើរចេញនោះទៅទៀត។
នៅខែតុលាមុន អាជ្ញាធរនៃសហគមន៍អ៊ឺរ៉ុបទាំង២៧ប្រទេស ផ្នែកគាំពារទិន្នន័យ បានដាស់តឿនហ្គោហ្គ័ល អោយធ្វើការផ្លាស់ប្ដូ លក្ខត្តិកៈនៃនយោបាយរក្សាការសម្ងាត់របស់ខ្លួន ដើម្បីឲ្យសមស្របទៅនឹង ទិសដៅដ៏សំខាន់នៃពត៌មាន និងសេរីភាពនៅលើជីវិតឯកជន ដែលត្រូវបានការពារយ៉ាងខ្លាំងជាទីបំផុតនៅអ៊ឺរ៉ុប។ នៅដើមខែមេសានេះ ប្រទេសអ៊ឺរ៉ុបចំនួន៦ បានបើកការវាយលុកលើក្រុមហ៊ុនយក្សខាងព័ត៌មានវិទ្យាមួយនេះ ពីបទមិន«គោរព»លើការណែនាំខាងលើ។
មិនត្រឹមតែមិនបានដកថយ ពីអ្វីដែលខ្លួនបានធ្វើកន្លងមក ហ្គោហ្គ័ល បានបន្ថែមការត្រួតពិនិត្យថ្មីៗផ្សេងទៀត ទៅលើអ្នកប្រើប្រាស់របស់ខ្លួន។ ហ្គោហ្គ័ល នឹងចូលទៅធ្វើដឹងធ្វើលឺ នៅក្នុងទំនាក់ទំនងទាំងឡាយ ដែលអ្នកប្រើប្រាស់មាន នៅពេលបានប្រើសេវាកម្មផ្ដល់ដោយហ្គោហ្គ័ល។
គេហទំព័រជំនាញខាងព័ត៌មានវិទ្យាមួយរបស់បារាំង (01Net) បានរាយការណ៍ថា ក្រុមហ៊ុនអាមេរិកាំង បានដាក់តម្កល់កម្មសិទ្ទបញ្ញានៅថ្ងៃទី០២ខែឧសភា នូវការត្រួតពិនិត្យរាល់ទូរសារអេឡិកត្រូនិក របស់អ្នកប្រើប្រាស់ និងតាមដានរកអោយឃើញពីភាពស្របច្បាប់ របស់ទូរសារទាំងនោះ ទាក់ទងនឹងច្បាប់ប្រទេស លក្ខត្តិកៈនៃក្រុមហ៊ុនឯកជន ឬកិច្ចសន្យាការងាររបស់អ្នកប្រើប្រាស់។ សូម្បីតែទូរសារទាំងនោះ មិនទាន់បានផ្ញើរចេញ ក៏ហ្គោហ្គ័លនឹងរាយការណ៍ ពីភាពមិនប្រក្រតី ទៅកាន់សមត្ថកិច្ច ឬម្ចាស់ក្រុមហ៊ុន។
សូមអានការពន្យល់របស់ 01Net ពីអ្វីដែលហ្គោហ្គ័លចង់ធ្វើ នៅក្នុងបច្ចេកវិទ្យាថ្មីរបស់ខ្លួន ដូចខាងក្រោម៖
ឧទាហរណ៍ថា អ្នកកំពុងសរសេរទូរសារ ឬមែលមួយ។ រំពេចនោះ ខណៈដែលសាររបស់អ្នក មិនទាន់ត្រូវបានសរសេរចប់ស្រួលបួលផង ប្រអប់ព័ត៌មានមួយទៀតបានលោតរំលេចឡើង នៅពីលើប្រអប់សរសេរទូរសារនោះ ដើម្បីប្រាប់អ្នកពីអ្វីដែលអ្នកកំពុងសរសេរ នឹងអាចខុសពីលក្ខត្តិកៈនៃក្រុមហ៊ុនដែលអ្នកកំពុងធ្វើការ ឬខុសពីចំនុចដែលមានចែងនៅក្នុងកិច្ចសន្យាការងាររបស់អ្នក។ ក្នុងពេលជាមួយគ្នានោះ ផ្នែកត្រួតពិនិត្យនៃម្ចាស់ក្រុមហ៊ុនរបស់អ្នក ក៏ទទួលបានការជូនដំណឹងនេះដូចគ្នា ជាអាថ៌ដូចជា «លោកសុខ ទំនងជាកំពុងបំពានច្បាប់នេះ ឬច្បាប់នោះ។ល។»
ហ្គោហ្គ័លបានបញ្ជាក់នៅក្នុង ពាក្យស្នើសុំសាលាកប័ត្រទៅលើកម្មសិទ្ធបញ្ញា យ៉ាងដូច្នេះថា «វាជាប្រយោជន៍ ទៅដល់ក្រុមហ៊ុនឯកជនទាំងឡាយ ដើម្បីដឹងពីការរំលោភច្បាប់ និងការរំលោភលក្ខត្តិកៈ នៅក្នុងរង្វង់ការងាររបស់ពួកគេ»។ បច្ចេកវិទ្យាថ្មី ដែលហ្គោហ្គ័លដាក់ឈ្មោះអោយ ជាភាសាអង់គ្លេសថា«Policy Violation Checker»នេះ មានសមត្ថភាពអាចស្គាល់ដឹង ពីរាល់ឃ្លាឬទម្រង់ឃ្លាទាំងឡាយ ដែលគួរឲ្យសង្ស័យទាំងនោះ ហើយនឹងដាក់បន្ថែមជារឿយៗ នូវទិន្នន័យថ្មីៗ នៃ«ឃ្លាសង្ស័យ»ដែលទើបនឹងកើតផ្សេងៗទៀត ទៅក្នុងឃ្លាំងផ្ទុករបស់ខ្លួន។
បើបច្ចេកវិទ្យាដ៏«អស្ចារ្យ»នេះ ត្រូវបានយកមកអនុវត្តន៍មែននោះ បុគ្គលិកកម្មករទាំងឡាយ ត្រូវតែត្រៀមខ្លួនឲ្យហើយពីឥឡូវនេះទៅ ... ថាតើចង់ឲ្យថៅកែរបស់ក្រុមហ៊ុន ឆាប់ដេញខ្លួនចោល ឬត្រូវទ្រាំធ្វើការទាំងបិតមាត់ជិតរហូតនោះ៕
-------------------------------------------------
ដោយ ឈូករ័ត្ន - ប៉ារីស ថ្ងៃទី០៩ ខែឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ