សំនួរបានចោទថា៖ តើបទ «ជេនថលម៉ែន (Gentleman)» អាចយកឈ្នះបទ «ហ្គាំងណាំស្តាយ (Gangnam Style)» ដោយ​ផ្អែកទៅលើចំនួនអ្នកចូលទស្សនា ក្នុងគេហទំព័រយូធូប (YouTube) បានដែរឬទេ?

ព្សាយ នៅក្នុងការប្រគុំតន្ត្រីដ៏ធំ នៅថ្ងៃទី១៤ខែមេសា កណ្ដាលទីក្រុងសេអ៊ូល។

ជាមួយនឹងបទរាំលោត និងគួរឲ្យអស់សំណើច ដោយមានក្បាច់រាំថ្មី និងបទភ្លេងថ្មីមួយទៀតនោះ តារាចម្រៀង​ឆ្នើមរបស់​កូរ៉េខាងត្បូង ព្សាយ (Psy) កំពុងតែបំបែកកំណត់ត្រាថ្មីម្តងទៀត នៅលើបណ្តាញអ៊ីនធឺណែត ជាមួយនឹងបទថ្មីមួយ​របស់​គាត់ ដែលមានចំណងជើងថា «ជេនថលម៉ែន»។

យូធូប បានប្រកាសកាសកន្លេងមកថ្មីៗនេះថា បទ«ជេនថលម៉ែន» មានចំនួនអ្នកចូលទស្សនា ច្រើនបំផុតក្នុង១ថ្ងៃ ដែល​មិនធ្លាប់មាន និងមានចំនួនច្រើនជាងបទ «ហ្គាំងណាំស្តាយ» ទៅទៀត។ ក្នុងរយះពេល១សប្តាហ៏ វីឌីអូនេះអ្នកចុចចូល​មើលជាង ៣៤លានដង ហើយរហូតមកដល់ នៅថ្ងៃទី២៩ខែមេសានេះ «ជេនថលម៉ែន» មានចំនួនអ្នកចុចចូល​មកទស្សនា​សរុប ជាង២៥៤លានដង។

អ្នកចាត់ការគេហទំព័រយូធូប លោក ឃេវីន អាលូកា (Kevin Allocca) បាននិយាយថា «ដើម្បីជាការមើលឃើញខ្លះបន្ថែម ជេនថលមែនជាវីឌីអូតន្ត្រីមួយ ដែលមានអ្នកទស្សនាច្រើនបំផុត នៅលើគេហទំព័ររបស់យើង ដែលមិនធ្លាប់បានឃើញ។ ជេនថលម៉ែន មានអ្នកចូលមើល ១០០លាននាក់ ក្នុងរយះពេលមិនដល់ ៤ថ្ងៃផង នៅគ្រប់តំបន់ទាំងអស់លើពិភពលោក។ បើធៀបនឹងបទ ហ្គាំងណាំស្តាយ ប្រហែលជា ជិត២ខែ ទើបទទួលបាននូវចំនួននេះ។»

«ហ្គាំងណាំស្តាយ» បានបំបែកកំណត់ត្រាយូធូប ដោយមានចំនួនអ្នកចូលមើលច្រើនបំផុត គ្រប់ពេលទាំងអស់។ បច្ចុប្បន្ន​វា​មានចំនួនរហូតដល់ជិត ១,៥ពាន់លាននាក់ ដែលបានចុចចូលទស្សនានូវវីឌីអូនោះ។

ប៉ុន្តែពេលនេះ ប្រហែលជាបទ «ជេនថលម៉ែន» កំពុងតែមានប្រៀបជាង «ហ្គាំងណាំស្តាយ»។ យូធូប បានបង្ហាញថា បទថ្មី​របស់ព្សាយ ទទួលបានចំណាត់ថ្នាក់លេខ១ នៅក្នុងតារាងតន្ត្រីរបស់យូធូប កាលពីសប្តាហ៏មុន។ ចំណែកឯបទ «ហ្គាំណាំស្តាយ» ធ្លាក់ទៅចំណាត់ថ្នាក់លេខ២វិញ។

គួរបញ្ជាក់ថា កំណត់ត្រាចាស់ ដែលមានចំនួនអ្នកចូលទស្សនា ក្នុងយូធូបច្រើនជាងគេ ក្នុងរយះពេល១ថ្ងៃនោះ ជាខ្សែ​ភាពយន្ត​ខ្លី មានចំណងជើងថា «គូនី ២០១២ (KONY 2012)» ដែលមានអ្នកចូលទស្សនាប្រមាណជាង ៣១លាន​នាក់​ក្នុង១ថ្ងៃ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៩ ខែមេសា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ