វិទ្យុសម្លេងអូស្ត្រាលី បានរាយការណ៍រឿងដ៏អស្ចារ្យមួយ និយាយពីបុរសជនជាតិបារាំងម្នាក់ ដែលធ្វើការនៅលើទូក​កាណូត​នេសាទ នៅប្រទេសអូស្ត្រាលីនោះ ថាបានរួចជីវិត ពីការត្របាក់ខាំ«ក្បាល»គាត់ ដោយសត្វក្រពើរមួយក្បាល​ ដោយសារ​តែលោកបាន«ដាល់» សត្វកំណាចនេះ រហូតដល់វាព្រមលែង។

ក្រពើទឹកប្រៃនេះ មានប្រវែង៥ម៉ែត្រ និងមានទម្ងន់៥០០គីឡូក្រាម។ (រូបជំនួស)

លោកយ័ន ហ្គាឡឺរ៉ាម (Yoann Galeran) អាយុ២៩ឆ្នាំ បានហែលទឹកឆ្លងទៅកាន់កាណូតនេសាទ ក្នុងពេលយប់ងងឹត​ថ្ងៃ​អាទិត្យទី២១ខែមេសា នៅទីក្រុងនូឡងបាយ (Nhulunbuy) ផ្នែកខាងជើងបំផុតនៃប្រទេសអូស្ត្រាលី។ រំពេចនោះ សត្វក្រពើ​ទឺកប្រៃមួយក្បាល បណ្ដោយប្រវែងជាជាងពីរម៉ែត្រ បានត្របាក់ក្បាលរបស់លោក ហើយព្យាយាម​លេបលោកចូលទៅ​ក្នុង​ពោះ។

«ខ្ញុំកំពុងតែហែលទឹក ប្រហែលជាចម្ងាយប្រមាណជា ៥ម៉ែត្រពីកាណូត ស្រាប់តែខ្ញុំមានអារម្មណ៍ថា ក្បាលខ្ញុំដូចជាជល់​នឹងដុំថ្ម​ដ៏រឹងមួយ បន្ទាប់មក ទើបបានខ្ញុំយល់ថា វាជាសត្វក្រពើ។» លោកហ្គាឡឺរ៉ាម បាននិយាយប្រាប់ទៅវិទ្យុយ៉ាងដូច្នេះ។

«ខ្ញុំគ្រាន់តែគិតថា បើខ្ញុំចង់រស់ ខ្ញុំត្រូវប្រយុទ្ធ ឬធ្វើអ្វីមួយអោយខ្លាំងបំផុត។ វាបានត្របាក់ក្បាលខ្ញុំពីខាងឆ្វេង និងកររបស់ខ្ញុំ ហើយចាប់ផ្ដើមព្យាយាមលេបខ្ញុំចូលទៅក្នុង។ ពេលនោះ ខ្ញុំបានដាល់តប់សត្វចង្រៃនេះ គ្រប់កន្លែងទាំងអស់ តាមតែខ្ញុំ​អាច​ធ្វើបាន។»

លោកនិយាយទាំងសើចតិចៗថា «ខ្ញុំមានសំណាងណាស់ ព្រោះប្រសិនជាក្រពើធំជាងណ្នឹងតែបន្តិច ខ្ញុំដាច់ក្បាលបាត់​ទៅ​ហើយ។» បន្ទាប់ពីនោះមក អ្នកដើរសមុទ្ររូបនេះ បានបណ្ដែតខ្លួនរហូតដល់កាណូត មុននឹងមិត្តរួមការងារជាមួយលោក បញ្ជូនលោកទៅមន្ទីរពេទ្យ។

ក្រពើទឹកប្រៃអាចមានបណ្ដោយរហូតដល់ទៅ៧ម៉ែត្រ ហើយមានទម្ងន់ដល់ទៅមួយតោន។ ក្រពើប្រភេទនេះ ច្រើនរស់​នៅ​ក្នុងតំបន់ខាងជើងនៃប្រទេសអូស្ត្រាលី ហើយក៏ជាប្រភេទដែលត្រូវបានរក្សាការពារតាំងពីឆ្នាំ១៩៧០មកដែរ។ ដោយសារ​តែហេតុនេះហើយ ទើបធ្វើអោយសត្វនេះ មានចំនួនចំនួនកាន់តែច្រើនទៅៗ ហើយចំនួនជនរងគ្រោះ ក៏បានកើនឡើង​ដូច​គ្នាអញ្ចឹងដែរ។

លោកយ័ន ហ្គាឡឺរ៉ាម បាននិយាយថា មានកុមារជាច្រើន ដែលបានចុះមកងូតទឹកនៅកន្លែង ដែលលោកបានជួប​ក្រពើ​នោះ។ លោកពន្យល់ថា «យើងត្រូវធ្វើអ្វីម្យ៉ាង ឬក៏អាចសម្លាប់វាទៅ»៕

-------------------------------------------------
ដោយ ឈូករ័ត្ន - ប៉ារីស​ ថ្ងៃទី២២ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ