វិដេអូនៃចម្រៀងទីពីររបស់ព្សាយ មិនត្រូវបានផ្សាយនៅកូរ៉េខាងត្បូង
ប្រព័ន្ធផ្សព្វផ្សាយមួយរបស់កូរ៉េខាងត្បូង បានអោយដឹងថា ខ្លួនបានបិតមិនផ្សាយក្នុងរាល់កម្មវិធីរបស់ខ្លួន នូវវីដេអូចម្រៀងចេញថ្មីរបស់ព្សាយ ដោយហេតុថាអ្នកចម្រៀងដ៏ល្បីរូបនេះ បានធ្វើអោយប៉ះពាល់ដល៉«កម្មសិទ្ធិឯកជន»។
រន្ទះជើងឥតមេត្តា របស់អ្នកចម្រៀងព្សាយ។ (រូបថតពីវីដេអូចម្រៀង«សុភាពបុរស»)
វីដេអូចម្រៀង ដែលមានចំណងជើងថា «សុភាពបុរស ឬជេនថលមែន (Gentleman)» បានបើកឆាកដំបូង ជាមួយនឹង«រន្ទះជើង» របស់ព្សាយ ដែលបានទាត់កោនពណ៌ទឹកក្រូចមួយ មានសរសេរអក្សរនៅពីលើថា «ហាមចត»។
បណ្ដាញវិទ្យុ និងទូរទស្សន៍កូរ៉េខាងត្បូងមួយឈ្មោះ ខេប៊ីអេស (KBS) បានវាយតម្លៃថា ឈុតឆាករបស់ព្សាយ នៅត្រង់កន្លែងនេះ មិនបានឆ្លើយតបទៅនឹងគោលការណ៍ផ្សព្វផ្សាយ ជាសាធារណៈរបស់ខ្លួន ដែលចង់ធានាការគោរពទៅដល់ កម្មសិទ្ធឯកជន។ អ្នកនាំពាក្យរបស់ស្ថានីយខេប៊ីអេស ចំនួនពីរនាក់បានអះអាងថា មិនមែនមានតែវីដេអូចម្រៀងរបស់ព្សាយប៉ុណ្ណោះទេ តែក៏មានវីដេអូចម្រៀងផ្សេងទៀតជាច្រើន ត្រូវបានដកចេញមិនឲ្យផ្សាយ លើកញ្ចក់ទូរទេស្សន៍របស់ខ្លួនដែរ។
ចម្រៀងរបស់ព្សាយទីពីរនេះ ទើបនឹងដាក់ផ្សាយនៅលើគេហទំព័រយូធូប កាលពីសប្ដាហ៍មុន កំពុងបន្តវេនបន្តិចម្ដងៗ ពីចម្រៀងទីមួយហ្គាំណាំស្ដាយ (Gangnam Style) របស់អ្នកចម្រៀងដដែល។ មកទល់នឹងពេលនេះ បទ«សុភាពបុរស» ទទួលបានការចុចចូលទៅមើល ច្រើនជាង១៧០លានដងរួចមកហើយ។
រីឯចម្រៀង ហ្គាំណាំស្ដាយ វិញ ទទួលបានឯកត្តកម្ម ថាជាចម្រៀងដែលទទួលបានការចុចចូលទៅមើល បានច្រើនជាងគេមកទល់នឹងបច្ចុប្បន្ននេះ រហូតជាង ១,៥ពាន់លាននាក់ ហើយវាក៏បានធ្វើអោយព្សាយ ក្លាយជាអ្នកចម្រៀងម្នាក់ ក្នុងចំណោមអ្នកចម្រៀង៣៥នាក់ ដែលល្បីល្បាញជាងគេក្នុងពិភពលោកដែរ៕
--------------------------------------------------
ដោយ ឈូករ័ត្ន - ប៉ារីស ថ្ងៃទី១៩ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ