នៅទីនោះ «មានវ័យចំណាស់»​ មិនមានន័យថា ត្រូវទៅវត្តអារាម ភាវនាធម៌ធ្វើចិត្តអោយស្ងប់នោះទេ។ ស្ត្រីវ័យចំណាស់ មកពីរដ្ឋតិចសាសម្នាក់នេះ កំពុងជាប់ឃុំនៅក្នុងពន្ធនាគារ ពីបទបានលួចលុយ អ្នកគ្មានក្រដាសស្នាមមួយរូប ហើយ​គាត់​មានបំណងចង់ស្វែងរក«ឃាតករ» ដើម្បីសម្លាប់រដ្ឋអាជ្ញាម្នាក់ និងធ្វើអោយរបួសម្នាក់ទៀត។

រូបថតដូនចាស់ ដូរ៉ូធី នៅលើកញ្ចក់ទូរទស្សនអេប៊ីស៊ី។

តើកម្មវត្ថុរបស់ស្ត្រីចំណាស់អាយុ៨៤ឆ្នាំ ឈ្មោះ ដូរ៉ូធី ខេនហ្វៀល (Dorothy Canfield) រូបនេះ ជាអ្វីទៅ? «រំខានដំណើរការ​ស៊ើបអង្កេត ប្រឆាំងនឹងរូបគាត់ ដោយប្រើយុទ្ធវិធី យ៉ាងអាក្រក់ និងហឹង្សាជាទីបំផុត» នេះជាការប្រកាស របស់លោក​រដ្ឋ​អាជ្ញាដែលដូនចាស់ប៉ងសម្លាប់រូបនោះ ដកស្រង់សម្ដីដោយទូរទស្សន៍អាមេរិក អេប៊ីស៊ី (ABC)។ កម្មវត្ថុនៃបទឧក្រិដ្ឋ​នេះ បានកើតឡើងទៀត ខណៈពេលដែលរដ្ឋអាជ្ញាចំនួនពីររូបត្រូវបានគេលួចសម្លាប់ កាលពីប៉ុន្មានខែមុននេះ ដោយក្នុងនោះ មានម្នាក់ត្រូវបានគេសម្លាប់ជាមួយនឹងភរិយា។

៥០០០ដុល្លាដើម្បីសម្លាប់

គម្រោងការរបស់ដូរ៉ូធី ខេនហ្វៀល ដែលចង់ស្វែងរក«ឃាតករ» បានផ្សាយទៅចំមនុស្សខុស ដោយអ្នកទទួលបាន​ព័ត៌មាន«ហួសហេតុ»នេះ បានអោយដំណឹងទៅអាជ្ញាធរនៃរដ្ឋតិចសាស។ ភ្នាក់ងារស៊ើបអង្កេតម្នាក់ បានចូលទៅជួប​ស្ត្រី​ជាប់ចោទជា«ចោរ»រូបនេះ ដល់ក្នុងពន្ធនាគារ ក្នុងនាមជា«ឃាតករ»បន្លំកាយ។ ដូនចាស់ បានអោយថ្លៃទៅ​«ឃាតករ​ក្លែងក្លាយ» ៥០០០ដុល្លា (៣៨០០អ៊ឺរ៉ូ) ដើម្បីសម្លាប់រដ្ឋអាជ្ញាមួយរូប។ ស្ត្រីចំណាស់រូបនេះ បានបន្ថែម​អោយ ចំនួន២៥០០​ដុល្លាថែមទៀត បើសិនជាឃាតករ អាចធ្វើអោយរបួសរដ្ឋអាជ្ញាម្នាក់ទៀត ឬក៏ធ្វើយ៉ាងណា អោយរដ្ឋអាជ្ញារូបនោះ ចូល​«គេង»ពេទ្យ រវាងពី២ទៅ៣សប្ដាហ៍។

បណ្ដាញទូរទស្សន៍បានផ្សាយការថតសម្លេងរវាងដូនចាស់ ជាមួយនឹង ភា្នក់ងារស៊ើបអង្កេត ហើយគេបានលឺភ្នាក់ងារ​បញ្ជាក់ទៅស្ត្រីជាប់ចោទរូបនេះ យ៉ាងច្បាស់ថា ស្ថានភាពនឹងអាចក្លាយជាធ្ងន់ធ្ងរ នៅក្រោយពេលឃាតកម្មនេះរួច។ តែ​ដូនចាស់ឆ្លើយមកវិញ យ៉ាងព្រងើយថា «ខ្ញុំដឹងហើយ។ ខ្ញុំចាំតែអញ្ចឹងទេតើ។»

ភ្នាក់ងារសម្ងាត់ បានធ្វើការងារ«បន្លំកាយ» របស់ខ្លួន រហូតដល់ទីបញ្ចប់ ដោយក្រោយមក បានយករូបថតជាច្រើនសន្លឹក ស្ដីពីឃាតកម្មលើលោករដ្ឋអាជ្ញា យកទៅបង្ហាញដូនចាស់ដល់ក្នុងពន្ធនាគារដដែល និងនិយាយប្រាប់គាត់ពីអ្វី ដែលគាត់​បានបញ្ជាអោយធ្វើ។ តែផ្ទុយទៅវិញ នៅចំពោះការសាកសួររបស់ភ្នាក់ងារមានសមត្ថកិច្ច នៅថ្ងៃច័ន្ទទី១៥ខែមេសា ស្ត្រី​ជាប់ចោទចំណាស់៨៤ឆ្នាំ បានទទួលស្គាល់ពីគម្រោងការរបស់គាត់ និងមិនបានបង្ហាញពីការស្ដាយក្រោយ ឬវិប្បដិសារី​អ្វីសូម្បីបន្តិចឡើយ៕

--------------------------------------------------
ដោយ ឈូករ័ត្ន - ប៉ារីស​ ថ្ងៃទី១៦ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ