តំណាងរាស្ត្រមួយរូប បានគម្រាមថា នឹង«ឈប់ទទួលទានអាហារ» ប្រសិនណាជា ក្រុមហ៊ុនប្លេប៊យ (Playboy) មកបើក​រង្គសាលរបសខ្លួន នៅក្នុងប្រទេសឥណ្ឌា។ ការគម្រាមនេះ បានកើតឡើង បើទោះជា សម្លៀកបំពាក់របៀប«ស្ត្រីទន្សាយ» ត្រូវបានប្ដូរមក យកលំនាំតាមសម្លៀកបំពាក់ប្រពៃណីជាតិ ដែលរាងខើចលើក្រោម នោះបន្តិចក៏ដោយ។

សម្លៀកបំពាក់ដែលក្រុមហ៊ុនប្លេប៊យ រៀបចំអោយស្ត្រីអ្នកបម្រើការស្លៀក។

អ្នកតំណាងរាស្ត្រឥណ្ឌារូបនោះ បានគម្រាមថា គាត់នឹងចាប់ផ្ដើមការអត់អាហារ ក្នុងករណីដែលមានការបើកទ្វារង្គសាល នៃក្រុមហ៊ុនប្លេប៊យ នៅហ្គាវ (Goa) ផ្នែកខាងត្បូងនៃប្រទេស។ លោកមៃឃើល ឡូបូ (Michael Lobo) ជាតំណាងរាស្ត្រ មក​ពីគណបក្សអភិរក្សនិយមហ៊ិនឌូ ហៅកាត់ថា BJP បានជម្ទាស់ នឹងការបើកអោយមាន ការកំសាន្តសប្បាយរបៀបនេះ នៅ​ជាប់តំបន់ឆ្នេរ កង់ដូលីម (Candolim) ដែលជាទីតាំងដំបូងគេមួយ ក្នុងចំណោមទីតាំងទាំង១០ផ្សេងទៀត ដែលក្រុមហ៊ុន​ត្រៀមបើក នៅទូទាំងប្រទេសឥណ្ឌា។

ទៅអង្គុយ ហើយទទួលទានសណ្ដែកដី

«ខ្ញុំនឹងធ្វើការជម្ទាស់ ដោយកូដកម្មអត់អាហារ ដោយមិនមានកំណត់ថ្ងៃ ប្រើសិនជាក្លិបកំសាន្ដ ត្រូវបានអនុញ្ញាត នៅ​ទីក្រុង ហ្គាវ» នេះជាការប្រកាសរបស់អ្នកតំណាងរាស្ត្រ ដោយលោក បានរំពឹងគិតថា «ប្លេប៊យ នឹងប្រែក្លាយហ្គាវ អោយ​ទៅជា​ទិសដៅមួយ នៃ​ពេស្យ៉ាកម្ម ហើយនឹងធ្វើអោយមានការព្រួយបារម្ភ ដល់វិស័យទេសចរណ៍»។ បើទោះជាស្រី​អ្នក​បម្រើ​សេវា នឹងមាន​ក្រណាត់បិតបាំងខ្លួនខ្លះៗក៏ដោយ ក៏លោកបានវាយតម្លៃថា វាច្បាស់ណាស់ដែល នឹងមិនមាន​នរណា​ម្នាក់ ចង់ក្លាយជា​សមាជិករបស់ក្លិប ដើម្បីគ្រាន់តែ«អង្គុយ ហើយទទួលទាន សណ្ដែកដី»នោះទេ។ លោកបន្ថែមថា «ពួក​គេនឹងធ្វើរឿងនេះ ដើម្បីប្រាក់របស់ពួកគេ ហើយរដ្ឋាភិបាលនឹងមិនអាច ត្រួតពិនិត្យពីអ្វីដែលបានកើតឡើង នៅខាង​ក្នុង​បានទេ»។

ប្លេប៊យ លាយស្តៃយ៍ (PB Lifestyle) ដែលក្រុមហ៊ុនធ្វើខ្លួនដ៏ត្រឹមត្រូវមួយ នៃប្លេប៊យ បានប្រកាសកាលពីខែវិច្ឆិការ ឆ្នាំ​២០១២កន្លងទៅ ពីបំណងរបស់ខ្លួន ក្នុងការបើកក្លិបកំសាន្ដ ១២០ក្លិប សណ្ឋាគារ ហាងកាហ្វេ និងហាងលក់ដូរផ្សេងទៀត នៅក្នុងប្រទេសឥណ្ឌា ក្នុងរយៈពេល១០ឆ្នាំទៅមុខ។

រដ្ឋមន្ត្រីទេសចរណ៍ លោក ឌីលីប ប៉ារូលើការ (Dilip Parulekar) បាននិយាយថា ការអនុញ្ញាតិអោយបើក​ក្លិប​កំសាន្ដ​ទីមួយ ដែលយកគំរូតាមបែបអាមេរិកាំង កំពុងតែ​ស្ថិតនៅ​ក្រោយការសិក្សានៅឡើយ។ លោកបានធានាថា «អាជ្ញាធរ នឹងមិន​អនុញ្ញាតអោយមានជាដាច់ខាត នូវភាពអាណាចារ»។

សំពត់សារីស្ដើងមើលធ្លុះ

ដើម្បីយកចិត្តអាជ្ញាធរ នៅក្នុងប្រទេសមួយ ដែលនិយមការអភិរក្សយ៉ាងខ្លាំងនោះ ប្លេប៊យ បានកាត់សម្លៀកបំពាក់ឈុតថ្មី ជំនួសឈុត «ស្ត្រីទន្សាយ» អោយទៅស្ត្រីអ្នកបម្រើការ នៅក្នុងក្លិប។ ឈុតថ្មីនោះ កាត់ជាលក្ខណៈសំពត់សារី មានជាពីរ​ផ្នែកដោយទុកផ្នែកកណ្ដាលពោះ នៅចំហរ។ ប៉ុន្តែស្ត្រីអ្នកបម្រើការ នឹងនៅតែមានពាក់«ត្រជៀក»ធំទាំងពីរ និងលក្ខណៈ​សម្គាល់ផ្សេងទៀត ដែលមាននៅរង្គសាលក្នុងប្រទេសអាមេរិក។

លោករដ្ឋមន្ត្រី បានសន្យាថា «បើពួកនាងស្លៀកសំពត់សារីស្ដើង មើលធ្លុះនោះ យើងនឹងប្រាប់ពីការជម្ទាស់របស់យើង។ បើការព្រួយបារម្ភរបស់ លោកមៃឃើល ឡូបូ មានភាពជាក់លាក់មែន រង្គសាលនេះនឹងមិនត្រូវបានអនុញ្ញាតឡើយ។»

សូមបញ្ជាក់ថា ការផ្សព្វផ្សាយ«រូបស្រាត»ទាំងឡាយ រួមមានទាំងទស្សនាវដ្ដីប្លេប៊យផង ត្រូវបានហាមឃាត់នៅឥណ្ឌា ដោយច្បាប់មួយ ដែលបានចាត់ទុក ពីការផ្សព្វផ្សាយទាំងនោះ ថាជា«ការអង្រួនអោយមានអារម្មណ៍ត្រេកត្រអាល»៕

--------------------------------------------------
ដោយ ឈូករ័ត្ន - ប៉ារីស​ ថ្ងៃទី១០ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ