Posts in ‘នយោបាយ’ Category

ហ៊ុន សែន កំណត់​​ថ្ងៃ​ទិវា​​ដាក់​បញ្ចូល​ប្រាសាទ​ខ្មែរ​ជា​បេតិកភណ្ឌ​ពិភពលោក ចំ​ថ្ងៃ​ធ្វើឃាត កែម ឡី

ហ៊ុន សែន កំណត់​​ថ្ងៃ​ទិវា​​ដាក់​បញ្ចូល​ប្រាសាទ​ខ្មែរ​ជា​បេតិកភណ្ឌ​ពិភពលោក ចំ​ថ្ងៃ​ធ្វើឃាត កែម ឡី

«អនុញ្ញាតឲ្យខ្ញុំ យកឱកាសនេះ ដើម្បីប្រកាសថា យើងនឹងយកថ្ងៃទី១០ ខែកក្កដា ជារៀងរាល់ឆ្នាំ ដើម្បីធ្វើជាទិវានៃការចងចាំ ក្នុងការដាក់បញ្ជូលសំបូរព្រៃគុក ទៅជាសម្បត្តិបេតិកភណ្ឌពិភពលោក» ប្រមុខរដ្ឋាភិបាលកម្ពុជា និងជាប្រធានគណបក្សកាន់អំណាច លោក ហ៊ុន សែន បានប្រកាសដូច្នេះ ក្នុងពិធីអបអរសាទរ ការដាក់បញ្ចូល “តំបន់ប្រាសាទសំបូរព្រៃគុក” ទៅជាសម្បត្តិបេតិកភណ្ឌពិភពលោក ដែលប្រារព្ធធ្វើ នៅពហុកីឡាដ្ឋានជាតិ​អូឡាំពិក កាលពីល្ងាច ថ្ងៃចន្ច ទី១៧ ខែកក្កដា ឆ្នាំ២០១៧ ម្សិលម៉ិញ។

តើនៅថ្ងៃទី១០ ខែកក្កដា មានរឿងកើតឡើងសំខាន់ សម្រាប់ប្រទេសកម្ពុជា រហូតដល់ថ្នាក់ តម្រូវឲ្យលោក ហ៊ុន សែន សម្រេចឡើង​យ៉ាងដូច្នេះ? 

បើតាមសំដីរបស់បុរសខ្លាំងកម្ពុជា ការជ្រើសរើសយកថ្ងៃទី១០ ខែកក្កដា បានភ្ជាប់ព្រឹត្តិការណ៍សំខាន់ តែ«មួយ»​គត់។ នោះគឺជាថ្ងៃ ដែលលោកបានបញ្ជា ទៅបណ្ដាពលរដ្ឋនៅគ្រប់ខេត្តក្រុងនានា ឲ្យធ្វើការទូងស្គ គោះត្រឡោក គោះប៉ោត... ដើម្បីជាសញ្ញានៃការអបអរសាទរ ព្រឹត្តិការណ៍នៃការដាក់បញ្ចូល តំបន់ប្រាសាទសំបូរព្រៃគុក ទៅក្នុងបញ្ជីបេតិកភណ្ឌពិភពលោក។

បញ្ជាចេញមក​តែមួយ តែវាសនាខុសគ្នា...

លោក ហ៊ុន សែន បានមានប្រសាសន៍ ពន្យល់ថា៖ «ប្រាសាទព្រះវិហារ [ត្រូវ]បានដាក់ចូល នៅ[ក្នុង]បញ្ជីបេតិកភណ្ឌពិភពលោក នៅថ្ងៃ០៧ ខែកក្កដា ឆ្នាំ២០០៨ បន្ទាប់ពីប្រាសាទអង្គរវត្ត ដែលត្រូវបានដាក់បញ្ជូល ទៅក្នុងបញ្ជីបេតិកភណ្ឌពិភលោក នៅឆ្នាំ១៩៩២។ (...) ឯតំបន់ប្រាសាទសំបូរព្រៃគុក ត្រូវបានដាក់បញ្ចូល នៅថ្ងៃទិ៨ ខែកក្កដា [ឆ្នាំ២០១៧] ហើយ សាររបស់ខ្ញុំ ត្រូវបានចេញ នៅថ្ងៃទី៩ [ខែកក្កដា ឆ្នាំ២០១៧] ឲ្យកំណត់យកម៉ោង១០ ថ្ងៃ១០ ខែកក្កដា ធ្វើការអបអរសាទរ តាមរយៈធ្វើសកម្មភាពរួប របស់ប្រជាជាតិទាំងមូល។»។

ផ្ទុយទៅវិញ ថ្ងៃទី៩ ខែកក្កដា ឆ្នាំ២០០៨ ដែលរដ្ឋាភិបាលរបស់លោក បានបញ្ជា«ដូចគ្នា» ឲ្យមានការទូងស្គ គោះត្រឡោក គោះប៉ោត... ដើម្បីអបអរសាទរ​ព្រឹត្តិការណ៍ ដាក់បញ្ចូលប្រាសាទព្រះវិហារ ទៅជាសម្បត្តិបេតិភណ្ឌ​ពិភលោក កាលពីឆ្នាំ២០០៨នោះ គ្រាន់តែជាផ្នែកមួយ នៃការពន្យល់របស់លោក ហ៊ុន សែន ប៉ុណ្ណោះ និងមិនមានវាសនា ត្រូវបានចាត់ទុក ជាថ្ងៃ«ទិវាចងចាំ» ដូចថ្ងៃទី១០ ខែកក្កដា ឆ្នាំ២០១៧ ថ្មីៗនេះទេ។

ដោយឡែក ថ្ងៃទី១០ ខែកក្កដា ឆ្នាំ២០១៧នេះ គឺជាថ្ងៃខួបមួយឆ្នាំ នៃការបាញ់សម្លាប់យ៉ាងសាហាវព្រៃផ្សៃ នៅកណ្ដាលរាជធានីភ្នំពេញ ទៅលើលោក កែម ឡី អ្នកស្រាវជ្រាវផ្នែកសង្គម និងជាអ្នកធ្វើអត្ថាធិប្បាយនយោបាយ ដ៏ល្បីឈ្មោះមួយរូប។ នៅថ្ងៃទី១០ ខែកក្កដា ឆ្នាំ២០១៧នោះ មនុស្សជាច្រើន ទាំងនៅក្នុង និងក្រៅប្រទេស បាននាំគ្នាប្រារព្ធធ្វើពិធីបុណ្យ «ខួប១ឆ្នាំ» ដើម្បីឧទ្ទិសទៅដល់វិញ្ញាណក្ខ័ន្ធ របស់លោក កែម ឡី ដែលត្រូវបានឃាតករឈាមត្រជាក់ បាញ់សម្លាប់កាលពីមួយឆ្នាំមុន នៅវេលាម៉ោងប្រមាណជាង ៩ព្រឹក ក្នុងហាងលក់ទំនិញ ស្ដាម៉ាត នៃស្ថានីយចាក់ប្រេង កាលតិច បូកគោ។

ព្រឹត្តិការណ៍ដោះដូរបញ្ហា...

យ៉ាងហោចណាស់ ព្រះសង្ឃ ប៊ុត ប៊ុនតិញ ស្ថាបនិកបណ្ដាញព្រះសង្ឃឯករាជ្យ និងធ្លាប់ជិតដិត ជាមួយលោក កែម ឡី បានដាក់ការសង្ស័យថា ការកំណត់របស់លោក ហ៊ុន សែន យកថ្ងៃទី១០ ខែកក្កដា ជាទិវាចងចាំការដាក់បញ្ចូលប្រាសាទខ្មែរ ទៅជាសម្បត្តិបេតិកភណ្ឌពិភលោក អាចជាព្រឹត្តិការណ៍ ដោះដូរបញ្ហា ឬហៅម្យ៉ាងទៀតថា ជាការបង្វែងព្រឹត្តិការណ៍។ ព្រះតេជគុណ បានស្នើឲ្យពលរដ្ឋ ដែលស្រឡាញ់ និងគោរពលោក កែម ឡី ឲ្យធ្វើការសម្រេចចិត្ត ក្នុងរឿងនេះ ជាជាងបង្វែចំណាប់អារម្មណ៍ ទៅតាមព្រឹត្តិការណ៍ថ្មីណាមួយនោះ។

ផ្ដល់បទ​សម្ភាស​ទៅឲ្យវិទ្យុអាស៊ីសេរី កាលពីយប់ម្សិលម៉ិញ ព្រះសង្ឃ ប៊ុត ប៊ុនតិញ បានមានថេរដីកាថា៖ «សូមញាតិញោម មេត្តាស្វែងយល់​អញ្ចេះទៅវិញ បើញោមស្រឡាញ់ លោក កែម ឡី គោរពលោក កែម ឡី ចង់ព្រឹត្តិការណ៍ [ដែលត្រូវបានបង្កើតឡើង] ប៉ុន្មានរយប៉ុន្មានពាន់ ក៏ញោមមិនគាំទ្រ។ គឺថាជំហររបស់ញោម គឺការពារលោក កែម ឡី។»៕

ហ៊ុន សែន ប្រកាស​សួរ​ថា តើ​នេះ​ជា​រូប​លោក​«ពិត»​ឬ​ទេ?

ហ៊ុន សែន ប្រកាស​សួរ​ថា តើ​នេះ​ជា​រូប​លោក​«ពិត»​ឬ​ទេ?

«មើលក្មួយៗ ជាយុវជន! តើខ្ញុំនេះ ជា ហ៊ុន សែន ពិតឬទេ?» លោក ហ៊ុន សែន នាយករដ្ឋមន្ត្រី - ប្រធានគណបក្សប្រជាជនកម្ពុជា បានសួរយ៉ាងដូច្នេះ ទៅកាន់អ្នកចូលរួម នៅក្នុងពិធីអបអរសាទរ នៃការដាក់បញ្ចូល តំបន់ប្រាសាទសំបូរព្រៃគុក ទៅក្នុងបញ្ជីបេតិកភណ្ឌពិភពលោក របស់អង្គការយូនេស្កូ ដែលប្រារព្ធធ្វើនៅក្នុងពហុកីឡាដ្ឋានជាតិ នៅយប់ថ្ងៃទី ១៧ ខែកក្កដានេះ។

សំនួរនេះ ដែលទទួលបានការទះដៃ យ៉ាងកងរំពង ពីសំណាក់អ្នកចូលរួម ទំនងជាលោកចង់ឆ្លើយតប ទៅកាន់ការលើកឡើង និងការលេចឮ ក្នុងប៉ុន្មានថ្ងៃចុងក្រោយនេះ ដែលអះអាងថា លោកកំពុងឈឺធ្ងន់ ហើយត្រូវបញ្ជូន ទៅព្យាបាលនៅមន្ទីរពេទ្យក្រៅប្រទេស។

ប៉ុន្តែលោក ហ៊ុន សែន បានបន្ធូរបរិយាកាសមកវិញ ដោយបានលើកឡើងថា លោកមិនបាន«ទះកំផ្លៀង»នរណាម្នាក់ទេ។ ផ្ទុយទៅវិញ លោកគ្រាន់តែចង់បំភ្លឺ ពីការលើកឡើង តាមបែប«អគតិ» របស់មនុស្សមួយចំនួន ដែលលោកអះអាងថា ពួកគេទាំងនោះ មានបំណងចង់បង្កចលាចល។

តាំងពីច្រើនថ្ងៃមកហើយ មានប្រភពមន្ត្រីក្នុងស្រុកជាច្រើន ដែលសុំមិនបញ្ចេញឈ្មោះ និងដែលត្រូវបានស្រង់សំដី ដោយក្រុមអ្នកប្រើប្រាស់បណ្ដាញសង្គម ដែលមានទីតាំង នៅក្រៅប្រទេស បានអះអាងថា អវត្តមានច្រើនសប្ដាហ៍ របស់លោក ហ៊ុន សែន បណ្ដាលមកពី​លោកនាយករដ្ឋមន្ត្រី ចេញទៅព្យាបាលជំងឺ នៅក្នុងប្រទេសសិង្ហបូរី។ ប្រភពទាំងនោះ ថែមទាំងរៀបរាប់ទៀតថា លោក ហ៊ុន សែន មានជំងឺធ្ងន់ធ្ងរ ទាក់ទងនឹងឆ្អឹងខ្នង។

នៅប៉ុន្មានថ្ងៃ ក្រោយៗមកទៀត អ្នកប្រើប្រាស់បណ្តាញសង្គម ថែមទាំងាហាក់ដូចជាកំណត់បាន នូវទីតាំងមួយចំនួន ដែលលោកនាយករដ្ឋមន្ត្រី បានទៅថតរូប បង្ហោះជារូបភាព រួមមានបន្ទប់ពិសេស «VIP» នៃហាងលក់នាឡិកាដ៏ប្រណិត ឈ្មោះ «Patek Philippe» ក្នុងផ្សារទំនើប «ION Orchard» នាប្រទេសសិង្ហបុរី។ 

អ្នកប្រើប្រាស់បណ្តាញសង្គមផ្សេងៗទៀត បានបង្ហាញនូវប្រដាប់ពាក់ម្យ៉ាង ដែលពួកគេអះអាងថា ជាឧបករណ៍ពេទ្យដែលលោក ហ៊ុន សែន ពាក់ជាប់នឹងចង្កេះគ្របពីលើដោយអាវធំ (ពេលចេញដើរ) និងដោយអាវគេង (ពេលនៅក្នុងបន្ទប់) ខណៈអ្នកផ្សេងៗទៀត បានអះអាងថា លោក ហ៊ុន សែន ត្រូវបានបញ្ជូនបន្ត ទៅទីក្រុងហុងកុង ឬប្រទេសបារាំង ដើម្បីព្យាបាលជំងឺមហារីក ឬជំងឺដាច់សរសៃឈាមខួរក្បាល។

ប្រភព​​ច្បាស់​ការ​ផ្សេងទៀត គួរ​ឲ្យ​ទុក​ចិត្ត​បាន ក៏បានអះអាងប្រាប់​​វិទ្យុអាស៊ីសេរី​ (RFA) ដែរថា លោក ហ៊ុន សែន កំពុង​សម្រាក​ព្យាបាល​របួស​ នៅ​ក្រៅ​ប្រទេស តែមិនបានបញ្ជាក់ថា ជាប្រទេសណាមួយទេ។ ប្រភព​នោះ​បាននិយាយថា ក្នុង​ពេល​លេង​វាយ​កូន​ហ្គោល​ កាល​ពី​ពេល​ថ្មីៗ​នេះ លោក ហ៊ុន សែន បាន​ដួល​បាក់​ឆ្អឹង​ត្រគាក រួច​បាន​ចេញ​ ទៅ​សម្រាក​ព្យាបាល​របួស​ នៅ​មន្ទីរពេទ្យ​នៅ​ក្រៅ​ប្រទេស និងត្រូវសម្រាក​ព្យាបាល​របួសនោះ ​រហូត​ដល់​រយៈពេល ១​ខែ៕

CNRP និយាយពីថ្ងៃបង្កើតបក្ស និងប្ដេជ្ញាយកឈ្នះក្នុងឆ្នាំ២០១៨

CNRP និយាយពីថ្ងៃបង្កើតបក្ស និងប្ដេជ្ញាយកឈ្នះក្នុងឆ្នាំ២០១៨

គណបក្ស​សង្គ្រោះជាតិ ដែលជាគណបក្សប្រឆាំងធំជាងគេនៅកម្ពុជា បានចេញសេចក្ដីថ្លែងការណ៍ ក្នុងថ្ងៃខួបលើកទី៥ នៃការបង្កើតគណបក្ស ថ្ងៃទី១៧ ខែកក្កដា ឆ្នាំ២០១២ - ឆ្នាំ២០១៧ ដោយបានរៀបរាប់ថា គណបក្សមួយនេះ បានកើតមានរូបរាង ចេញពីការរួបរួមរវាងអ្នកស្នេហាជាតិ អ្នកស្រឡាញ់យុត្តិធម៌ លិទ្ធិប្រជាធិបតេយ្យ និងសិទ្ធិសេរីភាព ស្របតាមការទាមទារ របស់ពលរដ្ឋខ្មែរ ទាំងក្នុងនិងក្រៅប្រទេស។

សេចក្ដីថ្លែងការណ៍ ដែលបានធ្លាក់មកដល់ដៃអ្នកសារព័ត៌មាន នៅមុននេះបន្តិច បានបន្តរៀបរាប់ថា តាំងពីថ្ងៃបង្កើតមក គណបក្សសង្គ្រោះជាតិបានទទួលលទ្ធផល«ល្អ»ជាបន្តបន្ទាប់ ទាំងការបោះឆ្នោតជាតិឆ្នាំ២០១៣ និងការបោះឆ្នោតជ្រើសរើសក្រុមប្រឹក្សា ឃុំសង្កាត់ ឆ្នាំ២០១៧ បើ«ទោះជាការបោះឆ្នោតទាំងពីរលើកនេះ មិនបានប្រព្រឹត្តទៅដោយសេរី ត្រឹមត្រូវ និងយុត្តិធម៌ពេញលេញក៏ដោយ»។

» សេចក្ដីថ្លែងការណ៍ទាំងស្រុង របស់គណបក្សប្រឆាំង៖

ថ្ងៃទី១៧ ខែកក្កដា ឆ្នាំ២០១២ ជាថ្ងៃដែលលោក សម រង្សុី ប្រធានគណបក្សសម រង្សុី និងលោក កឹម សុខា ប្រធានគណបក្សសិទ្ធិមនុស្ស បានចុះហត្ថលេខា លើកិច្ចព្រមព្រៀងរួបរួមគ្នា ដើម្បីបង្កើតគណបក្សសង្គ្រោះជាតិ នៅរដ្ឋធានី​ម៉ានីល ប្រទេសហ៊្វីលីពីន។

» កិច្ចព្រមព្រៀង រវាងគណៈសម រង្ស៊ី និងគណបក្សសិទ្ធិមនុស្ស ក្នុងការបង្កើតគណបក្សសង្គ្រោះជាតិ ក្នុងឆ្នាំ២០១២៖

អគ្គ​លេខា​ធិការ​បក្ស​កុម្មុយនិស្ត​យួន មក​ធ្វើ​ទស្សនកិច្ច​នៅ​កម្ពុជា

អគ្គ​លេខា​ធិការ​បក្ស​កុម្មុយនិស្ត​យួន មក​ធ្វើ​ទស្សនកិច្ច​នៅ​កម្ពុជា

តបតាមការអញ្ជើញរបស់ព្រះមហាក្សត្រកម្ពុជា លោក ង្វៀង ហ្វូជុង (Nguyen Phu Trong) អគ្គលេខាធិការគណៈកម្មាធិការមជ្ឈឹមបក្សកុម្មុយនិស្ត វៀតណាម នឹងមកធ្វើទស្សនកិច្ចនៅកម្ពុជា សម្រាប់រយៈពេល៣ថ្ងៃ និងគ្រោងចុះហត្ថលេខា នៅលើសេចក្ដីថ្លែងការណ៍រួម វៀតណាម-កម្ពុជា មួយចំនួនផង។ នេះ បើតាមសេចក្ដីប្រកាសព័ត៌មាន របស់ក្រសួងការបរទេសកម្ពុជា ដែលចេញផ្សាយ កាលពីថ្ងៃទី១៦ ខែកក្កដាម្សិលម៉ិញ។

សេចក្ដីប្រកាសព័ត៌មាននោះ បានអះអាងថា ក្រៅពីចូលក្រាបបង្គំគាល់ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី នៅក្នុង ប្រាសាទទេវាវិនិច្ឆ័យ និងចូលក្រាបបង្គំគាល់ សម្តេចព្រះមហាក្សត្រី នរោត្តម មុនិនាថ សីហនុ នៅព្រះរាជដំណាក់គន្ធបុប្ផា នៃព្រះ​បរម​រាជវាំងនោះ លោក ង្វៀង ហ្វូជុង នឹងមានគម្រោងចូលថ្វាយបង្គំ មេដឹកនាំព្រះសង្ឃ និងជួបមេដឹកនាំកម្ពុជាកំពូលៗ រួមមាន៖

- ព្រះតេជគុណ ទេព វង្ស សម្តេចព្រះមហាសង្ឃរាជ នៃគណៈមហានិកាយ
- ព្រះតេជគុណ បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ
- លោក សាយ​ ឈុំ ប្រធានព្រឹទ្ធសភា និងជាអនុប្រធានគណបក្សប្រជាជនកម្ពុជា
- លោក ហេង សំរិន ប្រធានរដ្ឋសភា និងជាប្រធានកិត្តិយស​គណបក្សប្រជាជនកម្ពុជា
- និងលោក ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា។

នៅក្រោយជំនួប ហ៊ុន សែន - ង្វៀង ហ្វូជុង នឹងមានពិធីចុះហត្ថលេខាមួយ ទៅលើសេចក្ដីថ្លែងការណ៍រួម ស្តីពីការពង្រឹងមិត្តភាព និងកិច្ចសហប្រតិបត្តិការរវាងកម្ពុជា និងវៀតណាម ដែលធ្វើឡើង​ក្រោមអធិបតី របស់មេដឹកនាំទាំងពីរ។ នៅក្នុងរបៀបវារៈចុងក្រោយ នៃដំណើរទស្សនកិច្ចនោះ លោក ង្វៀង ហ្វូជុង និងលោក សាយ ឈុំ នឹងរួមគ្នា ទៅសម្ពោធស្ដូបអនុស្សាវរីយ៍ ស្ដីពីមិត្តភាពកម្ពុជា-វៀតណាមមួយ នៅក្នុងខេត្តព្រះសីហនុ។

សេចក្ដីប្រកាសរបស់ក្រសួងការបទេសកម្ពុជា បានអះអាងទៀតថា ដំណើរទស្សនកិច្ច«ផ្លូវរដ្ឋ» របស់លោក ង្វៀង ហ្វូជុង នឹងបញ្ជាក់ពីមិត្តភាព និងកិច្ចសហប្រតិបត្តិការ «ដ៏រឹងមាំ និងយូរលង់» រវាងប្រទេសទាំងពីរ ដែលបានប្រារព្ធពិធីរំលឹកខួបទី ៥០ នៃទំនាក់ទំនងការទូតរវាងគ្នា ក្នុងឆ្នាំ២០១៧នេះ៕

សម រង្ស៊ី៖ ហ៊ុន សែន ធ្វើ​ទង្វើ​«ក្បត់​ជាតិ​៤​យ៉ាង»

សម រង្ស៊ី៖ ហ៊ុន សែន ធ្វើ​ទង្វើ​«ក្បត់​ជាតិ​៤​យ៉ាង»

សង្គ្រាមវោហាស័ព្ទ ដោយផ្លោងសំដី«ថ្លោសៗ»ដាក់គ្នា រវាងអ្នកនយោបាយខ្មែរ មិនបានថមថយកម្លាំងទេ! នៅចំពោះការចោទប្រកាន់ថា«ទណ្ឌិត» ផ្ដន្ទាទោស​ដោយ​តុលាការកម្ពុជា និងពេលខ្លះ ជា«កូនអាក្បត់ជាតិ» នៅថ្ងៃនេះ លោក សម រង្ស៊ី មេដឹកនាំប្រឆាំង ដែលកំពុងនិរទេសខ្លួន នៅឯបរទេស បានពន្យល់បកស្រាយ​មកវិញ ថាតើនរណាពិតប្រាកដា ជាអ្នកមានទោស «ជាជនក្បត់ជាតិ»។

អតីតប្រធានគណបក្សសង្គ្រោះជាតិ ដែលជាគូបដិបក្ខនយោបាយ ប្រកបដោយសក្ដានុពល ទល់នឹងលោក ហ៊ុន សែន នាយករដ្ឋមន្ត្រី - ប្រធានគណបក្ស​ប្រជាជន​កម្ពុជា បានបង្ហោះការបកស្រាយរបស់លោកដូច្នេះ នៅមុននេះបន្តិច លើបណ្ដាញសង្គម និងបានចង្អុលដោយត្រង់ៗថា គឺលោក ហ៊ុន សែន ដែលនៅកាន់អំណាច​​ចាស់វស្សានេះហើយ ជា«ជនក្បត់ជាតិ» ដែលប្រព្រឹត្តិនូវទង្វើក្បត់ជាតិ ចំនួន៤យ៉ាង។

លោក សម  រង្ស៊ី បានពន្យល់ថា «ជនក្បត់ជាតិ ជាអ្នកដែលបានប្រព្រឹត្តិទង្វើណាមួយ» ក្នុងចំណោមទង្វើទាំងបួន ដែលមេដឹកនាំប្រឆាំងរូបនេះ ពន្យល់រៀបរាប់ ក្នុងសេចក្ដីដើមទាំងស្រុង ដូចតទៅ៖ 

«១- បម្រើផលប្រយោជន៍បរទេស ហើយធ្វើឲ្យប្រទេសរបស់ខ្លួន បាត់បង់ឯករាជ្យភាព និងអធិបតេយ្យភាពជាតិ (ដូចជាចំពោះប្រទេស​កម្ពុជា ក្រោយពីឆ្នាំ ១៩៧៩)»
«២- កាត់ទឹកដីប្រទេសរបស់ខ្លួន ឲ្យទៅប្រទេសជិតខាង (ដូចជាករណីទឹកដីប្រទេសកម្ពុជា ដែលត្រូវបាត់បង់ ដោយសារសន្ធិសញ្ញាព្រំដែន ក្នុងទសវត្សរ៍ឆ្នាំ ១៩៨០)»
«៣- សម្លាប់ប្រជារាស្ត្រខ្លួនឯង ក្នុងទ្រង់ទ្រាយធំ (ដូចជាការអនុវត្តន៍ផែនការ ក៥ ដែលបង្ខំមនុស្សរាប់មុឺននាក់ ឲ្យទៅស្លាប់ ក្នុងទសវត្សរ៍ឆ្នាំ ១៩៨០
«៤- បំផ្លាញទ្រព្យសម្បត្តិជាតិ ដើម្បីបម្រើផលប្រយោជន៍ខ្លួន គ្រួសារខ្លួន និងបក្ខពួកខ្លួន (ដូចជាការកាប់បំផ្លាញព្រៃឈើ ក្នុងរយៈពេល ២០ ឆ្នាំចុងក្រោយនេះ)»។

មេដឹកនាំប្រឆាំង បានសរសេរបញ្ជាក់ថា៖ «លោក ហ៊ុន សែន បានប្រព្រឹត្តទង្វើទាំង ៤ ខាងលើនេះ»។ ហើយលោកបានសន្យាថា លោកនឹងត្រឡប់មក«លាតត្រដាង» ពីប្រវត្តរបស់ «សឺង ង៉ុកមិញ (ឈ្មោះដើម Phạm Văn Hua) ហៅអាចារ្យមៀន (អាចារ្យក្លែងក្លាយ) ដែលជាបិតាគណបក្សប្រជាជនកម្ពុជា ហើយដែលជាជនក្បត់ជាតិ មុនគេបង្អស់ ចាប់ពីឆ្នាំ ១៩៥១ ដែលជាឆ្នាំកំណើតរបស់ គណបក្សប្រជាជនកម្ពុជា»។

កាលពីចុងខែកន្លងទៅ លោក ហ៊ុន សែន ដែលនៅអង្គុយក្នុងតំណែង ជានាយករដ្ឋមន្ត្រី តាំងពីជាង៣ទសវត្សន៍មកនោះ បានប្រតិកម្មទៅនឹង​ការបកស្រាយ​ទាំង​ឡាយណា របស់លោក សម រង្ស៊ី ពីប្រវត្តិសាស្ត្រ«ទំនើប» របស់ប្រទេសកម្ពុជា ជាពិសេសប្រវត្តិ​ របស់គណបក្សប្រជាជនកម្ពុជា​របស់លោក ដោយបានអះអាងថា អ្នកសរសេរប្រវត្តិសាស្ត្រ គឺជាអ្នកឈ្នះ ដែលសំដៅដល់រូបលោក គណបក្សរបស់លោក។ លោក ហ៊ុន សែន បានអះអាងថា រូបលោក និងគណបក្សប្រជាជនកម្ពុជា ចាំបាច់ត្រូវ«ឈ្នះ»​ជានិរន្តរ ដើម្បីសរសេរប្រវត្តិសាស្ត្ររបស់ប្រទេស​កម្ពុជា ទៅតាមអ្វី ដែលលោកហៅថា ដើម្បីការពារគណបក្សរបស់លោក ការពាររបបរាជានិយម និងព្រះមហាក្សត្រ។

«អាជនក្បត់ជាតិ...»

លោកនាយករដ្ឋមន្ត្រី​បានយកឧទាហរណ៍ ក្នុងសម័យសង្គមរាស្ត្រនិយម មកពន្យល់ថា៖ «រយៈពេលពីឆ្នាំ១៩៥៣ ដល់ឆ្នាំ១៩៧០ អ្នកសរសេរប្រវត្តិសាស្ត្រ គឺសង្គមរាស្ត្រនិយម។ ពេលនោះ សម្ដេចព្រះ នរោត្ដម សីហនុ ព្រះអង្គគឺជាព្រះបីតាជាតិ។ ប៉ុន្តែខុសត្រូវ តែមួយថ្ងៃប៉ុណ្ណោះ ថ្ងៃ១៨ ខែមីនា ឆ្នាំ១៩៧០ លុន ណុល ធ្វើរដ្ឋប្រហារបានសម្រេច គេក្លាយជាអ្នកឈ្នះ។ គេក៏ចាប់ផ្ដើមសរសេរប្រវត្តិសាស្ត្រភ្លាម ថាសម្ដេចព្រះ នរោត្ដម សីហនុ គឺជាជនក្បត់ជាតិ ហើយ លុន ណុល គឺជាអ្នកស្នេហាជាតិ។»។

» អត្ថបទទាក់ទង៖ ហ៊ុន សែន ថាប្រវត្តិសាស្ត្រ​មិន​មែន​«អា​ជន​ក្បត់​ជាតិ សម សារី»​ជា​អ្នក​សរសេរ!

លោក ហ៊ុន សែន បានមានប្រសាសន៍​ថា៖ «ចំណុចទាំងនេះ ចង្អុលបង្ហាញឲ្យឃើញថា មានតែអ្នកឈ្នះទេ ទើបមានសិទ្ធិសរសេរប្រវត្តិសាស្ត្រ បើសិនទុកឲ្យអ្នកដទៃ ទទួលជោគជ័យនេះ ច្បាស់ជាអាជនក្បត់ជាតិ សម សារី ស៊ឺង ងុកថាញ់ សឹម វ៉ា វានឹងក្លាយជារដ្ឋបុរស ជាវីរបុរសជាតិ ហើយសម្ដេចព្រះ នរោត្ដម សីហនុ ដែលជាព្រះបីតាជាតិរបស់យើងទាំងអស់គ្នា នឹងក្លាយទៅជាជនក្បត់ជាតិសារជាថ្មីម្ដងទៀត»៕