Posts in ‘ប្រដាល់’ Category

ផាកហ្គីអៅ អាច​ជាប់​ពន្ធនាគារ នៅ​អាមេរិក!

ផាកហ្គីអៅ អាច​ជាប់​ពន្ធនាគារ នៅ​អាមេរិក!

នៅសហរដ្ឋអាមេរិក គេមិនត្រូវយកប្រព័ន្ធយុត្តិធម៌ របស់ប្រទេសនេះ មកលេងសើចនោះទេ ជាពិសេសជា​មួយពាក្យ​«មុសា» ដែលបានធ្វើឡើង ក្នុងគោលបំណងដ៏ខ្មៅកខ្វក់ ចង់បង្វិលព្រឹត្តិការណ៍ មានលក្ខណៈ«ផ្លូវការ»ណាមួយ។ ហើយ​ក៏​ដោយ​សារ តែពាក្យ«កុហក» ដែលបានធ្វើបន្ទាប់ពី «ការប្រកួតប្រចាំសតវត្ស» កាលពីចុងសប្ដាហ៍មុន ទល់នឹង ផ្លយ ម៉ាយវេដ័រ កីឡាករ​ប្រដាល់មិនដែលចាញ់ របស់អាមេរិកនោះ ទើបកីឡាករជាតិហ្វីលីពីន ម៉ានី ផាកហ្គីអៅ អាចនឹងជាប់​ទោស ពី១ទៅ​៤ឆ្នាំ ក្នុងពន្ធនាគារ និងត្រូវបង់ពិន័យជាប្រាក់ ប្រមាណជា ៥០០០ដុល្លា នោះថែមទៀត។ នេះបើតាម​សារព័ត៌មាន​អង់គ្លេស «The Telegraph» ដែលបានរាយការណ៍ ពីករណីនេះ កាលពីប៉ុន្មានម៉ោងមុខ។

ជាការពិត កីឡាករប្រដាល់ ផាកហ្គីអៅ មានរបួសនៅត្រង់ស្មារ នៅក្នុងអំឡុងកាលកន្លងមក។ ប៉ុន្តែបន្ទាប់ពីការប្រកួត បាន​មួយថ្ងៃ កីឡាក បានថ្លែងអះអាងថា ការឈឺចុកចាប់ នៅលត្រង់ស្មារខាងស្ដាំនេះ បានរើឡើងចាប់ពីទឹកទី៣ ដែល​ជា​ហេតុ​ធ្វើឲ្យខ្លួន វាយចេញមិនបានច្រើន និងមិនមានប្រសិទ្ធិភាព រហូតដល់ខ្លួនបានចាញ់ កីឡាករអាមេរិក ម៉ាយវេដ័រ ដោយ​ពិន្ទុ។ កីឡាករបញ្ជាក់ថា នឹងត្រូវធ្វើការវះកាត់ រួចត្រូវធ្វើការសម្រាក ពីសៃវៀន ជាច្រើនខែនោះថែមទៀត។

ប៉ុន្តែរឿងដែលបង្កជាបញ្ហា ដល់កីឡាករជាតិហ្វីលីពីន គឺដោយសារកីឡាករ បានឆ្លើយ«ទេ» តបនឹងការសាកសួរ របស់​គណកម្មការប្រដាល់ ណឺវ៉ាដា (Nevada Athletic Commission) ដែលជាស្ថាប័នមានសមត្ថកិច្ច គ្រប់គ្រងលើ​​ការប្រកួត​កីឡាប្រដាល់ នៅក្នុងរដ្ឋ ដែលមានព្រឹត្តិការណ៍នេះ។ សំនួរនោះ សួរថា៖ «តើអ្នកឯងបានរង ការឈឺចុកចាប់ ពីរបួសស្មារ គួយដៃ ឬដៃ ដែលចាំបាច់ ត្រូវធ្វើការត្រួតពិនិត្យឬទេ?»

ចម្លើយបដិសេធរបស់ ផាកហ្គីអៅ បានធ្វើឲ្យកីឡាករ មានទោសពីបទ«កុហក» ដើម្បីបង្វិល លទ្ធផលនៃព្រឹត្តិការណ៍ ជា​«ផ្លូវការ»មួយ ដែលនៅសហរដ្ឋអាមេរិក ជាទោសកំហុស អាចជាប់ពន្ធនគារ។ នៅក្នុងពេលនេះ អាជ្ញាធរ ណឺវ៉ាដា បាន​បើក​ការស៊ើបអង្កេតមួយឡើងហើយ ដើម្បីពិនិត្យមើលថា សម្ដីទាំងអស់ កើតឡើងយ៉ាងដូចម្ដេច និង​នៅ​ពេល​ណា៕

បែក​ធ្លាយ​ថា ម៉ានី ផាកហ្គីអៅ មាន​របួស​លើ​ស្មារ​ខាង​ស្ដាំ មុន​ប្រកួត

បែក​ធ្លាយ​ថា ម៉ានី ផាកហ្គីអៅ មាន​របួស​លើ​ស្មារ​ខាង​ស្ដាំ មុន​ប្រកួត

ប្រភពជាច្រើន នៅជុំវិញ កីឡាការមកពីប្រទេសអាស៊ី ម៉ានី ផាកហ្គីអៅ បានថ្លែងឲ្យបញ្ជាក់ឲ្យដឹងថា បន្ទាប់ពីបានសម្រាក អស់រយៈពេល ពីរសប្ដាហ៍ និងទទួលការចាក់ថ្នាំ ប្រឆាំងការឈឺចាប់ ជាប្រចាំ (ថ្នាំនេះ ត្រូវមានការយល់ព្រម ពីទីភ្នាក់ងារ អាមេរិក) នោះមក ស្ថានភាពស្មារខាងស្ដាំង របស់កីឡាករ «Pacman» មិនមានសភាពប្រសើរឡើងនោះទេ។ ប៉ុន្តែ បើ​ទោះ​ជាបែបនេះក៏ដោយ ក៏កីឡាករយើង នៅតែចូលទៅទីកន្លែងហ្វឹកហាត់ ដើម្បីរៀបចំចូលប្រកួត ជាមួយ ផ្លាយ ម៉ាយវេដ័រ។

ហេតុការណ៍មួយទៀត ដែលសំខាន់ ហើយដែលត្រូវបាន គណៈកម្មការប្រដាល់ នៅ ណេវ៉ាដា (Nevada) ដឹងលឺដែរនោះ គឺការឈឺចាប់ បានកើតឡើង នៅប៉ុន្មានម៉ោង មុនការប្រកួតចាប់ផ្ដើម នៅក្រុង ឡាសវេហ្គាស។ ផាកហ្គីអៅ បានសុំ​ការ​អនុញ្ញាត ដើម្បីចាក់ថ្នាំបំបាក់ការឈឺចាប់នេះ នៅពេលមកដល់មហាសាល «MGM Grand Arena» នៃការប្រកួត ប៉ុន្តែ​ត្រូវ​បាន​គណៈកម្មការខាងលើ បដិសេធ។

លោក បប់ អេរាម (Bob Arum) អ្នកឧបត្ថម្ភ និងលោក ហ្វ្រេឌី រ័ឆ (Freddie Roach) គ្រូបង្ហាត់ រួមនឹងកីឡាករ ផាកហ្គីអៅ ខ្លួនឯងផង មិនបានគិតដល់ ពីការលប់ចោល នូវការប្រកួត «ប្រដាល់ប្រចាំសតវត្សន៍» នេះទេ។ ការលប់ចោល​ការ​​ប្រកួត​ណាមួយ អាចប៉ះពាល់ទៅដល់ទឹកប្រាក់ រាប់លានដុល្លា ដែលមិនអាចឲ្យពួកគេ ដកថយដូច្នេះឡើយ។ លោក អេរាម បាន​ថ្លែងថា៖ «យើងបានជឿជាក់ថា ការព្យាបាលដែលយើងបានធ្វើ ទៅលើស្មារខាងស្តាំរបស់ ផាកហ្គីអៅ នៅ​ក្នុង​រយៈកាល នៃការ​សម្រាក​កន្លងមក វាគ្រប់គ្រាន់ដើម្បីឲ្យ ផាកហ្គីអៅ អាចប្រើដៃស្ដាំបាន ក្នុងការប្រកួត»។

ប្រសិនបើរបួសនេះ បានរើឡើងវិញមែន កីឡាករជាតិហ្វីលីពីនរួបនេះ នឹងត្រូវបានសម្រាកពីសៃវៀនប្រដាល់ យ៉ាងហោច​៩ខែ។ ការប្រកួតកាលពីថ្ងៃសៅរ៍ ក៏ត្រូវបានកីឡាករ ផាកហ្គីអៅ ក៏បានពន្យល់ នៅក្នុងសន្និសីទសារព័ត៌មាន​ដែរថា ខ្លួន​ពិបាកនឹងប្រើដៃស្ដាំ ចាប់ពីទឹកទី៣មក។ ហេតុដូច្នេះហើយ ទើបនឹងលទ្ធផលនៃការប្រកួត បានបង្ហាញពី​ប្រសិទ្ធភាព នៃ​ការ​វាយ​ចេញ ដែលមានប្រសិទ្ធិភាព មានតួលេខត្រឹមតែ ៩% (១៨ដៃមានប្រសិទ្ធិភាព ក្នុងចំណោម១៩៣ដៃ វ៉ៃចេញ) ប៉ុណ្ណោះ។

ផាកហ្គីអៅ បានថ្លែងថា៖ «មានកណ្ដាប់ដៃជាច្រើន ដែលខ្ញុំមិនអាចប្រើចេញ ដើម្បីវាយគូប្រកួត។ ប៉ុន្តែខ្ញុំបានធ្វើ ពីអ្វី​ដែល​ខ្ញុំ​ត្រូវ​ធ្វើ។ ហើយខ្ញុំមិនចង់ប្រើប្រាស់ ករណីរបួសនេះ មកបិទបាំង បរាជ័យរបស់ខ្ញុំនោះឡើយ។» កីឡាករបាននិយាយថា៖ «ការរបួស នៅក្នុងកីឡា ជារឿងធម្មតា»។

ការលើកឡើង របស់កីឡាករ ផាកហ្គីអៅ មិនត្រូវបានស្វាគមន៍ ពីសំណាក់កីឡាករ ផ្លយ វ៉ាយវេដ័រ ឡើយ ដោយកីឡាករ​អាមេរិក​រូបនេះ នៅតែយល់ថា នេះជាភាសា«លេស» ដើម្បីជួយបន្ធូរបន្ទុក នៃបរាជ័យ របស់កីឡាកជាតិហ្វីលីពីន។ កីឡាករ ម៉ាយវេដ័រ បានថ្លែងឡើងថា៖ «គ្រប់កីឡាករប្រដាល់ទាំងអស់ សុទ្ធតែត្រូវឡើងវ៉ៃ ជាមួយរបួស។ ខ្ញុំក៏អញ្ចឹងដែរ ខ្ញុំ​មាន​ការ​ឈឺចុកចាប់ នៅត្រង់បាតដៃ និងបាតដៃទាំងពីរ។ ប៉ុន្តែខ្ញុំដឹងថា ខ្ញុំត្រូវតែឡើង ទៅលើសៃវៀន។»

ម៉ាយវេដ័រ ឆ្លៀត​ស៊ក​សៀត​ឲ្យ ផាកហ្គីអៅ ថា៖ «ខ្ញុំមិនដឹងថា តើ ផាកហ្គីអៅ នឹងនិយាយពាក្យអស់នេះឬទេ បើសិនជា​បាន​ឈ្នះ​វិញ​នោះ?»៕

តួ​លេខ​សំខាន់ៗ នៃ​ប្រដាល់​ប្រចាំ​សតវត្សន៍ ផាកហ្គីអៅ និង​ម៉ាយវេដ័រ

តួ​លេខ​សំខាន់ៗ នៃ​ប្រដាល់​ប្រចាំ​សតវត្សន៍ ផាកហ្គីអៅ និង​ម៉ាយវេដ័រ

រាប់ទាំងការប្រកួត លើកនេះមួយទៀត កំពូលអ្នកប្រដាល់ អាយុ៣៨ឆ្នាំ បានចូលរួមការប្រកួត ចំនួន៤៨ដង ដែលមិន​ដែល​ចាញ់សូម្បីតែម្ដង និងបានផ្ដួលគូប្រកួតឲ្យសន្លប់ ឬបោះបង់ការប្រកួត បាន២៦ដង។ ចង់ដឹងថា តើការប្រកួត«ប្រដាល់​ប្រចាំ​សតវត្សន៍» ដែលបានធ្វើកាលពីយប់ថ្ងៃអាទិត្យ មានអ្វីខ្លះទៅបើគិតជាតួលេខ ទស្សនាវដ្ដីមនោរម្យ.អាំងហ្វូ សូម​ត្រឡប់​មកជម្រាបជូនវិញ ដូចខាងក្រោម៖

០៖ ជាចំនួនបរាជ័យ នៃការប្រកួតទាំង៤៨ ដែលកីឡាករ ម៉ាយវេដ័រ មិនដែលស្គាល់ តាំងពីឆ្នាំ១៩៩៦ មកទល់​នឹង​ម៉ោង​នេះ។

១,៦៨៖ ជាកំពស់គិតជាម៉ែត្រ របស់កីឡារហ្វីលីពីន ផាកហ្គីអៅ ដែលនៅទាបជាង ៥សង់ទីម៉ែត្រ ពីកីឡាករអាមេរិក ម៉ាយវេដ័រ។

៥​៖ ជាចំនួនកីឡាករដូចគ្នា ដែលកីឡាករទាំងពីរ (ម៉ាយវេដ័រ និង ផាកហ្គីអៅ) ធ្លាប់វាយបំបាក់ យកឈ្នះ ក្នុងពេលកន្លង​មក។ កីឡាករទាំងប្រាំរូបនេះ រួមមាន៖ Oscar de la Hoya, Ricky Hatton, Shane Mosley, Miguel Cotto និង Juan Manuel Marquez។

៨៣៖ ជាអាយុគិតជាឆ្នាំ របស់លោក បប់ អារាម (Bob Arum) ដែលជាអ្នកជួយចូកជួយចែវ ឲ្យកីឡាករហ្វីលីពីន បាន​មក​ជួបវ៉ៃ ជាមួយ ម៉ាយវេដ័រ។

១៦ ៨០០៖ ជាចំនួនអ្នកចូលទស្សនា នៅក្នុងមហាសាល MGM Grand Garden Arena។ សាល​នេះ ស្ថិត​ក្នុង​សណ្ឋាគារ កាស៊ីណូ MGM Grand ហើយធ្លាប់ទទួល ការប្រកួត «ប្រដាល់ប្រចាំសតវត្សន៍» ជាច្រើន​ដង រវាង ម៉ៃ ថៃសុន (Mike Tyson) និង អេវេឌើ ហូលីហ្វៀល (Evander Holyfield) ព្រមទាំងធ្លាប់ទទួល ការប្រគុំតន្ត្រីធំៗ របស់​​អ្នក​ចម្រៀង Elton John ឬ Britney Spears ជាដើម។

៥,៦លាន៖ ជាចំនួនទឹកប្រាក់ចំណាយ ជាដុល្លារ របស់ក្រុមហ៊ុន​ស្រាបៀរ​មួយ របស់ប្រទេសម៉ិចស៊ិក ដែលចង់​ឲ្យ​ផ្លាក​សញ្ញា ផ្សាយពាណិជ្ជកម្មរបស់ខ្លួន អាចបិតជាប់ និងមើលឃើញ នៅលើសៃវៀន​ប្រកួត។

៣០០លាន៖ ជាការរកចំណូលបាន ជាដុល្លា របស់ HBO និង Showtime ដែលទទួលសិទ្ធិក្នុងការផ្សាយផ្ដាច់មុខ ពីការ​ប្រកួត «ប្រដាល់ប្រចាំសតវត្សន៍»នេះ។ សូមបញ្ជាក់ដែរថា ដើម្បីអាចទស្សនា ការប្រកួតបាន ប្រជាជនអាមេរិក ត្រូវ​ជាវ​ថ្លៃភ្ជាប់រូបភាព ចំនួន១០០ដុល្លា ក្នុងទូរទស្សន៍មួយ។

ហើយខាងក្រោមនេះ ជាតួលេខ ដែលកីឡាករទាំងពីរ បានវ៉ៃចេញ និងកណ្ដាប់ដៃណាមួយ ដែលរាប់ជាបានការ ហើយ​ចំគោលដៅ៖

ម៉ាយវេដ័រ បង្ក្រាប ផាកហ្គីអៅ ដោយ​ពិន្ទុ

ម៉ាយវេដ័រ បង្ក្រាប ផាកហ្គីអៅ ដោយ​ពិន្ទុ

លទ្ធផល ដែលបានចេញមក និងប្រកាស ដោយអាជ្ញាកណ្ដាល មិនមានអ្វីប្លែក គួរឲ្យភ្ញាក់ផ្អើលនោះទេ ដែលកំពូល​អ្នក​ប្រដាល់ អាមេរិក ផ្លយ ម៉ាយវេដ័រ ទទួលជ័យជំនះ លើគូប្រកួតរបស់ខ្លួន ម៉ានី ផាកហ្គីអៅ ដែលជាកីឡាករ មកពីអាស៊ី​អាគ្នេយ៍ នៅក្នុងការប្រកួត «ប្រដាល់ប្រចាំសត​វត្សន៍» កាលពីយប់ថ្ងៃទី២ ខែឧសភា ឆ្នាំ២០១៥ នាទីក្រុង ឡាសវេហ្គាស សហរដ្ឋអាមេរិក។ ប៉ុន្តែគេក៏ត្រូវនិយាយដែរថា បើទោះជា ផាកហ្គីអៅ មានឱកាសច្រើន ក្នុងការវាយផ្តួលគូប្រកួត នៅរៀង​រាល់ចុងទឹកក៏ដោយ ប៉ុន្តែកីឡាករ មកពីប្រទេសហ្វីលីពីនរូបនេះ នៅតែមិនអាចរកចំណុចខ្សោយ របស់ផាកហ្គីអៅ ទាំង​១២ទឹក និងជាពិសេស មិនអាចបើក ការវាយប្រហារ ឲ្យបានសន្ធាប់ តាំងពីដើមទឹកមក។

សម្រាប់ក្រុមអ្នកតាមដាន ការប្រកួតប្រដាល់ ពួកគេមិនបានចាត់ទុក ជំនួប«ប្រដាល់ប្រចាំសតវត្សន៍» រវាង ម៉ាយវេដ័រ និង ផាកហ្គីអៅ ថាជាការ​ប្រយុទ្ធមួយ ប្រកបដោយភាពរំជួលចិត្តនោះទេ។ ប៉ុន្តែវាជាការប្រយុទ្ធ ដែលបានប្រើ«យុទ្ធសាស្ត្រ»​ដើម្បីឈ្នះ របស់កីឡាករស្បែកខ្មៅ អាមេរិក អាយុ៣៨ឆ្នាំ។ កីឡាកររូបនេះ ដឹងខ្លួនមិនអាចទប់កណ្ដាប់ដៃ របស់ ផាកហ្គីអៅ អាយុប្អូនខ្លួន២ឆ្នាំ ឲ្យបានលើសពី៣នាទី ដែលជារយៈពេល នៃទឹកនីមួយៗនោះឡើយ។ ហើយជានិច្ចជាកាល ផាកហ្គីអៅ តែងមានប្រៀប នៅអំឡុងវិនាទីចុងក្រោយ នៅក្នុងទឹក។

ចំណុចដែលសំខាន់បំផុតនោះ គឺ ម៉ាយវេដ័រ ដែលមានរហស្សនាម «ប្រុសស្អាត (Pretty boy)» បានប្រើកណ្ដាប់ដៃ របស់​ខ្លួន វាយចេញច្រើន នៅពេលដើមទឹក និងគ្រប់គ្រងស្ថានការណ៍បានរហូត ព្រោះ ម៉ាយវេដ័រ ដឹងខ្លួនថា បានចាញ់ប្រៀប នៅពេល ផាកហ្គីអៅ បើកការវាយប្រហារ នាពេលចុងទឹក។ យុទ្ធវិធីនេះ បានផ្ដល់ផ្លែផ្កាឲ្យ ម៉ាយវេដ័រ រហូតដល់ពេល​ចប់​ប្រកួត និងទីបំផុតទៅ កីឡាករអាមេរិក បានទទួលនូវតួលេខ នៃការប្រកួតមិនដែលចាញ់ បានមួយប្រកួតទៀត។

ប្រសិនបើបណ្ដាជនអាមេរិក គិតថានេះជា«ប្រដាល់ប្រចាំសតវត្សន៍» ហើយវាពិតជាការប្រកួតមួយ ដ៏អស្ចារ្យសម្រាប់ពួក​គេនោះ សម្រាប់បណ្ដាជនហ្វីលីពីន ឯណោះវិញ ក៏បានចាត់ទុកការប្រកួតនេះ ថាមានសារសំខាន់ខ្លាំងបំផុតដែរ។ នៅ​ក្នុង​ប្រទេសហ្វីលីពីន លោក ម៉ានី ផាកហ្គីអៅ រហស្សនាម «PacMan» ដែលបានជាប់ជាតំណាងរាស្ត្រ កាលពី​ឆ្នាំ​២០១០​កន្លង​មកនោះ កំពុងក្លាយខ្លួន ជាមហាបុរសដ៏អស្ចារ្យម្នាក់ សម្រាប់ប្រវត្តិសាស្ត្ររបស់ប្រទេស។ រីឯបរាជ័យ ដែល​បាន​ចេញ ពី​ការ​ប្រកួត«ប្រដាល់ប្រចាំសតវត្សន៍» នៃមហាបុរសរបស់ពួកគេ មិនត្រូវបានបណ្ដាជនហ្វីលីពីន យល់ស្របទេ និង​បាន​វាយ​​តម្លៃថា ជាលទ្ធផលដ៏អយុត្តិធម៌នោះផងទៀត។ ពួកគេសង្ឃឹមថា នឹងមានការប្រកួតសងសឹកវិញ នៅក្នុង​ឱកាស​លើក​ក្រោយ ដើម្បីបង្ហាញពីសមត្ថភាពពិត នៃ«PacMan»៕

ប្រដាល់​ប្រចាំ​សតវត្សន៍​រវាង ម៉ានី ផាកហ្គីអៅ និង ផ្លយ ម៉ាយវេឌ័រ (Live)

ប្រដាល់​ប្រចាំ​សតវត្សន៍​រវាង ម៉ានី ផាកហ្គីអៅ និង ផ្លយ ម៉ាយវេឌ័រ (Live)

ទស្សនាការប្រកួតដោយផ្ទាល់បាន នៅទីនេះ ប៉ុន្តែអាចជួប នឹងភាពរអាក់រអួល ព្រោះមានអ្នកចូលមើលច្រើន ... (សូមចុច REPLAY or PAGE REFRAISH នៅពេលគាំង)។