Posts in ‘សោភ័ណភាព’ Category

ជាប់​ជា​បវរកញ្ញា​ចក្រវាឡ​ត្រឹម​តែ​៥នាទី នាង​ប្រតិកម្ម​ជា​លើក​ទី១

ជាប់​ជា​បវរកញ្ញា​ចក្រវាឡ​ត្រឹម​តែ​៥នាទី នាង​ប្រតិកម្ម​ជា​លើក​ទី១

កាលពីថ្ងៃអាទិត្យកន្លងមក នៅក្នុងក្រុងឡាសវេហ្គាស សហរដ្ឋអាមេរិក ហេតុការណ៍ដ៏មិនគួរឲ្យជឿមួយ បាន​កើតឡើង ដើម្បីចូលរួមបញ្ចប់ឆ្នាំ២០១៥។ នោះគឺលោក ស្ទេវ ហាវៃ (Steve Harvey) ពិធីកររបស់កម្មវិធី «ប្រឡង​បវរកញ្ញាចក្រវាឡ ឆ្នាំ២០១៥» បានច្រឡំប្រកាសលទ្ធផលផ្ដាច់ព្រ័ត្រ ថាអ្នកដែលជាប់​ជាបវរកញ្ញា​ចក្រវាឡ  ជាបវរកញ្ញា របស់ប្រទេសកូឡំប៊ី នាង «Ariadna Gutierrez Arevalo» មុននឹងចេញមកកែតម្រូវ នៅ​៥នាទីក្រោយ ថាអ្នកដែលជាប់ពិតប្រាកដ ជាបវរកញ្ញារបស់ប្រទេសហ្វីលីពីន នាង «Pia Alonzo Wurtzbach» ទៅវិញ។ ការប្រកាសច្រឡំ ដែលធ្វើឲ្យមានការភ្ញាក់ផ្អើល សឹងមួយចំហៀងផែនដី ព្រោះ​មាន​មនុស្ស​ជាច្រើន​​លាន​នាក់ បានទស្សនាកម្មវិធីប្រកួតប្រជែងនេះ ដោយផ្ទាល់ពីក្រុងឡាសវេហ្គាស។

បន្ទាប់ពីប្រព្រឹត្តិកំហុសរួច ពិធីករអា​មេរិក ដែលមានដើមកំណើតពីប្រទេសនីហ្សេ បានឡើងមកកាន់ឆាកវិញ ហើយបានប្រកាសសុំទោស ពីបញ្ហានេះមុននឹងថ្លែងបញ្ជាក់ថា៖ «បវរកញ្ញាអមទីមួយ គឺបវរកញ្ញាមក​ពី​ប្រទេស​កូឡំប៊ី។ ឯបវរកញ្ញាចក្រវាឡឆ្នាំ២០១៥ បានទៅលើបវរកញ្ញា មកពីប្រទេសហ្វីលីពីន។»

សូម​ទស្សនាវីដេអូខាងក្រោម ដែលផ្សាយជាផ្លូវការ ពីកម្មវិធី «ប្រឡងបវរកញ្ញាចក្រវាឡ ឆ្នាំ២០១៥» នៅ​ពេល​ប្រកាសលទ្ធផលចុងក្រោយ គេឃើញបវរកញ្ញាកូឡំប៊ី បានពាក់ខ្សែឆៀង (ដោយច្រឡំ) នៃបវរកញ្ញា​ចក្រវាឡ​រួចហើយ រីឯម្កុដរបស់បវរកញ្ញាចក្រវាឡវិញ ក៏ទើបត្រូវបានបវរកញ្ញាឆ្នាំមុន (ដែលមកពីប្រទេស​កូឡំប៊ី​ដូច​គ្នា) ដោះពីក្បាលរបស់បវរកញ្ញាកូឡំប៊ី ហើយយកមកបំពាក់ឲ្យបវរកញ្ញាហ្វីលីពីនវិញដែរ។

នៅចំពោះហេតុការណ៍ ដ៏មិនគួរឲ្យជឿបាន បវរកញ្ញាកូឡំប៊ីមិនបានប្រតិកម្មអ្វី ជាសាធារណៈ​ភ្លាមៗ​ឡើយ។ រហូត​លុះត្រា​មក​ដល់​ថ្ងៃពុធ​ទី២៣ ខែធ្នូនេះ ទើបបវរកញ្ញាកូឡំប៊ី បានចេញមកសរសេរ នៅលើទំព័រផ្លូវការ​របស់​ខ្លួន ក្នុង​បណ្ដាញ​សង្គម អ៊ីនស្ថាហ្គ្រាម (Instagram) ដោយអះអាងថា បន្ទាប់ពីខ្យល់ព្យុះ គឺភាពស្ងប់​ស្ងាត់​​​បាន​​ត្រឡប់​មក​វិញ។ នាង​បាន​ថ្លែងអំណរគុណ ទៅដល់មនុស្សរាល់គ្នា សម្រាប់ការគាំទ្រ និងកំលាំងចិត្ត ដែល​​បាន​​​ផ្ដល់​​មក​ឲ្យ​នាង។ នាង​បានសរសេរថា៖ «ខ្ញុំសប្បាយចិត្ត ជាងពេលណាៗទាំងអស់ និងដឹងថា ការ​គាំទ្រ​មិន​​មែន​​មាន​​តែមួយ​ប្រទេស (កូឡំប៊ី) ប៉ុណ្ណោះទេ តែមានមកពីគ្រប់ជ្រុងទាំងអស់ នៅក្នុងពិភពលោក»។

នាង «Ariadna Gutierrez Arevalo» បានត្រឡប់មកនិយាយ ពីហេតុការណ៍ដែលកើតឡើង កាលពីយប់ថ្ងៃ​អាទិត្យ​ថា៖ «ខ្ញុំបានផ្ដល់មុខមាត់ និងភាពសប្បាយរីករាយ ឲ្យប្រទេសរបស់ខ្ញុំ នៅពេលខ្ញុំបានក្លាយជា​បវរកញ្ញា​ចក្រវាឡ ដែល​មាន​រយៈពេល ត្រឹមតែប៉ុន្មាននាទី។ ថ្ងៃនេះ ដោយសារតែហេតុការណ៍ខាងលើ គ្រប់​គ្នា​បាន​​និយាយ​ពី​​ប្រទេស​កូឡំប៊ី និងពីសហគមន៍អាមេរិកឡាទីន សឹងតែនៅគ្រប់ជ្រុងជ្រោយ ក្នុង​ពិភពលោក។»

បវរកញ្ញាកូឡំប៊ី បានថ្លែងនូវពាក្យជូនពរមួយចំនួន ទៅកាន់អ្នកឈ្នះជ័យលាភីថា៖ «ខ្ញុំសូមអបអរសាទរ ទៅ​ដល់​បណ្ដាជនហ្វីលីពីនទាំងអស់ សម្រាប់រាជនីសម្ផស្ស ដែលទើបនឹងទទួលបានតំណែងថ្មី ជាបវរកញ្ញា​ចក្រវាឡ របស់ពួកគេ»៕

បវរកញ្ញា​បារាំង​ឆ្នាំ​២០១៦ បាន​ទៅ​លើ​យុវតី​នៅ​ភាគ​ខាង​ជើង​ជា​ថ្មី

បវរកញ្ញា​បារាំង​ឆ្នាំ​២០១៦ បាន​ទៅ​លើ​យុវតី​នៅ​ភាគ​ខាង​ជើង​ជា​ថ្មី

យុវតីដ៏ស្រស់ស្អាត អាយុ២២ឆ្នាំ ដែលជាបវរកញ្ញាប្រចាំឲ្យតំបន់ «Nord-Pas-de-Calais» កញ្ញា អ៊ីរីស មីតេណេរ៉េ ត្រូវបានជ្រើសជាប់ ជាបវរកញ្ញាបារាំង ប្រចាំឆ្នាំ២០១៦  នៅក្នុងការប្រកួតរាជនីសម្ផស្ស កាល​ពី​យប់ថ្ងៃសៅរ៍ ទី១៩ ខែធ្នូ ឆ្នាំ២០១៥ កន្លងមកនេះ នៅទីក្រុង លីល្ស៍។

កញ្ញា អ៊ីរីស ត្រូវបានប្រកាស ឲ្យជាប់ស្នងតំណែង ពីកញ្ញា កាមី សែរហ្វ៍ បវរកញ្ញាឆ្នាំមុន ដែលមកពីតំបន់ ភាគ​ខាងជើងប្រទេសបារាំងដូចគ្នា បង្កការខកចិត្តមិនស្ទើ ទៅបវរកញ្ញាមកពីកោះ «Martinique» (ជាប់​ជា​បវរកញ្ញាអមទី១) និងបវរកញ្ញា មកពីកោះ «Tahiti» (ជាប់ជាបវរកញ្ញាអមទី២)។ បវរកញ្ញា ដែល​មក​ពី​​តំបន់ «Provence» និងពីកោះ «Réunion» ទទួលបានចំណាត់ថ្នាក់ ជាបវរកញ្ញាអម លេខ៣ និងលេខ៤។

កញ្ញា អ៊ីរីស ដែលមានសក់ពណ៌មាស កំពស់ ១,៧២ម៉ែត្រ និងជានិស្សិតឆ្នាំទី៥ខាងទន្ដសាស្ត្រ ត្រូវ​បាន​ចម្រាញ់​ចេញ ពីបេក្ខនារីដែលអាយុពី១៨ ដល់២៤ឆ្នាំ មកពីតំបន់ចំនួន ៣១ នៃប្រទេសបារាំង និងទឹកដី​បារាំង ឯ​នាយ​សមុទ្រ។ នាងបានថ្លែងប្រកាស នៅក្នុងកម្មវិធីប្រឡងនោះ ពីគម្រោងរបស់នាង ក្នុង​ការ​ប្រយុទ្ធ​តស៊ូ ដើម្បីឲ្យកុមារីទាំងឡាយ អាចទទួលបានការសិក្សាអប់រំ។

» កញ្ញា អ៊ីរីស ក្នុងសភាពជាធម្មជាតិ៖

កម្មវិធីប្រឡងបវរកញ្ញាបារាំង នាឆ្នាំនេះ ត្រូវបានរៀបចំឡើង នៅជុំវិញប្រធានបទ«សុបិន្ត»។ កម្មវិធី​បាន​យក​សុបិន្ត របស់អតីតបវរកញ្ញាបារាំងចំនួន១០រូប មកចាក់ផ្សាយ ដោយពីក្នុងចំណោមនោះ ពួកនាងៗ​បាន​ឆ្លង​កាត់ នូវការតស៊ូជាច្រើន ដើម្បីក្លាយជា«បវរកញ្ញា»។

ចំណែកការជ្រើសវើស អ្នកដែលស្អាតដាច់គេវិញ កម្មវិធីបានឆ្លងកាត់ នូវដំណាក់កាលចំនួន៣ដង៖ ជម្រុះ​លើក​ទី១ ដោយគណកម្មាករវាយតម្លៃ នៅសល់តែ១២នាក់ - ជម្រុះលើកទី២ ដោយគណកម្មការមេ​ប្រយោគ នៅ​សល់៥នាក់ និងការសម្រេច ជាលើកចុងក្រោយ ត្រូវធ្វើឡើងដោយទស្សនិកជន ដោយការបោះឆ្នោត តាម​ទូរស័ព្ទ។ កាលពីឆ្នាំ២០១៤កន្លងទៅ  បណ្ដាជនប្រមាណជា ៨,៦លាននាក់ បាន​ទស្សនា​កម្មវិធី​ប្រឡង​បវរកញ្ញា​នេះ នៅលើកញ្ចក់ទូរទស្សន៍ TF1 ហើយចំនួននេះ បានក្លាយជាតួលេខមួយ ដ៏ខ្ពស់ បើប្រៀបធៀប​នឹង​កម្មវិធី​ផ្សេងទៀត ដែលចាក់បញ្ចាំង នៅតាមកញ្ចក់ទូរទស្សន៍ដទៃទៀត៕

» ប្រតិកម្មដំបូង របស់កញ្ញា អ៊ីរីស បន្ទាប់ពីបានជាប់ជាបវរកញ្ញា៖

------------

ស្ត្រី​ដែល​ស្អាត​ជាង​គេ​ក្នុង​លោក​នា​ឆ្នាំ​នេះ ជា​ជន​ជាតិ​អេស្ប៉ាញ

ស្ត្រី​ដែល​ស្អាត​ជាង​គេ​ក្នុង​លោក​នា​ឆ្នាំ​នេះ ជា​ជន​ជាតិ​អេស្ប៉ាញ

និស្សិតស្រី ដែលមានឯកទេសខាង ឱសថសាស្ត្រ អាយុ២៣ឆ្នាំ នាងកញ្ញា មៀរ៉ៃយ៉ា ឡាឡាហ្គូណា រ៉ូហូ បាន​ជាប់ជាបវរកញ្ញាពិភពលោក ពីក្នុងចំណោមបេក្ខជន១១នាក់ចុងក្រោយ ដែលជ្រើសចេញពីបេក្ខនារី ចំនួន​១១៤នាក់ (មកពី១១៤ប្រទេស) នៅក្នុងពិភពលោក។ បេក្ខនារីដែលទទួលបានចំណាត់ថ្នាក់អមទីមួយ បាន​ទៅលើបវរកញ្ញារ៉ូស្ស៊ី នាង សូហ្វីយ់ា ណីគីតឈុក (Sofia Nikitchuk) និងចំណាត់ថ្នាក់អមទី២ បាន​ទៅ​លើ​បវរកញ្ញា​ឥណ្ឌូនេស៊ី នាងកញ្ញា ម៉ារីយ៉ា ហាហ្វានទី (Maria Harfanti)។ ចំណែកលេខ៣ និង​លេខ៤ បាន​ទៅ​លើ​បវរកញ្ញា មកពីប្រទេសលីបង់ និងប្រទេសចាម៉ៃអិក។

កញ្ញា មៀរ៉ៃយ៉ា ឡាឡាហ្គូណា រ៉ូហូ ដែលជាបវរកញ្ញារបស់ប្រទេសអេស្ប៉ាញ ត្រូវបានបវរកញ្ញា​ពិភពលោក​ឆ្នាំ២០១៤ មកពីប្រទេសអាហ្វ្រិកខាងត្បូង កញ្ញា រ៉ូឡែន ស្ត្រូស (Rolene Strauss) ឡើងមកបំពាក់​ម្កុដ​ពេជ្រ ដើម្បី​កាន់តំណែង ជារាជនីសម្ផស្សបន្ត សម្រាប់រយៈពេលមួយឆ្នាំ។ ចំពោះបវរកញ្ញាមកពីប្រទេសចំនួន៦ មាន ហ្វីលីពីន ហ្គីយ៉ាន បារាំង អាហ្វ្រិកខាងត្បូង អូស្ត្រាលី និងវៀតណាម ដែលបានមកដល់វគ្គចុង​បញ្ចប់​ដែរ​នោះ មិនបានទទួលបានតំណែងអ្វីឡើយ វៀរលែងតែបវរកញ្ញាវៀតណាមម្នាក់ប៉ុណ្ណោះ ដែល​បាន​ទទួល​បាន​រង្វាន់ ពីសំណាក់ទស្សនិកជន។

បវរកញ្ញាទើបនឹងជាប់ថ្មី បានថ្លែងឡើងថា៖ «បើគ្មានសេចក្ដីស្រឡាញ់ ដែលខ្ញុំទទួលបានពី​មនុស្ស​ទាំង​អស់​គ្នា​នៅ​ទីនេះ និងពីគ្រប់គ្នា ដែលបានជូនពរឲ្យខ្ញុំមានវាសនា និងបានគាំទ្រខ្ញុំនោះ ខ្ញុំច្បាស់ជាមិនអាច​ឈាន​មក​ដល់​ពេល​នេះ​ឡើយ។ ខ្ញុំចង់បង្ហាញទៅពួកគេវិញ និងបង្ហាញទៅកាន់ពិភពលោក ថាខ្ញុំពិតជាស័ក្ដិសម​នឹង​តំណែង ជាបវរកញ្ញាពិភពលោក ហើយខ្ញុំសង្ឃឹមថា នឹងធ្វើឲ្យអ្នកទាំងអស់គ្នា មានមោទនភាព។»

ការប្រឡងបវរកញ្ញាពិភពលោកនេះ ត្រូវបានរៀបចំឡើង ជាលើកទី៦៥ តាំងពីឆ្នាំ១៩៥១កន្លងមក និងជា​លើក​ទី៧ នៅក្នុងប្រទេសចិននាក្រុង សាន់យ៉ា (Sanya) ជាប់ឆ្នេរសមុទ្រ។

ហេតុការណ៍មួយ ដែលបានបង្កភាពល្អក់កករ ដល់ការប្រឡង​បវរកញ្ញាពិភពលោកលើកនេះ គឺបវរកញ្ញា​របស់​ប្រទេសកាណាដា កញ្ញា អាណាស្តាស៊ីយ៉ា លីន (Anastasia Lin) ត្រូវបានប្រទេសចិនបដិសេធ មិន​ផ្ដល់​ទិដ្ឋាការ ឲ្យនាងមានឱកាស បានមកចូលរួមប្រឡង ក្នុងចំណោមបេក្ខនារី ដ៏ច្រើនសន្ធឹកសន្ធាប់​នោះ​ឡើយ។ ការបដិសេធនេះ បណ្ដាលមកពីបវរកញ្ញារូបនេះ ជាសមាជិកម្នាក់ របស់ចលនាសាសនា ហ្វាលុងហ្គុង (Falun Gong) និងសកម្មភាពរបស់កញ្ញា អាណាស្ដាស៊ីយ៉ា នៅក្នុងប្រព័ន្ធផ្សព្វផ្សាយ បរិហារ​ពី​ការ​រំលោភ​សិទ្ធិ​មនុស្ស នៅក្នុងប្រទេសចិន។

កាលពីរដូវក្ដៅមុន បវរកញ្ញាកាណាដា នាង អាណាស្តាស៊ីយ៉ា បានឡើងធ្វើការបកស្រាយ នៅមុខសភា​អាមេរិក ពីការធ្វើទារុណកម្មទៅលើសមាជិក របស់ចលនាសាសនា ហ្វាលុងហ្គុង ពីសំណាក់​គណបក្ស​កុម្មុយនីស​ចិន៕

» វីដេអូ នៅពេលដែលបវរកញ្ញាអេស្ប៉ាញ ជាប់ជារាជនីសម្ផស្សពិភពលោក៖

------------

ការវិវត្តន៍ នៃ​ស្ត្រី​រ៉ូស្ស៊ី​ក្នុង​រយៈ​ពេល​១០០ឆ្នាំ​ចុង​ក្រោយ (vdo)