Posts in ‘ការរស់នៅប្រចាំថ្ងៃ’ Category

បារាំង​នឹង​ទទួល​ធាតុ​អាកាស​ត្រជាក់ រហូត​១៥អង្សា​ក្រោម​សូន្យ

បារាំង​នឹង​ទទួល​ធាតុ​អាកាស​ត្រជាក់ រហូត​១៥អង្សា​ក្រោម​សូន្យ

ជាដំណឹងសម្រាប់បង្ការខ្លួន របស់អ្នករស់នៅ ក្នុងប្រទេសបារាំង (ឬអាចប្រាប់បន្តគ្នា សម្រាប់អ្នកដែល​មាន​បង​ប្អូន រស់នៅទីនោះ)។ សីតុណ្ហភាព នឹង​ចុះ​ត្រជាក់ខ្លាំង ហើយធាតុអាកាស​នឹងមានចុះអ័ព្ទច្រើន រាប់​ចាប់​តាំង ពីថ្ងៃ​​សុក្រ​​នេះ រហូតដល់ថ្ងៃអាទិត្យខាងមុខ សម្រាប់ប្រទេសមួយចំនួន នៅក្នុង​ទ្វីបអ៊ឺរ៉ុបខាងលិច។

ស្ថាប័នឧត្តុនិយមបារាំង «Météo-France» បានប្រកាសឲ្យដឹងថា សំពាធធាតុអាកាសដ៏មហាត្រជាក់ បាន​ធ្លាក់​ចុះ​មកពីតំបន់ ស្កង់ឌីណាវ (Scandinav) ដែលស្ថិតនៅក្បែរ ប៉ូលខាងជើង ហើយបានឆ្លងកាត់ ទ្វីប​អ៊ឺរ៉ុប​ភាគ​កណ្ដាល នៅ​ថ្ងៃ​ព្រហស្បត្តិ៍​នេះ មុននឹងមកដល់ប្រទេសបារាំង នៅថ្ងៃស្អែក ឬខាន​ស្អែក។

នៅភាគខាងកើត នៃប្រទេសបារាំង ជាពិសេេស នៅជុំវិញក្រុង អាហ្សាស (Alsace) សីតុណ្ហភាព អាច​នឹង​ធ្លាក់​ចុះក្រោមសូន្យ ពី-៨អង្សា រហូតដល់ -១៥អង្សា។ សីតុណ្ហភាពនេះ ជាសីតុណ្ហភាព ដែលប្រកាសឲ្យដឹង ប៉ុន្តែ​ជា​ទូទៅ សីតុណ្ហភាព ដែលទទួលអារម្មណ៍ សម្រាប់មនុស្សម្នាក់ អាចត្រជាក់​ជាង​នេះ រហូតដល់ទៅ ២អង្សា (បាន​ន័យ​ថា បើសីតុណ្ហភាពប្រាប់ថា មានកម្រិត-១៥អង្សា ខ្លួនមនុស្ស អាចមានអារម្មណ៍ថា វាត្រជាក់​រហូត​ដល់ -១៧អង្សា ឬ-១៨អង្សា)។

ធាតុអាកាសនេះ នឹងអាចបង្កឲ្យមានចុះអ័ព្ទ ឬឈានដល់ចុះព្រិល យ៉ាងក្រាស នៅតាមតំបន់មួយចំនួន។ ប៉ុន្តែ​សម្រាប់អ្នកមានរថយន្ដ គួរបង្ការ​កង់​រថយន្ដ​របស់ខ្លួន ពីការរអិល ដែលបណ្ដាលមកពីព្រិលកក ដែល​ក្លាយ​ជា​ទឹកកក នៅ​លើ​ដងផ្លូវ។

នៅមានដំណឹងល្អមួយដែរ គឺប្រទេសបារាំង នឹងត្រូវរង់ចាំសីតុណ្ហភាពសមល្មមមកវិញ ចាប់ពីថ្ងៃអាទិត្យ​នេះ​៕

អាយុ​២ឆ្នាំ តែ​ចេះ​ជួយ​សង្គ្រោះ​ប្អូន​ប្រុស​ភ្លោះ ចេញ​ពី​ទូ​សង្កត់

អាយុ​២ឆ្នាំ តែ​ចេះ​ជួយ​សង្គ្រោះ​ប្អូន​ប្រុស​ភ្លោះ ចេញ​ពី​ទូ​សង្កត់

វីដេអូនោះ មានភាពរន្ធត់ នៅប៉ុន្មានវិនាទីដំបូង តែបានក្លាយជាអស្ចារ្យ និងពោរពេញ ដោយវីរភាព នៅចុង​បញ្ចប់​នៃវីដេអូ។ ដូចម្ចាស់វីដេអូ លោក រីគី សូហ្វ៍ (Ricky Shoff) ដែលជាឪពុករបស់កូនភ្លោះពីរនាក់ បាន​សរសេរ នៅលើគណនេយ្យហ្វេសប៊ុក របស់លោក ដូច្នេះថា៖ «ខ្ញុំបានរារែក ក្នុងការចែករំលែកវីដេអូនេះ។ ប៉ុន្តែ ខ្ញុំ​គិត​ថា រូបភាពក្នុងវីដេអូ នឹងអាចផ្ដល់ជាមេរៀន ទៅឲ្យមេបាទាំងឡាយ ត្រូវ​ប្រុងប្រយ័ត្នទ្វេរឡើង។ ម្យ៉ាងទៀត វីដេអូ​​នេះ មាន​សភាព​អស្ចារ្យណាស់។»។

ប្រាកដហើយ ថាលោក រីគី សូហ្វ៍ ច្បាស់ជាមានអការៈភ័យភិត មិនតិចទេ ក្នុងនាមជាឪពុក នៅពេល​ដែល​បាន​ទស្សនា ក្នុងគ្រាដំបូង នូវវីដេអូសុវត្ថិភាព ដែលថតជាប់ពីសកម្មភាព របស់កូនភ្លោះអាយុ២ឆ្នាំទាំងពីរនាក់ របស់​លោក។ នៅពេលនោះ ទូដ៏ធំបានរលំ ដួលមកខាងមុខ ហើយបានសង្កត់លើកុមារម្នាក់ បណ្ដាលឲ្យ​កុមារ​រូប​នោះ ស្រែក​យំ​ឡើង។ នៅក្នុងសភាពជាទារក ដែលទើបនឹងចេះដើរ «តិះតះ» បងប្រុសភ្លោះ មិនបានចាប់​អារម្មណ៍​ពី​គ្រោះថ្នាក់ ដែលកំពុងកើតមាន ចំពោះប្អូនប្រុសភ្លោះ របស់ខ្លួនទេ។ ប៉ុន្តែ នៅទីបំផុត... វីរភាព​របស់​កុមារ​ជា​បង បាន​ធ្វើឲ្យ​អ្នក​ទស្សនា មិនរំភើប មិនបាន។

លោក រីគី សូហ្វ៍ បានសរសេរបន្តថា៖ «យើងមានសំណាងណាស់ ដែលកូនតូចជាងគេ របស់យើង មិនមាន​រង​គ្រោះអ្វី។ ប៉ុន្តែ សូមអ្នករាល់គ្នា ប្រុងប្រយ័ត្ន ក្នុងការវាយភ្ជាប់ទូ ទៅជញ្ជាំងឲ្យជាប់ ជៀសវាងវាដួល​រលំ​ដូច្នេះ។»។ មិន​ខុស​ទេ ព្រោះសំណាង មិនមែនចេះតែកើតមាន ចំពោះគ្រប់ឪពុកម្ដាយ​នោះឡើយ៕

» វីដេអូ បង្ហាញពីវីរភាពដ៏អស្ចារ្យ របស់កុមារភ្លោះ៖

ប្អូន​ស្រី​បង្កើត​របស់ ហ្វីដែល កាស្ត្រូ មិន​ទៅ​ធ្វើ​បុណ្យ​សព​បង​ខ្លួន

ប្អូន​ស្រី​បង្កើត​របស់ ហ្វីដែល កាស្ត្រូ មិន​ទៅ​ធ្វើ​បុណ្យ​សព​បង​ខ្លួន

អ្នកស្រី ជ័នីតា កាស្ត្រូ (Juanita Castro) ប្អូនស្រីបង្កើត របស់«បីតាបដិវត្តន៍ដ៏មហិមា» របស់ប្រទេសគុយបា ដែលទើបនឹងធ្វើមរណភាព កាលពីថ្ងៃ​សុក្រ​សប្ដាហ៍មុន បានថ្លែងនៅមួយថ្ងៃក្រោយមកថា អ្នកស្រីនឹង​«មិន»​ទៅ​​លា​​ជាលើកចុងក្រោយ ឬចូលរួមធ្វើបុណ្យសព​បងប្រុស​របស់អ្នកស្រី នោះឡើយ។

រស់នៅនិរទេសខ្លួន ក្នុងក្រុងមីអាមី (Miami) ភាគអាគ្នេយ៍នៃសហរដ្ឋអាមេរិក តាំងពីទសវត្សន៍ឆ្នាំ៦០នោះមក អ្នកស្រី ជ័នីតា បានថ្លែង ទៅកាន់​សារព័ត៌មាន «Nuevo Herald» ថា៖ «ដោយសារ​មាន​ពាក្យ​ចចាមអារាម ដ៏​អកុសល ថាខ្ញុំនឹងត្រឡប់ ទៅប្រទេសគុយបា ដើម្បីចូលរួម​ធ្វើបុណ្យ​សព​នោះ នាពេលនេះ ខ្ញុំសូមបញ្ជាក់ថា គ្មានពេល​ណា​មួយ សូម្បីតែបន្តិច ដែលខ្ញុំនឹកឃើញត្រឡប់ ទៅជាន់កោះ (គុយបា) នោះវិញឡើយ។ ខ្ញុំ​មិន​ទាន់​​គិត​​ថា នឹងត្រូវ​ធ្វើរឿងនេះ ក្នុងពេលបច្ចុប្បន្នទេ។»។

មរណភាពរបស់លោក ហ្វីដែល កាស្ត្រូ ក្នុងជន្នាយុ៩០ឆ្នាំ បានបង្កឲ្យមានអំណរសាទរយ៉ាងខ្លាំងក្លា ពី​សំណាក់​សហគមន៍ពលរដ្ឋអាមេរិកាំង ដែលមាន​ដើម​កំណើត​គុយបា និងដែលកំពុងរស់នៅ ក្នុង​សហរដ្ឋ​អាមេរិក។

នៅចំពោះហេតុការណ៍នេះ អ្នកស្រី ជ័នីតា បានបញ្ជាក់ ពីមនោរសញ្ចេតនារបស់អ្នកស្រីថា៖ «ខ្ញុំមិន​សប្បាយ​ចិត្ត នឹងការស្លាប់របស់នរណាម្នាក់ឡើយ ក្នុងនាម​ជាមនុស្សដូចគ្នា ហើយក៏កាន់​​តែមាន​ភាព​ក្រៀមក្រំ​​ណាស់​ដែរ ចំពោះមរណភាព​របស់មនុស្សម្នាក់ ដែលមានឈាមជ័រ និងមាននាមត្រកូល​ដូចខ្ញុំ។ ក្នុងនាម​ជា​ប្អូន​ស្រី​របស់ ហ្វីដែល ខ្ញុំមានអារម្មណ៍​នៅពេលនេះ ថាវាជាការបាត់បង់​​មនុស្សម្នាក់ នៅក្នុងឈាមជ័រតែមួយ។»។

លោក ហ្វីដែល កាស្ត្រូ កើតចេញពីត្រកូលមួយ ដែលមានបងប្អូនប្រុសស្រី ចំនួន៧នាក់ ក្នុងចំណោមនោះ មាន​លោក រ៉ាអ៊ូល កាស្ត្រូ (Raul Castro) អាយុ​៨៥ឆ្នាំ ដែលសព្វថ្ងៃជាប្រធានាធិបតី របស់ប្រទេសគុយបា និង​អ្នកស្រី ជ័នីតា កាស្ត្រូ អាយុ៨៣ឆ្នាំ ដែលបានគេចខ្លួន ចេញពីរបបដឹកនាំ របស់​បងប្រុស​របស់​អ្នកស្រី។

អ្នកស្រី ជ័នីតា បានមករស់នៅ ក្នុងក្រុងមីអាមី នាឆ្នាំ១៩៦៤ និងបានធ្វើការរិះគន់រដ្ឋាភិបាលក្រុង ឡាហាវាន (la Havane - រដ្ឋធានីនៃប្រទេសគុយបា) ជា​ចំហរ។ អ្នកស្រីបានទទួលស្គាល់ ដោយខ្លួនអ្នកស្រីថា នៅ​ក្នុង​យុទ្ធនាការ​មួយ ឈ្មោះ «Donna» (នៅក្នុងសម័យកាលសង្គ្រាមត្រជាក់) អ្នកស្រីបាន​​ដើរ​តួនាទី​​យ៉ាង​​សំខាន់ ជាមួយ​ភ្នាក់ងារសំងាត់ «CIA» អាមេរិក ដើម្បីធ្វើការផ្ដួលរលំ របបដឹកនាំ​​របស់​​បង​ប្រុស​​អ្នកស្រី៕

បីតា​បដិវត្តន៍​គុយបា ហ្វីដែល កាស្ត្រូ ទទួល​មរណភាព

បីតា​បដិវត្តន៍​គុយបា ហ្វីដែល កាស្ត្រូ ទទួល​មរណភាព

លោក ហ្វីដែល កាស្ត្រូ (Fidel Castro) បីតាបដិវត្តន៍គុយបា បានទទួលមរណភាពហើយ នៅក្នុងជន្មាយុ​៩០ឆ្នាំ កាលពីយប់ថ្ងៃសុក្រ សប្ដាហ៍មុន។ គឺលោក រ៉ាអ៊ូល កាស្ត្រូ (Raul Castro) ប្អូនប្រុស​អាយុ​៨៥ឆ្នាំ​របស់​លោក និងជាប្រធានាធិបតីគុយបាបច្ចុប្បន្ន ជាអ្នកប្រកាសដំណឺងមួយនេះ ដែលសម្រាប់ជនមួយភាព ជា​ភាព​សោក​សៅ និងសម្រាប់ជនមួយភាគទៀត ជាភាពសប្បាយរីករាយដ៏ធំបំផុត។

លោក រ៉ាអ៊ូល កាស្ត្រូ បានអានសេចក្ដីប្រកាស និងផ្សាយតាមកញ្ចក់ទូរទស្សន៍ជាតិថា៖ «អគ្គមេបញ្ជាការ នៃ​បដិវត្តន៍​គុយបា បានទទួលមរណភាព នៅម៉ោង២២ និង២៩នាទី យប់ថ្ងៃនេះ (ថ្ងៃសុក្រ)»។

ប្រធានាធិបតីគុយបា មិនបានថ្លែងបញ្ជាក់ ពីមូលហេតុដែលបណ្ដាល ឲ្យបងប្រុសរបស់លោក ស្លាប់​នោះ​ឡើយ។ លោក រ៉ាអ៊ូល បានបន្តទៀតថា សាកសពលោក ហ្វីដែល នឹងត្រូវយកទៅបូជា។ លោក​អះអាង​ថា៖ «សាកសពរបស់សមមិត្ត ហ្វីដែល នឹងត្រូវយកទៅបូជា នៅព្រឹកព្រហាមថ្ងៃសៅរ៍ ដើម្បីឲ្យស្រប​តាម​បំណង របស់សមមិត្តផ្ទាល់។ រីឯបុណ្យឧទ្ធិស និងគោរពវិញ្ញាណក្ខន្ធ នឹងត្រូវបញ្ជាក់នៅពេលក្រោយ។»

លោក ហ្វីដែល កាស្ត្រូ ដែលជាជនកុម្មុយនីស និយមលិទ្ធិម៉ាក្ស៍ ដ៏មុតមាំមួយរូបនេះ បានដឹកនាំ​ការ​ប្រយុទ្ធ​ប្រឆាំង នឹងអ្វីដែលលោកហៅថា ជាបន«ប្រតិកិរិយា ចក្រពត្តិ» (ជាពិសេសប្រឆាំងអាមេរិក ដែលនៅ​ក្បែរ​នោះ) ហើយបានដាក់ឲ្យមាន នូវរបប«សង្គមនិយម»ដ៏តឹងតែងមួយ នៅកោះគុយបា អស់​រយៈកាល​ជាង​កន្លះ​សតវត្សន៍​មក​ហើយ។

នៅឆ្នាំ២០០៦ លោកបានផ្ទេរអំណាចរបស់លោក ទៅឲ្យប្អូនប្រុស លោក រ៉ាអ៊ូល បន្ទាប់ពីលោក​បាន​រង​គ្រោះ នឹងជំងឺហូរឈាមតាមពោះវៀន។ នៅខែមេសា ឆ្នាំ២០១១ លោកបានទម្លាក់ចោល នូវការ​ទទួល​ខុស​ត្រូវ​គ្រប់​បែប​យ៉ាង បើសូម្បីតែតំណែងរបស់លោក ជាលេខា«បក្សកុម្មុយនីសគុយបា» ដែលហៅកាត់​តាម​ភាសា​អេស្ប៉ាញ PCC ក៏លោកបានប្រគល់ ទៅឲ្យប្អូនប្រុសលោកដែរ។

រវាងពីខែកុម្ភៈ ឆ្នាំ២០១៤ មកទល់នឹងខែមេសា ឆ្នាំ២០១៥ អតីតមេដឹកនាំ ដែលប្រើកណ្ដាប់ដៃដែក ក្នុង​ការ​គ្រប់​គ្រង​ប្រទេសរូបនេះ មិនបានបង្ហាញខ្លួន ជាសាធារណៈសោះឡើយ និងបានបង្កឲ្យមាន ជាពាក្យ​ចចាម​អារ៉ាម​ជា​ច្រើន ពីការចុះទ្រុតទ្រោមខ្លាំង នៃស្ថានភាពសុខភាព​របស់លោក។ ប៉ុន្តែចាប់ខែមេសា ឆ្នាំ២០១៥​នោះ​មក ប្រមាណជាមួយឆ្នាំកន្លះ លោក ហ្វីដែល បានបង្ហាញខ្លួនឡើងវិញ ដោយបានចុះផ្សាយ នូវ​គំនិត​ទស្សនៈ​របស់​លោក និងជាពិសេស បានទទួលជួបជាមួយ មេដឹកនាំ និងឥស្សរជនបរទេស​ជា​ច្រើន​នាក់ នៅ​ក្នុង​គេហដ្ឋានរបស់លោក៕

ព្រះរាជា ភូមិបុល  នៃ​រាជា​ណាចក្រ​ថៃ បាន​សោយ​ទីវង្គត

ព្រះរាជា ភូមិបុល នៃ​រាជា​ណាចក្រ​ថៃ បាន​សោយ​ទីវង្គត

ព្រះមហាក្សត្រ ដែលប្រជារាស្ត្រថៃគោរព ប្រៀបបាននឹងអាទិទេព បានសោយទីវង្គតហើយ នៅថ្ងៃព្រហស្បត្តិ៍​ទី១៣ ខែតុលានេះ បន្ទាប់ពីបានសោយរាជ្យសម្បត្តិ អស់រយៈពេល៧០ឆ្នាំកន្លងមក។ ព្រះបាទ ភូមិបុល អាឌុលយ៉ាដេត (Bhumibol Adulyadej) បានសោយទីវង្គត់នៅព្រះជន្មាយុ ៨៨ព្រះវស្សា នៅឯមន្ទីរពេទ្យ «Siriraj» ទីកន្លែងដែលព្រះអង្គ បាននៅសម្រាក​ព្យាបាលព្រះឈួន តាំងពីពីរឆ្នាំកន្លងមកហើយ។

ព្រះបាត ភូមិបុល បានឡើងស្នងរាជ្យសម្បត្តិ នៅឆ្នាំ១៩៤៦ ពីព្រះរាជាមុន ដែលជាព្រះរាមរបស់ទ្រង់។ សេចក្ដី​ប្រកាសព័ត៌មានមួយ ពីព្រះបរមរាជវាំងថៃ បានឲ្យដឹង ក្នុងថ្ងៃព្រហស្បត្តិ៍នេះ​ថា៖ «ព្រះអង្គបានសោយទីវង្គត់ យ៉ាងស្ងប់ស្ងៀម នៅឯ​មន្ទីរ​ពេទ្យ»។ ភ្លាមៗក្រោយដំណឹង ត្រូវបានប្រកាសចេញ គ្រប់ស្ថានីយ​ទូរទស្សន៍​ទាំង​អស់ នៅក្នុងប្រទេស បានផ្លាស់ប្ដូរ​កម្មវិធី​ផ្សាយ​របស់ពួកគេ ដោយ​ប្ដូរ​មក​ផ្សាយ នូវរូបភាពនៅក្នុងមន្ទីរពេទ្យ ដែល​គេ​ឃើញ​មនុស្ស​ជា​ច្រើន​រយនាក់ បានស្រយ៉ង់ចិត្ត និង​ស្រែក​​ទ្រហោរ​យំ។

ពីទីធ្លាសួនច្បារ នៃមន្ទីរពេទ្យ «Siriraj» យុវជនម្នាក់ បានស្រែកឡើងថា៖ «តើប្រទេសថៃ នឹងក្លាយជាអ្វីទៅ នៅពេលគ្មានព្រះបីតាបែបនេះ?»

ការសោយទីវង្គត់ របស់ព្រះរាជាអង្គនេះ បានដាក់ប្រទេសថៃ ដែលជាព្រះរាជាណាចក្រ ដែលមានវ័យ​ដ៏​ចំណាស់​ជាងគេ នៅក្នុងពិភពលោក ទៅក្នុងសភាពមិនច្បាស់លាស់មួយ ដោយសារវិបត្តិនយោបាយ បាន​កើត​ឡើង​ជា​បន្តបន្ទាប់ តាំងពីច្រើនឆ្នាំមកហើយ រហូតមកដល់សព្វថ្ងៃ។ ទស្សនាវដ្ដីមនោរម្យ.អាំងហ្វូ នឹងត្រឡប់​មក​ជម្រាប​ជូន ពីហេតុការណ៍នេះ យ៉ាងលំអិត ក៏ដូចជាបទវិភាគផ្សេងៗ ជុំវិញការសោយទីវង្គត់ របស់​ព្រះ​មហាក្សត្រ​​ថៃ​អង្គ​នេះ៕