ឥណ្ឌា៖ កំហឹងផ្ទុះជាថ្មី ក្រោយពីក្មេងស្រីអាយុ៥ឆ្នាំម្នាក់ត្រូវបានរំលោភ
ក្មេងស្រីក្នុងរដ្ឋធានីញ៉ូដេលី មួយរូបអាយុ៥ឆ្នាំ បានធ្លាក់ខ្លួនឈឺជាទម្ងន់ នៅថ្ងៃសៅរ៍ទី២០ខែមេសានេះ បន្ទាប់ពីនាងតូចត្រូវបាន«រំលោភ» និងធ្វើ«ទារុណកម្ម» កាលពីដើមអាទិត្យ ដោយជនម្នាក់ ដែលជាអ្នករស់នៅជិតខាងផ្ទះរបស់នាង ហើយបានចាប់នាងបង្ខាំងទុក ចំនួនពីរថ្ងៃនៅក្នុងបន្ទប់។
បន្ទាប់ពីបានរកឃើញ បង្ខាំងនៅក្នុងបន្ទប់ នាងតូចត្រូវបានបញ្ជូនទៅកាន់មន្ទីរពេទ្យ។
ភ្នាក់ងារនគរបាល បានអោយដឹងថា នាងតូចដែលទើបតែមានអាយុ៥ឆ្នាំ បានបាត់ខ្លួនតាំងពីថ្ងៃច័ន្ទទី១៥ខែមេសា ហើយត្រូវបានរកឃើញមកវិញ ដោយអ្នកជិតខាងរបស់នាងម្នាក់ទៀត នៅថ្ងៃពុធទី១៧ខែមេសា។ អ្នកជិតខាងនោះ បានលឺសម្លេងយំខ្សាយៗ ខណៈដែលនាងត្រូវបានបង្ខាំងទុក នៅក្នុងបន្ទប់មួយ ស្ថិតក្នុងអាគារស្នាក់នៅតែមួយ នឹងលំនៅដ្ឋានរបស់ឪពុកម្ដាយនាង [...]
