ISIS ប្រកាសទទួលស្គាល់ការផ្ទុះអាវុធកណ្ដាល ប៉ារីស មុននេះ
នគរបាលបារាំងម្នាក់ បានស្លាប់ និងពីរនាក់ផ្សេងទៀត បានរងរបួស នៅក្នុងហេតុការណ៍ផ្ទុះអាវុធមួយ កាលពីវេលាម៉ោង ២១យប់ ថ្ងៃព្រហស្បត្តិ៍នេះ នៅលើមហាវិថីដ៏ល្បីឈ្មោះ «Champs-Elysées» នៃរដ្ឋធានីប៉ារីស ដែលសម្បូរដោយអ្នកទេសចរណ៍ និងហាងលក់ទំនិញ ដ៏ប្រណិតៗ។ ខ្មាន់កាំភ្លើង ត្រូវបាន«បង្ក្រាប» ដើម្បីការពារខ្លួន ពីសំណាក់កងកម្លាំង នៅនឹងកន្លែង។ នេះ បើតាមការប្រកាសឲ្យដឹង របស់ក្រសួងមហាផ្ទៃបារាំង នៅមុននេះបន្តិច។ ប្រភពពីនគរបាលយុត្តិធម៌បារាំង បានអះអាងបន្ថែមថា ជនខ្មាន់កាំភ្លើងបានស្លាប់ហើយ។
ប្រភពដដែលនោះ បានឲ្យដឹងបន្តថា៖ «ជនបង្កបានមកដល់ទីកន្លែងកើតហេតុ ដោយជិះរថយន្ដ។ នៅពេលចុះពីរថយន្ដ ជននេះបានបើកការបាញ់រះ ទៅលើរថយន្ដនគរបាល ដែលមានដឹកនគរបាល ដោយប្រើកាំភ្លើងស្វ័យប្រវត្តិ បណ្ដាលឲ្យនគរបាលម្នាក់ បានបាត់បង់ជីវិត ហើយបានបន្តការបាញ់សម្រុក ទៅលើកងកម្លាំងនគរបាលដទៃទៀត មុននឹងត្រូវបានបង្ក្រាប។»។
[...]
