Posts in ‘វប្បធម៌ សិល្បៈ ប្រពៃណី’ Category

រូបភាព​«ដំបូង»​នៃ​ភាពយន្ដ «មុន​ដំបូង ខ្មែរ​ក្រហម​សម្លាប់​ប៉ា​ខ្ញុំ»

រូបភាព​«ដំបូង»​នៃ​ភាពយន្ដ «មុន​ដំបូង ខ្មែរ​ក្រហម​សម្លាប់​ប៉ា​ខ្ញុំ»

វីដេអូ ដែលផ្តល់ពីរូបភាពដំបូងគេ នៃភាពយន្ដ «មុន​ដំបូង​ ខ្មែរ​ក្រហម​បាន​សម្លាប់​ប៉ា​របស់​ខ្ញុំ (ជា​ភាសា​​អង់គ្លេស First They Killed My Father/ ជាភាសាបារាំង D'abord ils ont tué mon père)» ត្រូវ​បាន​បង្ហោះ នៅ​លើ​ទំព័រ​ផ្លូវការ របស់ភាពយន្ដ នៅបណ្ដាញសង្គមហ្វេសប៊ុក។ នៅក្នុង​វីដេអូ​នោះ គេ​ឃើញ​សមិទ្ធិករ​ភាពយន្ដ​ទាំងពីររូប គឺកំពូលតារាហូលីវូដ នាង អេនជឺលីណា ជូលី (Angelina Jolie) និង​សមិទ្ធិករ​ភាពយន្ដ ​ខ្មែរ-បារាំង លោក ប៉ាន រីទ្ធី បានចេញមកពន្យល់ ពីគំនិតគោល របស់ភាពយន្ដ និង​បាន​ថ្លែង​បញ្ជាក់ ពី​បច្ចេកទេស​ថត រួមទាំង​ការ​ដឹកនាំ​សំដែង ទៅកាន់​តារា​ជនជាតិខ្មែរ​ទាំងអស់ នៅក្នុង​ភាពយន្ដ​នោះផង។

នៅអមនឹងវីដេអូនោះ មានសរសេរពន្យល់ខ្លីប៉ុន្មានឃ្លា ដូច្នេះថា៖

«មុនដំបូង ខ្មែរក្រហមសម្លាប់ប៉ារបស់ខ្ញុំ» គឺជាការចងចាំ ដ៏ឈឺចាប់ របស់​អ្នកនិពន្ធសៀវភៅ និង​សកម្មជន ការពារសិទ្ធមនុស្ស អ្នកស្រី លឿង អុឹង ដែលបានរួចផុតជីវិត ពីរបបខ្មែរ​ក្រហម យ៉ាង​សាហាវ​យង់ឃ្នង នៅ​ចន្លោះ​ឆ្នាំ ១៩៧៥ ដល់ ១៩៧៨។ ព្រឹត្តិការណ៍នេះបានកើតឡើង នា​ពេល​ខ្មែរ​ក្រហម​ឡើង​កាន់​អំណាច កាលពីអ្នកស្រី​នៅអាយុ ៥ ឆ្នាំ រហូតដល់ ៩ ឆ្នាំ។ ខ្សែ​ភាពយន្ត​នេះ បាន​ឆ្លុះ​បញ្ចាំង​អំពី​ស្មារតី​យ៉ាង​មោះមុត និង​ការតស៊ូ​យ៉ាង​ប្តូរផ្តាច់ របស់​គ្រួសារ​អ្នកស្រី លឿង អុឹង ដើម្បី​បានរស់នៅ​ជា​មួយ​គ្នា យ៉ាង​វេទនា អំឡុង​សម័យ​ខ្មែរក្រហម។

ភាពយន្ដនេះ នឹងចេញបញ្ចាំងដំបូងគេ នៅថ្ងៃទី១៨ ខែកុម្ភៈខាងមុខ នៅក្នុងខេត្តសៀមរាប ទី​កន្លែង​ដែល​ភាពយន្ដ​បាន​ថត។ បន្ទាប់មកភាពយន្ដ នឹងបន្តបញ្ចាំង នៅពាសពេញ​ព្រះរាជា​ណាចក្រ បើ​សូម្បី​នៅ​តាម​វត្តអារាម និង​ទី​ជនបទ​ឆ្ងាយៗ។ នៅក្នុងរោងភាពយន្ដមួយចំនួន ទស្សនិកជន​នឹង​អាច​ចូលរួម​ពិភាក្សាដោយ​ផ្ទាល់ ជាមួយ​នឹង​នាង អេនជឺលីណា ជូលី និងតួសម្ដែងសំខាន់ៗ​ផ្សេងទៀត។

សម្រាប់ទស្សនិកជនទាំងឡាយ នៅក្នុងពិភពលោក (ក្រៅពីប្រទេសកម្ពុជា) ត្រូវ​រង់ចាំ​រយៈ​ពេល​យ៉ាង​ហោច ៧ខែ​​ទៀត ដើម្បី​ទស្សនា​ខ្សែ​ភាយន្ដ​នេះ នៅលើ​គេហទំព័រ «Netflix» ដែល​ផ្ដល់​សេវា​កំសាន្ដ ខាង​ភាពយន្ដ​ និង​វីដេអូ។ គេហទំព័រ​នេះ នឹងដាក់បង្ហោះភាពយន្ដ «មុន​ដំបូង ​ខ្មែរ​ក្រហម​​សម្លាប់​ប៉ា​របស់​ខ្ញុំ» ចាប់​ពី​ថ្ងៃ​ទី១៥ ខែកញ្ញា​​តទៅ តែ​​ទស្សនិកជន​ត្រូវបង់ប្រាក់ (ដូចទិញសំបុត្រ ចូលមើល​ភាពយន្ដ នៅ​តាម​រោង) ដើម្បី​​បាន​​ទស្សនា៕

» រូបភាពដំបូង នៃភាពយន្ដ «មុន​ដំបូង ខ្មែរ​ក្រហម​សម្លាប់​ប៉ា​ខ្ញុំ»


ភាពយន្ដ «មុន​ដំបូង ខ្មែរ​ក្រហម​សម្លាប់​ប៉ា​ខ្ញុំ» របស់ អេនជឺលីណា ជូលី នឹង​​បញ្ចាំង​​ដំបូង​គេ​នៅ​​សៀមរាប

ភាពយន្ដ «មុន​ដំបូង ខ្មែរ​ក្រហម​សម្លាប់​ប៉ា​ខ្ញុំ» របស់ អេនជឺលីណា ជូលី នឹង​​បញ្ចាំង​​ដំបូង​គេ​នៅ​​សៀមរាប

ការទន្ទឹងរង់ចាំ ដើម្បីទស្សនាភាពយន្ដរឿង «មុន​ដំបូង ​ខ្មែរ​ក្រហម​សម្លាប់​ប៉ា​របស់​ខ្ញុំ (First They Killed My Father)» ពិតជាមិនខកបំណងទេ។ ភាពយន្ដ ដែលដឹកនាំដោយនាង អេនជឺលីណា ជូលី (Angelina Jolie) ត្រូវបានផលិតចេញ ជារូបរាង ហើយនឹងគ្រោង​ដាក់បញ្ចាំងដំបូងគេ នៅក្នុងខេត្តសៀមរាប ប្រទេស កម្ពុជា នាថ្ងៃទី១៨ ខែកុម្ភៈ ឆ្នាំ២០១៧ខាងមុខ មុននឹងចេញបញ្ចាំង នៅក្នុងប្រទេសផ្សេងទៀត នៅក្នុងពិភពលោក។

នាង អេនជឺលីណា ជូលី កំពូលតារាហូលីវូដ ដែលក្លាយជាអ្នកដឹកនាំភាពយន្ដ និងមានសញ្ជាតិខ្មែរ បាន​គ្រោង​ធ្វើដំណើរ មកប្រទេសកម្ពុជា ដើម្បីរៀបចំ​ការចាក់បញ្ចាំង​ជាច្រើនទៀត ដែលនឹងធ្វើឡើង នៅតាម​វត្ត​អារាម និង​តំបន់​ដាច់​ស្រយ៉ាល។ នេះបើតាមបទសម្ភាសមួយ ដែលតារាល្បីរូបនេះ បាន​ផ្ដល់​ទៅ​ឲ្យ​​សារព័ត៌មាន​​អង់គ្លេស «The Guardian»។ អ្នកស្រីបានបញ្ជាក់ទៀតថា អ្នកស្រីរួមជាមួយនឹង​តារាសម្ដែង​សំខាន់ៗ​មួយ​ចំនួន នឹងចូលរួមជជែក ពិភាក្សា ឬឆ្លើយទៅនឹងសំណួរ របស់ទស្សនិកជន នៅតាមរោង​ភាពយន្ដ ដែលទទួល​ចាក់​បញ្ជាំង​ភាពយន្ដនេះ។

ភាពយន្ដ «មុន​ដំបូង ​ខ្មែរ​ក្រហម​សម្លាប់​ប៉ា​របស់​ខ្ញុំ» ជាការដកស្រង់រសជាតិ នៃជីវិត«ពិត»ដ៏ខ្លោចផ្សារ នៅ​ក្រោម​របបប្រល័យពូជសាសន៍ ខ្មែរក្រហម របស់​ប្រជាជនខ្មែរម្នាក់ ឈ្មោះ លឿង អ៊ឹង។ ទោះនៅក្នុង​សម័យ​នោះ អ្នកស្រី លឿង អ៊ឹង នៅមានវ័យជាកុមារភាពម្នាក់ (អាយុ៥ឆ្នាំ) ក៏ដោយ តែអ្នកស្រី​បាន​​ចងចាំ​​ហេតុការណ៍ ដ៏​រន្ធត់​តក់ស្លុត ពីសង្គ្រាមព្រាត់ប្រាស់ ដែលបានកើតឡើង ក្នុងទសវត្សន៍ឆ្នាំ៧០ ជាពិសេស​ហេតុការណ៍ នៅនឹងភ្នែក នៃ​ការ​បណ្ដើរ នាំឪពុក​អ្នកស្រីចេញទៅ ពីសំណាក់ក្រុមខ្មែរក្រហម ដែលគ្មានថ្ងៃ​វិល​ត្រឡប់។ ទិដ្ឋភាពនៅក្នុងចិត្ត​អស់ទាំងនោះ បានជំរុញឲ្យអ្នកស្រី សរសេរ​ប្រលោមលោក «មុន​ដំបូង ​ខ្មែរ​ក្រហម​​សម្លាប់​​ប៉ា​​របស់​ខ្ញុំ» នេះឡើង មុននឹងបោះពុម្ភផ្សាយ ជាសៀវភៅនៅក្នុងឆ្នាំ២០០០។

ភាពយន្ដនេះ ត្រូវបានថតជាភាសាខ្មែរ មានតួសំដែងជាខ្មែរទាំងស្រុង និងសហការផលិត រវាងនាង ជូលី និង​លោក ប៉ាន រីទ្ធី (Rithy Panh) សមិទ្ធិករ​ភាពយន្ដ​ ខ្មែរ​-បារាំង​ ដ៏ល្បី​ឈ្មោះ​មួយ​រូបទៀត។ ការផលិតភាពយន្ដ ក៏​មាន​ការ​ចូលរួម ពី​​សំណាក់​​កូន​​ប្រុស​ចិញ្ចឹម​ជនជាតិខ្មែរ របស់នាង ជូលី ឈ្មោះ ម៉ាដុក (Maddox) នោះដែរ។

សម្រាប់ទស្សនិកជនទាំងឡាយ នៅក្នុងពិភពលោក (ក្រៅពីប្រទេសកម្ពុជា) ត្រូវរង់ចាំរយៈពេលយ៉ាងហោច ៧ខែ​ទៀត ដើម្បីទស្សនាភាយន្ដនេះ នៅលើ​គេហទំព័រ «Netflix» ដែលជំនាញខាងភាពយន្ដ និងវីដេអូ។ គេហទំព័រ​នេះ នឹងដាក់បង្ហោះភាពយន្ដ «មុន​ដំបូង ​ខ្មែរ​ក្រហម​​សម្លាប់​ប៉ា​របស់​ខ្ញុំ (ជាភាសា​អង់គ្លេស First They Killed My Father/ ជាភាសាបារាំង D'abord ils ont tué mon père)» ចាប់ពីថ្ងៃទី១៥ ខែកញ្ញា​​តទៅ តែ​​ទស្សនិកជន​ត្រូវបង់ប្រាក់ (ដូចទិញសំបុត្រ ចូលមើល​ភាពយន្ដ នៅតាមរោង) ដើម្បី​បាន​ទស្សនា៕

ចិនសម្ពោធស្ពានខ្ពស់កប់ពពក ខ្ពស់ជាងគេក្នុងលោក

ចិនសម្ពោធស្ពានខ្ពស់កប់ពពក ខ្ពស់ជាងគេក្នុងលោក

ក្នុងទឹកប្រាក់ចំណាយ អស់ប្រមាណជា ១កោដយ័ន (ប្រមាណជា១៣០លានអ៊ឺរ៉ូ ឬ១៤០លានដុល្លារ) ស្ពាន​កប់​ពពក​មួយ​ខ្សែ នៅពីលើដងស្ទឹង «Beipanjiang» ទើបនឹងត្រូវបានសម្ពោធ ដាក់ឲ្យយានយន្ដទាំងឡាយ បើក​បរ​ឆ្លង​កាត់​បាន កាលពីថ្ងៃព្រហស្បត្តិ៍កន្លងមកនេះ។ ស្នាដៃនៃ​ហេដ្ឋារចនា​សម្ព័ន្ធ ដ៏សម្បើមមួយនេះ បាន​តភ្ជាប់​ផ្លូវ​ជាតិ រវាង​ពី​ខេត្ត «Guizhou» ទៅកាន់ខេត្ត «Yunnan» ស្ថិតនៅភាគខាងត្បូង នៃប្រទេសចិន។

ស្ពានដែលមានប្រវែង ១,៣៤គីឡូម៉ែត្រនេះ បានក្លាយជាស្ពានដែលខ្ពស់ជាងគេ នៅក្នុងពិភពលោក ដោយ​សារ​តែ​វា​ត្រូវ​បាន​សាងសង់​ឡើង ភ្ជាប់ចង្កេះភ្នំពីរ ដែលមានកំពស់​៥៦៤ម៉ែត្រ ពីកំពស់ទឹកសមុទ្រ៕

ឥណ្ឌា​ផ្ដើម​សាង​សង់​រូប​ចម្លាក់ ដែល​ខ្ពស់​ជាង​គេ​លើ​លោក

ឥណ្ឌា​ផ្ដើម​សាង​សង់​រូប​ចម្លាក់ ដែល​ខ្ពស់​ជាង​គេ​លើ​លោក

មេដឹកនាំឥណ្ឌា ដែលត្រូវបានចាត់ទុក ថាជាមនុស្សដ៏អស្ចារ្យនោះ មិនមែនមានតែ មហាត្មះ គន្ធី ទេ។ តែរដ្ឋ​បុរស​ឥណ្ឌា​​ដ៏អស្ចារ្យ (ជាងគេ) មួយរូបទៀតនោះ គឺជាព្រះមហាក្សត្រមួយអង្គ ព្រះនាម «Chhatrapati Shivaji» ដែល​បាន​ប្រែ​ក្លាយ​ប្រទេសឥណ្ឌា ឲ្យទៅជាចក្រភពដ៏ធំមួយ នៅក្នុងសតវត្សន៍ទី១៧។ នេះ បើ​តាម​សំដី របស់នាយករដ្ឋមន្ត្រីឥណ្ឌា លោក ណារិនដ្រា ម៉ូឌី (Narendra Modi) ដែលបានថ្លែងឡើង នៅក្នុងពិធី​សម្ពោធ​បើក​ការដ្ឋាន សាងសងរូបចម្លាក់ របស់ព្រះរាជាអង្គនេះ កាលពីថ្ងៃសៅរ៍កន្លងមក នៅលើកោះមួយ ស្ថិត​នៅ​ក្នុង​ឆក​សមុទ្រ​​ភាគ​ខាង​លិច នៃក្រុង ប៊ុមបៃ។

រូបចម្លាក់នេះ នឹងមានកំពស់ដល់ទៅ ១៩២ម៉ែត្រ ខ្ពស់ជាងរូបចម្លាក់ «សេរីភាព» នៅក្រុង ញ៉ូយក (សហរដ្ឋ​អាមេរិក) ពីរដង - ខ្ពស់ជាងរូបចម្លាក់ ព្រះយេស៊ូគ្រឹស្ទ៍ នៅក្រុង រីយ៉ូ (ប្រទសប្រេស៊ីល) ៥ដង និងធំជាង​រូប​ចម្លាក់​យក្ស​​របស់ព្រះពុទ្ធ នៅក្នុងវត្តរដូវផ្ការីក (ប្រទេសចិន) ដែលមានកំពស់ត្រឹមតែ ១២៨ម៉ែត្រ​ប៉ុណ្ណោះ។ លោក​នាយក​រដ្ឋមន្ត្រី ម៉ូឌី បានថ្លែងថា៖ «បុគ្គលលក្ខណៈ និងគុណសម្បត្តិ៍ របស់ព្រះអង្គ (Chhatrapati Shivaji) បាន​ផ្ដល់​ជាគំរូ ឲ្យយើងច្រើនណាស់»។

ការសាងសង់រូបចម្លាក់នេះ មិនមែនជាការពេញចិត្ត សម្រាប់បណ្ដាជនឥណ្ឌា ទូទៅនោះទេ ដោយហេតុថា ដើម្បី​សង់រូបចម្លាក់ របស់ព្រះបាទ «Chhatrapati Shivaji» មួយអង្គនេះ រដ្ឋ«Maharashtra» ដែលស្ថិត​នៅភាគ​ខាង​លិច​ប្រទេស​ឥណ្ឌា ត្រូវចំណាយទឹកប្រាក់ ដល់ទៅ៥៣០លានដុល្លារ (៣៦កោដរ៉ូពី - រូបិយប័ណ្ណក្នុង​ស្រុក)។ ក្រុម​អ្នក​រិះគន់ បាននិយាយថា ទឹកប្រាក់នេះគួរត្រូវបង្វែ យកទៅធ្វើផ្លូវថ្នល់ ស្ពាន សាលារៀន ឬការ​អភិវឌ្ឍន៍​អ្វី​ផ្សេង ប្រសើរជាង។

មកដល់ថ្ងៃនេះ បណ្ដាជនប្រមាណជា ៣៨០០០នាក់ បានចូលរួមគាំទ្រញត្តិមួយ ដែលធ្វើនៅលើគេហទំព័រ «Change.org» ស្នើសុំទៅរដ្ឋាភិបាលឥណ្ឌា ឲ្យបោះបង់ចោល នូវគម្រោងសាងសង់​រូបចម្លាក់​ខាងលើ ដែល​នឹង​​ត្រូវ​​សង់​រួច​រាល់ នៅឆ្នាំ២០១៩ខាងមុខ។

ប៉ុន្តែគម្រោងរូបចម្លាក់មួយនេះ មិនមែនជា​គម្រោង​លើកដំបូង របស់រដ្ឋាភិបាលឥណ្ឌា ដឹកនាំដោយលោក ណារិនដ្រា ម៉ូឌី នោះទេ។ កាលពីឆ្នាំ២០១៤ រូបចម្លាក់មួយ នៃ​បីតា​ឯករាជ្យជាតិឥណ្ឌា លោក «Sardar Vallabbhai Patel» ដែលមានកំពស់ ដល់ទៅ១៨២ម៉ែត្រ ក៏ត្រូវបានលោក ម៉ូឌី អញ្ជើញ​ទៅ​បើក​ការដ្ឋាន​ដែរ។ រូប​ចម្លាក់​នេះ ស្ថិតនៅក្នុងរដ្ឋ «Gujarat (ភាគខាងលិចឥណ្ឌា និងខាងជើង​ជាប់​រដ្ឋ​ ​Maharashtra)» ហើយ​ត្រូវ​ចំណាយ​ទឹក​ប្រាក់ ប្រមាណ​ជា ៣៧០លានដុល្លារ៕

» ទិដ្ឋភាព​នៃរូបចម្លាក់​ខ្ពស់ជាងគេ ក្នុងពិភពលោក បង្ហាញជូនជាលក្ខណៈ "3D"៖

តួ​ឯក​បាន​លា​ចាក​លោក នៅ​មុន​ភាពយន្ដ «Les Pépites» ចេញ​បញ្ចាំង

តួ​ឯក​បាន​លា​ចាក​លោក នៅ​មុន​ភាពយន្ដ «Les Pépites» ចេញ​បញ្ចាំង

តួឯកម្នាក់​បានស្លាប់ បន្ទាប់ពីបាន​ថត​ភាពយន្ដមួយ ស្ដីពីវីរភាពរបស់ខ្លួន បានចប់សព្វគ្រប់។ វាមិនមែនជា​គម្រោង របស់អង្គការ​ដើម្បី​ភាព​ញញឹមនៃកុមារ (ហៅកាត់តាមភាសាបារាំង PSE) ហើយក៏កាន់តែមិនមែន​ជា​ការ​គិតទុកមុន របស់កុមារទុរគតខ្មែរ​​រាប់ពាន់ម៉ឺននាក់ ដែល​ត្រូវបានតួឯករូបនេះ លះបង់ស្វះស្វែង និង​ធ្វើ​អ្វី​គ្រប់​បែប​យ៉ាង ដើម្បីជួយសង្គ្រោះ ពួកគេនោះឡើយ។

តែ​ភាពយន្ដឯកសាររឿង «Les pépites» ជាគម្រោង​របស់លោក ហ្សាវីយ៉េ ឌឺឡូហ្សាន (Xavier de Lauzane) សមិទ្ធិករ​ភាពយន្ដបារាំង ដែលចង់លើកយកមកបង្ហាញ នៅលើផ្ទាំងសំពត់ស ពី​សកម្មភាព​មនុស្សធម៌​ដ៏​កម្រ ដែល​សឹងមិនគួរឲ្យជឿបាន របស់តួឯកពីរនាក់ គឺលោក គ្រីស្យង់ ដេប៉ាលីយ៉ែរ (Christian des Pallières) និង​ភរិយា អ្នកស្រី ម៉ារីហ្វ្រង់ ដេប៉ាលីយ៉ែរ (Marie-France des Pallières) ស្ថាបនិក​អង្គការ​ដើម្បី​ភាព​​ញញឹម​នៃ​កុមារ​​នោះ​តែម្ដង។

ភាពយន្ដនោះ បានរៀបរាប់តាំងពីដើមដំបូង នៃដំណើរផ្សងព្រេង របស់ប្ដីប្រពន្ធជាតិបារាំងពីរនាក់ ជា​ពិសេស​គឺលោក គ្រីស្យង់ ដេប៉ាលីយ៉ែរ ដែលធ្លាប់ធ្វើការ នៅក្នុងក្រុមហ៊ុនបច្ចេកវិទ្យាដ៏ល្បី ឈ្មោះ «IBM» តែ​បាន​ចុះ​ទៅ​កាន់​​ប្រទេសកម្ពុជា ក្នុងដំណើរ​បេសកកម្ម​​មនុស្សធម៌​មួយ បន្ទាប់ពីលោកបានចូល​និវត្តន៍ តាំង​ពី​ជាង​២០ឆ្នាំ​មុន។

នៅពេលដំបូង​ឡើយ លោក គ្រីស្យង់ និងភរិយា គ្រាន់តែមានគោលគំនិត​នៅក្នុងខ្លួន ដូចមនុស្សជាច្រើន​ក្នុង​លោក ដែលតែងគិតថា នៅពេលខ្លួនចាស់​ចូលនិវត្តន៍ទៅ ចង់«ដើរកំសាន្ដ ទៅឲ្យបានឆ្ងាយ... លះបង់​ចោល​គ្រប់​យ៉ាង ហើយចង់ធ្វើអ្វីមួយដើម្បីរកន័យ ឲ្យជីវិតចុងក្រោយរបស់ខ្លួន»។ សម្រាប់ស្វាមីភរិយា​ទាំង​ពីរ​នាក់ វា​ជា​ក្ដី​សុបិន្ដ​មួយ ហើយពួកគាត់​ចង់ឲ្យក្ដីសុបិន្តនោះ ក្លាយជាការពិត។

ប៉ុន្តែ បន្ទាប់ពីបាន​ចុះ​ទៅ​ដល់​កម្ពុជា អ្នកទាំងពីរ​បានឃើញដោយផ្ទាល់ភ្នែក ប្រកបដោយភាពតក់ស្លុត នូវ​ទិដ្ឋភាព​​ដ៏ខ្លោចផ្សារ នៃកុមារខ្មែរ​រាប់​សិប​នាក់ ដែលកំពុង​នៅពីលើ​វាលចាក់​សម្រាម​ដ៏ធំមួយ ភាគនារតី​នៃ​រាជធានី​​ភ្នំពេញ។ កុមារទាំងនោះ មិនបានទៅសាលាទេ។ ផ្ទុយទៅវិញ ពួកគេ​កំពុង​ធ្វើការងារ​​របស់​ពួក​គេ ក្នុង​ការ​​កាយ​​រក​កាកសំណល់ ដើម្បីចិញ្ចឹមជីវិត មិនថាយប់ឬថ្ងៃ។

ពីពេលនោះហើយ ដែលគម្រោងរំដោះកុមារ ចេញពីទុរគតភាព បានចាប់ផ្ដើមឡើង។ ប្ដីប្រពន្ធ ដេប៉ាលីយ៉ែរ បាន​ធ្វើ​រោងស្បូវតូចមួយ នៅក្បែរវាលចាក់សម្រាម ដើម្បីចែកអាហារទៅឲ្យកុមារ មុននឹងធ្វើគម្រោង​បង្កើត​សាលា​រៀន ដើម្បីផ្ដល់ការអប់រំ ទៅឲ្យពួកគេ។ ចេញពី​គម្រោង​នេះ ទើបសមាគម «ដើម្បីភាព​ញញឹម​នៃ​កុមារ» ដែល​ភាសា​​បារាំង​​មាន​ន័យថា «Pour un Sourire d'Enfant» (នៅកម្ពុជា ស្ថាប័ននេះជាអង្គការ តែ​នៅ​បារាំង គឺ​ជា​​សមាគម) ត្រូវបានបង្កើតឡើងឃើញពន្លឺថ្ងៃ។

អ្នកដែលបាន​ទស្សនា​ភាពយន្ដ​ឯកសារ​នេះ ក្នុងជំហានដំបូង (ជំហាន​មុន​ការ​ចេញ​បញ្ចាំង​ជាផ្លូវការ) សុទ្ធ​តែ​បាន​លាន់មាត់ ទ្រាំមិនហើបគូថ​ពីកៅអី​មិនបាន ដើម្បីកោតសរសើ ពីវីរភាព និងជាពិសេសពីសមានចិត្ត របស់​ស្វាមី​​ភរិយា​​ទាំងពីរនាក់។ តែការកោតសរសើនោះ ក៏បាន​កើត​ឡើង​ព្រមគ្នា ជាមួយនឹង​ការ​រំជួល​ចិត្ត​នោះ​ដែរ។ គឺ​ជា​ការ​រំជួល​ចិត្ត ដែល​ធ្វើឲ្យអ្នក​ទស្សនាខ្លះ បានបង្ហូទឹកភ្នែក។

ថ្ងៃនេះ ខុសពីថ្ងៃម្សិលម៉ិញ...

តែនៅពេលនេះ ទស្សនិកជន​នៅជុំវិញផែនដី ជាពិសេសកុមារៗខ្មែរ ទាំងរាប់ពាន់ម៉ឺននាក់ កំពុងតែយំ... និង​បន្ត​យំ​រហូត​ទៅ... បើទោះជាពួកគេ មិនទាន់​បាន​ទស្សនា​ ភាពយន្ដ​ឯកសារ​នេះ​ក៏​ដោយ។ «យំ» ព្រោះ​លែង​​មាន​មនុស្ស ដែលពួកគេហៅ «ប៉ាពី (Papy - ពាក្យបារាំង​សម្រាប់ហៅ លោកតា)» ដូច«ប៉ាពី»របស់​ពួកគេ​​នេះ​ទៀត។ «យំ» ព្រោះតួឯកនៅក្នុងភាពយន្ដឯកសារ និងជាស្ថាបនិកម្នាក់ នៃគម្រោងសង្គ្រោះកុមារដ៏​អស្ចារ្យ ត្រូវ​បាន​មច្ចុរាជ​ឆក់យកជីវិត ទៅជារៀងរហូត កាលពីល្ងាចថ្ងៃសៅរ៍ទី២៤ ខែកញ្ញាកន្លងមកនេះ ក្រោម​មូលហេតុ​រោគា​​ពាធ ក្នុង​អាយុ​៨១ឆ្នាំ (នៅកម្ពុជា គេចាត់ទុកលោក មានអាយុ៨២ឆ្នាំ)៕

----------------------

» ស្ប៉តពាណិជ្ជកម្ម របស់ភាពយន្ដឯកសាររឿង «Les pépites» ដែលគ្រោងចេញបញ្ចាំង នៅថ្ងៃ៥ ខែ​តុលា ខាងមុខ៖