Posts tagged as "Angela Merkel"

បារាំង​រើស​បាន​ប្រធានាធិបតី​ថ្មី ភ័យ​ឯ​អង់គ្លេស​ឯណោះ!

បារាំង​រើស​បាន​ប្រធានាធិបតី​ថ្មី ភ័យ​ឯ​អង់គ្លេស​ឯណោះ!

បើសិនជាអ្នកស្រី ថេរីសា មេ (Theresa May) នាយករដ្ឋមន្ត្រីអង់គ្លេស បានប្រញាប់​ប្រញាល់ សំដែងនូវ​ក្ដី​អបអរ​ ចំពោះ​ជ័យជំនះ​របស់​លោក អេម៉ានុយអែល ម៉ាក្រុង (Emmanuel Macron) នៅក្នុងការ​បោះឆ្នោត​ជ្រើស​រើស​​ប្រធានាធិបតី របស់​ប្រទេស​បារាំងនោះ សម្រាប់ក្រុមអ្នកប្រឆាំងសហភាព​អ៊ឺរ៉ុបវិញ បានគិត​ឃើញ​ថា ការ​ឡើង​មក​កាន់​អំណាច របស់លោក ម៉ាក្រុង ដែលមាននយោបាយការពារអ៊ឺរ៉ុប​យ៉ាងខ្ជាប់ខ្ជួន គឺជាការ​គម្រាម​ទៅ​ដល់ការ​ចរចា​​ទាំងឡាយ ដែលពាក់ព័ន្ធនឹងផលប្រយោជន៍អង់គ្លេស ដើម្បីឲ្យអង់គ្លេស បានចាកចេញ​ពីសហភាព​អ៊ឺរ៉ុប។

«មិនមែនដូចការដើរកំសាន្ដ ចង់ចេញចង់ចូល ក្នុងសួនឧទ្យានទេ»

ដូចសារព័ត៌មាន​ស្ដាំនិយម​អង់គ្លេស ឈ្មោះ «The Daily Telegraph» បានសរសេរ រំលឹកពីសំដី របស់​អនាគត​ប្រធានាធិបតី​បារាំង ដែលមានវ័យក្មេងជាង​គេ​បំផុត​នេះ ដែលបានថ្លែងនៅក្នុងយុទ្ធនាការ​រក​សម្លេង​ឆ្នោត ថា​ ការ​ចាក​ចេញ​របស់អង់គ្លេស ពីសហភាពអ៊ឺរ៉ុប «មិនមែនដូចជាការដើរកំសាន្ដ នៅក្នុងសួនឧទ្យាន»​នោះ​ទេ។ នៅ​ក្នុង​អត្ថបទ​របស់​ខ្លួន ដែលមានចំណងជើង «ក្ដីសង្ឃឹមថ្មីរបស់បារាំង បង្កឲ្យមានពពក​ដេដាស សម្រាប់​ការ​ចាក​ចេញ របស់​អង់គ្លេស» សារព័ត៌មាន​ចេញផ្សាយ​ប្រចាំថ្ងៃ បានសរសេរបន្ត​​ពីការសន្យា របស់​លោក ម៉ាក្រុង ដែល​នឹង​ការពារ នូវ​ផល​ប្រយោជន៍ នៃទីផ្សាររួម​ដ៏ធំតែមួយ​​របស់អ៊ឺរ៉ុប។

នៅក្នុងការថ្លែង ទៅកាន់ក្រុមអ្នកគាំទ្រ បន្ទាប់ពីលោកបានឈ្នះឆ្នោត កាលពីយប់ថ្ងៃទី៧ ខែឧសភា​នេះ លោក​ អេម៉ានុយអែល ម៉ាក្រុង បានអះអាងជាថ្មី ដោយសម្លេងខ្លាំងៗ ថាលោកនឹងធ្វើអ្វីៗគ្រប់យ៉ាង ដើម្បី​«ការពារ​អ៊ឺរ៉ុប» ខណៈ​ឥស្សរៈជន​ជាច្រើន​​នៅក្នុង​សហភាព បាននិយាយ​ប្រហាក់ប្រហែល​គ្នា ថាការឈ្នះ​ឆ្នោត​របស់​លោក ម៉ាក្រុង នឹង​ធ្វើឲ្យអ៊ឺរ៉ុប មានសន្ទុះ​កាន់តែខ្លាំង​ឡើង។ ដូចពាក្យ​មួយឃ្លា របស់​លោក «Steffen Seibert» អ្នក​នាំពាក្យ​របស់​អ្នកស្រី អង់ជឺឡា មែរគែល (Angela Merkel) អធិការបតី​អាល្លឺម៉ង់ ដូច្នេះ​ថា៖ «ជា​ជ័យជំនះ ​សម្រាប់​សហភាព​អ៊ឺរ៉ុប ដែល​ខ្លាំង និង​រួបរួម ជាពិសេស​សម្រាប់​​មិត្តភាព បារាំង-អាល្លឺម៉ង់»។

កាលពីខែមីនាកន្លងទៅ លោក អេម៉ានុយអែល ម៉ាក្រុង បានផ្ដល់កិច្ចសម្ភាស ទៅឲ្យ​ទស្សនាវដ្ដី «Monocle» ​អះអាង​ថា​លោកពេញចិត្ត ឲ្យមាន​«ការចាកចេញដ៏ពិបាកមួយ របស់អង់គ្លេស ពីអ៊ឺរ៉ុប» និង​បដិសេធ​ការ​ផ្ដល់​ប្រយោជន៍​គ្រប់​យ៉ាង ទៅឲ្យទីផ្សារ​ដាច់​​ដោយឡែក ក្នុងទឹកដី​អង់គ្លេស។ លោក ម៉ាក្រុង បានចាត់​ទុក​ការ​សម្រេច​ចាក​ចេញ របស់អង់គ្លេស ពីអ៊ឺរ៉ុប គឺជា​គ្រោះ​មួយ និងបានចោទ​អតីត​ប្រធាន​គណបក្ស «Ukip» ​(និន្នាការ​​ប្រឆាំង​​សហភាព​​អ៊ឺរ៉ុប) លោក «Nigel Farage» និង​លោក បូរីស ចនសុន (Boris Johnson) រដ្ឋមន្ត្រី​ការ​​បរទេស​អង់គ្លេស​សព្វថ្ងៃ ថាជា«អ្នកទទួលខុសត្រូវ ចំពោះអំពើឧក្រិដ្ឋ»មួយនេះ។

» លោក បូរីស ចនសុន និងអ្នកស្រី ថេរីសា មេ៖

«ម៉ាក្រុង អាយ៉ង របស់ប្រធានគណៈកម្មការអ៊ឺរ៉ុប»

ដោយសារតែជំហរអស់ទាំងនេះ របស់លោក អេម៉ានុយអែល ម៉ាក្រុង ហើយ ទើបសារព័ត៌មានខ្លះ​របស់​អង់គ្លេស មិន​សូវ​ជា​រវីរវល់​នឹងជ័យជំនះ របស់លោក ក្នុងការបោះឆ្នោត​ប្រធានាធិបតីបារាំងទេ។

ដូចយ៉ាង​សារព័ត៌មាន «The Sunet Daily Mail» (និន្នាការចង់ឲ្យអង់គ្លេស ចេញពីអ៊ឺរ៉ុប) សុខចិត្ត​និយាយ​ពី​ការ​អោប​ថើប រវាងព្រះអង្គម្ចាស់ «Harry» ជាមួយនឹងគូដណ្ដឹង​របស់ព្រះអង្គ គឺតារាបង្ហាញម៉ូដ នាង «Meghan Markle» ទៅ​វិញ។ រីឯ​សារព័ត៌មាន «The Sun» បាន​យក​ព្រឹត្តិការណ៍ នៃការបោះឆ្នោត​ប្រធានាធិបតីបារាំង ទៅ​ចុះ​ផ្សាយ​នៅ​ក្នុង​ទំព័រ​ខាងក្នុង​របស់ខ្លួន ដោយគូសបញ្ជាក់ថា ប្រធានាធិបតី​បារាំង​ថ្មី ធ្លាប់បានព្រមាន​ក្រុង​ឡុងដ៍​រួច​ហើយ ថានៅ​ពេល​ដែល​អង់គ្លេស ចង់​ចាកចេញ​ពីអ៊ឺរ៉ុប ចក្រភព​មួយ​នេះ​នឹងមិនទទួល​បាន​លក្ខខណ្ឌ​ល្អ​ប្រសើរ​នោះ​ទេ។

រីឯលោក «Nigel Farage» (អតីតប្រធាន​គណបក្ស​ប្រឆាំង​អ៊ឺរ៉ុប «Ukip») ដែលជាអ្នក​គាំទ្រ​អ្នកស្រី ម៉ារីន ឡឺពែន (Marine Le Pen) បេក្ខនារី​ចាញ់ឆ្នោត​ទល់​នឹង​លោក ម៉ាក្រុង នោះ​វិញ បានហៅ​ការ​ជាប់ឆ្នោត របស់​លោក អេម៉ានុយអែល ម៉ាក្រុង ថា​ជាការ​យល់ច្រឡំ​ដ៏ធំ។ លោកបាន​សរសេរ នៅលើទំព័រទ្វីសធើ​របស់​លោក​ថា៖ «លោក ម៉ាក្រុង នឹងក្លាយ​ជាអាយ៉ង របស់​លោក "Juncker (ប្រធាន​គណៈកម្មការ​អ៊ឺរ៉ុប)"»។

«បរាជ័យរបស់បារាំង ដូចក្នុងឆ្នាំ១៩៤០»

សម្រាប់ចលនា «Leave.EU» ដែលជាចលករដ៏ធំមួយ បំផុសឲ្យ​មានការ​ចាកចេញ របស់​អង់គ្លេស ពីអ៊ឺរ៉ុប បាន​ដើរ​ចេញ​ឆ្ងាយ រៀង​ជ្រុល​បន្តិច ដោយសំដែង «មរណទុក្ខដ៏ក្រៀមក្រំ» សម្រាប់​ប្រទេសបារាំង ដែលបាន​បោះឆ្នោត​ ផ្ដល់ជ័យជំនះ​ឲ្យ​លោក ម៉ាក្រុង។ ចលនា​នេះ ថែមទាំងបានប្រៀបធៀប​លទ្ធផល នៃការ​បោះ​ឆ្នោត​​ប្រធានាធិបតី​បារាំង ថា​មាន​​លក្ខណៈ «ស្មើ» នឹង​បរាជ័យ របស់​​ប្រទេស​​បារាំង នៅចំពោះ​​ប្រទេស​អាល្លឺម៉ង់ ក្នុង​ឆ្នាំ១៩៤០ (សង្គ្រាម​លោក​លើក​ទីពីរ)។

ចលនា «Leave.EU» បានសរសេរនៅលើទំព័រទ្វីសធើររបស់ខ្លួនថា៖ «ហេតុការណ៍ នៅ​ឆ្នាំ១៩៤០ គឺ​ជា​ការ​ជ្រួល​ច្របល់ ភ័យភិត​ដ៏ខ្លាំង សម្រាប់​ប្រជាជន​បារាំង។ តែនៅ​ពេលនេះ ប្រជាជន​បារាំង បែរជា​ជួយ​ផ្ដល់ ទៅ​ឲ្យ​ប្រទេស​អាល្លឺម៉ង់ នូវ​ប្រេង​ឥន្ទនៈ និង​គ្រាប់​កាំភ្លើង​ទៅវិ​ញ។»៕

ត្រាំ អបអរ ម៉ាក្រុង ដែលទើបជាប់ឆ្នោត ជាប្រធានាធិបតីបារាំង

ត្រាំ អបអរ ម៉ាក្រុង ដែលទើបជាប់ឆ្នោត ជាប្រធានាធិបតីបារាំង

មេដឹកនាំនៅជុំវិញពិភពលោក បានសំដែងការអបអរសាទរ ជ័យជំនះរបស់លោក អេម៉ានុយអែល ម៉ាក្រុង (Emmanuel Macron) ដែលទើបនឹងជាប់ឆ្នោត ជាប្រធានាធិបតីបារាំងជំនាន់ទី៨ នៅក្នុងការបោះឆ្នោតជុំទីពីរ នាថ្ងៃអាទិត្យទី៧ ខែឧសភានេះ។

មុនគេបង្អស់ លោក ដូណាល់ ត្រាំ (Donald Trump) ប្រធានាធិបតីអាមេរិក បានយកទំព័រទ្វីសធើររបស់លោក ដើម្បីថ្លែងពីទឹកចិត្តរបស់លោក ចំពោះលោក ម៉ាក្រុង និងបានអះអាងថា លោករង់ចាំ​ធ្វើការ​ជាមួយលោក ម៉ាក្រុង ខ្លាំងណាស់។ លោក ត្រាំ បានសរសេរថា៖ «អបអរសាទរ ជូនលោក អេម៉ានុយអែល ម៉ាក្រុង ចំពោះជ័យជំនះដ៏ធំធេងរបស់លោក នៅថ្ងៃនេះ ដើម្បីក្លាយជាប្រធានាធិបតីថ្មី របស់ប្រទេសបារាំង។ ខ្ញុំកំពុងរង់ចាំយ៉ាងអន្ទះសារ ដើម្បីធ្វើការរួមគ្នាជាមួយលោក។»។

បន្ទាប់មកទៀត អ្នកស្រី អង់ជឺឡា ម៉ែរគែល (Angela Merkel) អធិការបតីនៃប្រទេសអាល្លឺម៉ង់ ក៏បានទរស័ព្ទមកអបអរដោយផ្ទាល់ ជូនទៅលោក ម៉ាក្រុង ដែរ។ នេះ បើតាមអ្នកស្រី «Laurence Haïm» អ្នកនាំពាក្យរបស់លោក ម៉ាក្រុង។ អ្នកនាំពាក្យរូបនេះ បានអះអាងថា នេះ ជាការជជែកដោយផ្ទាល់បំបូងគេបង្អស់ របស់លោក អេម៉ានុយអែល ម៉ាក្រុង ជាមួយមេដឹកនាំបរទេស។

បន្ទាប់មកទៀត មេដឹកនាំសឹងតែទាំងអស់ នៅអ៊ឺរ៉ុបខាងលិច និងក្នុងសហភាពអ៊ឺរ៉ុប ក៏សុទ្ធតែបានផ្ញើរសារ ដើម្បីថ្លែងសាទរ ទៅដល់ជ័យជំនះមួយនេះ ដែលត្រូវបានចាត់ទុក ជាជ័យជំនះសម្រាប់«សហភាពអ៊ឺរ៉ុបមួយ ខ្លាំង និងយុត្តិធម៌»។

លោក «Jean-Claude Juncker» ប្រធានគណៈកម្មការអ៊ឺរ៉ុប បានសរសេរ នៅលើទំព័រទ្វីសធើររបស់លោកថា៖ «រីករាយណាស់ ដែលប្រជាជនបារាំង បានជ្រើសរើសអនាគត (នៅក្នុង) សហភាពអ៊ឺរ៉ុប។ រួមគ្នា ដើម្បីសហភាពអ៊ឺរ៉ុបមួយ ដែលខ្លាំង និងយុតិធម៌ជាងមុន។»។

ចំពោះលោក «Donald Tusk» ប្រធានក្រុមប្រឹក្សាអ៊ឺរ៉ុប បានចាត់ទុកជម្រើសរបស់ប្រជាជនបារាំង ថាពោរពេញទៅដោយ «សេរីភាព សមភាព និងភេតរភាព» ដែលជាបាវចនាទាំងបី របស់សាធារណរដ្ឋបារាំង។ រីឯលោក «Antonio Tajani» ប្រធានសភាអ៊ឺរ៉ុប បានសរសេរនៅលើបណ្ដាញសង្គមដែរថា៖ «យើងទុកចិត្តទាំងស្រុង ចំពោះប្រទេសបារាំង នៅក្នុងបេះដូងនៃសហភាពអ៊ឺរ៉ុប ដើម្បីការផ្លាស់ប្ដូរ និងការខិតទៅជិត ពលរដ្ឋអ៊ឺរ៉ុប»។

សម្រាប់នាយករដ្ឋមន្ត្រីអង់គ្លេស អ្នកស្រី ថេរីសា មេ (Theresa May) វិញ បានអបអរសាទរ «យ៉ាងកក់ក្ដៅ» ជាទីបំផុត ចំពោះជ័យជំនះរបស់លោក ម៉ាក្រុង និងបានអះអាងថា អ្នកស្រីនឹងរង់ចាំធ្វើការ ជាមួយលោក នៅក្នុងសំនុំរឿងជាអទិភាពជាច្រើន។ «យើងសហការរួមគ្នា ទាំងនៅក្នុងប្រទេសបារាំង និងអេស្ប៉ាញ ដើម្បីសហភាពអ៊ឺរ៉ុបមួយមានស្ថិរភាព និងរួបរួមគ្នាជាងមុន» នេះ បើតាមលោក ម៉ារីយ៉ាណូ រ៉ាហ័យ (Mariano Rajoy) នាយករដ្ឋមន្ត្រីអេស្ប៉ាញ។

លោក «Charles Michel» នាយករដ្ឋមន្ត្រី នៃរាជាណាចក្រ​ប៊ែលហ្សិក បានចាត់ទុកជ័យជំនះ របស់លោក ម៉ាក្រុង ជាការទាត់ចោលពីសំណាក់ប្រជាជនបារាំង នូវកម្មវិធីនយោបាយដ៏គ្រោះថ្នាក់ និងពោរពេលដោយការស្អប់ខ្ពើម របស់ក្រុមស្ដាំនិយមជ្រុល របស់ប្រទេសបារាំង។ ព្រះបរមរាជវាំងប៊ែលហ្សិក ក៏បានថ្លែងអះអាងដែរថា ប្រជាជនបារាំងបញ្ចេញសម្លេង ដើម្បីប្រទេសបារាំង និងដើម្បីសហភាពអ៊ឺរ៉ុប។

អនាគតប្រធានាធិបតីបារាំង ដែលទើបនឹងជាប់ឆ្នោត លោក អេម៉ានុយអែល ម៉ាក្រុង នឹងចូលស្បថកាន់តំណែង នៅថ្ងៃទី១៤ ខែឧសភាខាងមុខ (នៅមិនទាន់កំណត់ជាផ្លូវការនៅឡើយ)៕

រូបថត មែរគែល កាត់​ត​ទៅ​ជា ហ៊ីត្លែ បង្ក​ឲ្យ​ផ្ទុះ​រឿង​អាស្រូវ

រូបថត មែរគែល កាត់​ត​ទៅ​ជា ហ៊ីត្លែ បង្ក​ឲ្យ​ផ្ទុះ​រឿង​អាស្រូវ

រូបថតរបស់អ្នកស្រី អង់ជឺឡា មែរគែល (Angela Merkel) កាត់តបន្ថែម ជាមួយសម្លៀកបំពាក់ ណាហ្សី រួមនឹងពុកមាត់តូចមួយ ហើយដែលត្រូវបានសារព័ត៌មាន «Günes» ស្និតនឹងរដ្ឋាភិបាលតួកគី យកមកចុះផ្សាយ នៅនឹងទំព័រមុខ កាលពីថ្ងៃសុក្រកន្លងមកនេះ បានចាក់ប្រេងសាំង បន្ថែមទៅលើភាពតានតាំង ដែលបានកើតឡើង តាំងពីច្រើនថ្ងៃមកហើយ រវាងរដ្ឋាភិបាលក្រុង អង់ការ៉ា (Ankara) ជាមួយនឹងរដ្ឋាភិបាលក្រុង ប៊ែរឡាំង (Berlin)។ ទន្ទឹមនឹងនេះ សង្គ្រាមពាក្យសំដី ដ៏សែនមុតស្រួច ក៏បានផ្ទុះឡើងដែរ។

នៅជាមួយនឹងរូបថតកាត់តនេះ សារព័ត៌មាន «Günes» នៅបានបន្ថែមចំណងជើងធំៗ ដូច្នេះថា៖ «ហ៊ីត្លែ ម្នាក់ ដែលមានរូបរាងជាស្ត្រី»។ នេះជារូបថតពេញទាំងស្រុង៖

ការផ្សាយរបស់សារព័ត៌មានខាងលើ បានធ្វើឡើង នៅបន្ទាប់ពីប្រធានាធិបតី ​របស់ប្រទេសតួកគី លោក «Recep Tayyip Erdogan» បានថ្លែងចោទប្រកាន់ជាសាធារណៈ ប្រទេសអាល្លឺម៉ង់ និងប្រទេសហូឡង់ ថាបានប្រកាន់ចរិតបែប «ណាហ្សី ហ៊ីត្លែ» ក្រោយពីប្រទេសទាំងពីរ បានហាមឃាត់នៅលើទឹកដី របស់ផងខ្លួន មិនឲ្យបណ្ដាជនមានដើមកំណើតតួកគី ជួបប្រជុំគ្នា។ ការជួបប្រជុំទាំងនោះ មានបំណងដើម្បីឃោសនា ឲ្យការធ្វើប្រជាមតិមួយ ដែលគ្រោងធ្វើ​នៅក្នុងប្រទសតួកគី ក្នុងបុព្វហេតុពង្រីកអំណាច ឲ្យទៅរបបប្រធានាធិបតី ជាពិសេស របបដឹកនាំដោយលោក «Recep Tayyip Erdogan» សព្វថ្ងៃ។

«មិនខុសអ្វី ពីហ៊ីត្លែ...»

នៅក្នុងអត្ថបទរបស់ខ្លួន សារព័ត៌មាន «Günes» បានសរសេរជាអាទិ៍ថា៖ «ជាមួយនឹងការអោបក្រសោប អង្គការភេរវនិយមនានា (...) ប្រទេសអាល្លឺម៉ង់ បានពន្យុះទ្វីបអ៊ឺរ៉ុបទាំងមូល ឲ្យប្រឆាំងនឹងប្រទេសតួកគី»។ សារព័ត៌មាននៅបានលើក មករាយការណ៍ទៀត ពីការចោទប្រកាន់ទាំងឡាយ របស់រដ្ឋាភិបាល តួកគី ដែលនិយាយថា រដ្ឋាភិបាលក្រុង ប៊ែរឡាំង បានផ្ដល់ជំរកទៅឲ្យ បណ្ដាជនភាគតិច គួដ ដែលនិយមបំបែកទឹកដី និងទៅឲ្យក្រុមក្បត់ ដែលបានធ្វើរដ្ឋប្រហារ មិនបានសម្រេច ក្នុងប្រទេសតួកគី កាលពីថ្ងៃទី១៥ ខែកក្កដាកន្លងមក។

នៅលើគេហទំព័រ របស់សារព័ត៌មាននេះ ក៏មានឃើញរូបថតកាត់ត ប្រហាក់ប្រហែលគ្នា ត្រូវបានយកមកបង្ហោះផ្សាយដែរ។ គេហទំព័របានសរសេរចំណងជើងថា៖ «មិនខុសអ្វី ពីហ៊ីត្លែ»។

តបនឹងការចោទប្រកាន់នោះ អធិការបតីអាល្លឺម៉ង់ អ្នកស្រី អង់ជឺឡា មែរគែល បានអំពាវនាវឲ្យប្រទេស តួកគី អត់ធ្មត់ និងប្រកាន់«ចិត្ត​​ឲ្យត្រជាត់»។ អ្នកនាំពាក្យរបស់អធិការបតី លោក «Steffen Seibert» បានអះអាងថា ការប្រៀបធៀបទាំងឡាយណា ទៅនឹងរបបណាហ្សីនិយម នឹងមិនអាចទទួលយកបាន និងមានលក្ខណៈខុសទំនង ដោយសារតែការប្រៀបធៀបទាំងនោះ មានចរិតអត់អោន ឲ្យឧក្រិដ្ឋកម្មប្រឆាំងនឹងមនុស្សជាតិ ដែលបង្កឡើងដោយរបប ជាតិ-សង្គមនិយមជ្រុល (របស់ហ៊ីត្លែ)។

នៅមុននេះ ប្រទេសតួកគី បានប្រតិកម្មដូចគ្នា ទៅនឹងការចុះផ្សាយមួយ របស់ទស្សនាវដ្ដីអាល្លឺម៉ង់ ឈ្មោះ «Bild» ដែលបានលើកហេតុផល «ចំពោះមុខជាច្រើន» មកពន្យល់ថា លោកប្រធានាធិបតីតួកគី «Recep Tayyip Erdogan» មិនគួរជាមនុស្ស ដែលត្រូវបានស្វាគមន៍ (Persona non grata) នៅក្នុងទឹកដីអាល្លឺម៉ង់ទេ។ ទស្សនាវដ្ដីនៅបានបរិហារលោក «Erdogan» ថាជាមនុស្ស«ឆ្កួត» នឹងអំណាចនោះផងទៀត។ ការចុះផ្សាយនោះ ត្រូវបាន​ក្រសួងការបរទេស តួកគី ចាត់ទុកថា ជា«ផ្លែផ្កានៃផ្នត់គំនិតមួយ ដែលកើតចេញ ពីការប្រកាន់ពូជសាសន៍ និងការរើសអើង ប្រឆាំងនឹងបរទេសនិយម»៕

ភេរវកម្ម​នៅ​ប៊ែរឡាំង៖ ISIS ទម្លាយ​វីដេអូ​ស្បថ របស់​ជន​សង្ស័យ

ភេរវកម្ម​នៅ​ប៊ែរឡាំង៖ ISIS ទម្លាយ​វីដេអូ​ស្បថ របស់​ជន​សង្ស័យ

ទីភ្នាក់ងារ «Amaq» ដែលជាឧបករណ៍ឃោសនា របស់ក្រុមរដ្ឋអ៊ីស្លាម (ពាក្យ​អារ៉ាប់​ហៅ Daech ពាក្យ​កាត់​​បារាំង​​​ហៅ EI អង់គ្លេស​​​​ហៅ ISIS) បានបង្ហោះនៅល្ងាចថ្ងៃសុក្រនេះ បង្ហាញពីជនសង្ស័យជាតិទួនេស៊ី អាយុ​២៤ឆ្នាំ ដែល​ទើប​នឹង​ត្រូវ​​នគរបាល​​អ៊ីតាលី បាញ់សម្លាប់កាលពីព្រឹកព្រហាម ថ្ងៃដដែលនេះ។

ក្នុងវីដេអូនោះ (ដាក់ជូនខាងក្រោម) ជនសង្ស័យឈ្មោះ អានីស អាមរី (Anis Amri) បានធ្វើការស្បថស្បែ បម្រើ​ប្រមុខ​ដឹកនាំ​អង្គការភេរវនិយម ឈ្មោះ អាប៊ូ បាក្រ៍ អាល់បាដាឌី (Abou Bakr al-Baghdadi) យ៉ាង​ស្មោះ​ស្ម័គ្រ និង​ដោយ​ឥត​ងាករេ។ ជនសង្ស័យ ដែលពាក់អាវរងារ ឈរថតវីដេអូនេះ នៅលើស្ពានមួយ បាន​ថ្លែង​ឡើង​ថា ខ្លួន​មាន​បំណង​ចង់​សង​សឹក ឲ្យបណ្ដាជនម៉ូស្លីមទាំងឡាយ ដែលបានរងគ្រោះ ព្រោះការវាយប្រហារ តាម​ផ្លូវ​អាកាស ពី​សំណាក់​ក្រុម​សម្ព័ន្​ធមិត្ត «ឈើ​ឆ្កាង (និមិត្តសញ្ញារបស់សាសនាគ្រឹស្ទ៍)»។

ថ្ងៃខែពេលវេលា និងទីកន្លែង ដែលជននេះ បានថតវីដេអូនេះ មិនត្រូវបានបញ្ជាក់ទេ។

កាលពីព្រឹកថ្ងៃសុក្រ ប៉ុន្មានម៉ោង​ក្រោយ​ការ​បាញ់​សម្លាប់​ជនសង្ស័យ ពីសំណាក់នគរបាលអ៊ីតាលី នៅក្រុង​មីឡង់ (Milan - ភាគខាងជើងអ៊ីតាលី) ក្រុមរដ្ឋអ៊ីស្លាម​ក៏បានចេញសេក្ដីប្រកាសព័ត៌មានមួយដែរ បញ្ជាក់​ថា​ជន​ដែល​ត្រូវ​បាញ់​ស្លាប់នោះ ពិតជាអ្នកកាន់ចង្កូតរថយន្ដ បើកបុកចូលហ្វូងមនុស្ស នៃផ្សារាត្រី​សម្រាប់​បុណ្យ​ណូអែល​​មួយ នៅភាគខាងលិច​រដ្ឋធានី​ប៊ែរឡាំង កាលពីយប់ថ្ងៃចន្ទ ដែលបានធ្វើឲ្យមនុស្ស១២នាក់ស្លាប់ និង​៥០នាក់​រង​របួស។

» វីដេអូរបស់ក្រុមរដ្ឋអ៊ីស្លាម បង្ហាញពីការស្បថស្បែ របស់ជនសង្ស័យ៖

ភេរវកម្ម​នៅ​ប៊ែរឡាំង៖ ជន​សង្ស័យ​ត្រូវ​បាន​សម្លាប់ នៅ​អ៊ីតាលី

ភេរវកម្ម​នៅ​ប៊ែរឡាំង៖ ជន​សង្ស័យ​ត្រូវ​បាន​សម្លាប់ នៅ​អ៊ីតាលី

ព័ត៌មានខាងលើ ត្រូវបានអះអាងបន្ថែម ដោយរដ្ឋមន្ត្រីមហាផ្ទៃ នៃប្រទេសអ៊ីតាលី លោក ម៉ាកូ មីននីទី (Marco Minniti) នៅក្នុងសន្និសីទសារព័ត៌មាន ដែលទើបនឹងធ្វើ ក្នុងព្រឹកថ្ងៃសុក្រនេះ។ លោករដ្ឋមន្ត្រី​បាន​បញ្ជាក់​ថា ជនដែល​ត្រូវ​បានសម្លាប់នេះ គឺពិតជាជនសង្ស័យ ឈ្មោះ អានីស អាមេរី (Anis Amri) អាយុ២៤ឆ្នាំ ដែល​កំពុង​រត់​គេច​ខ្លួន ពីការតាមចាប់ខ្លួន នៅពាសពេញទ្វីបអ៊ឺរ៉ុប។

ជននេះ ត្រូវបានអាជ្ញាធរអាល្លឺម៉ង់ ចេញដីកាស្វែងរកចាប់ខ្លួន កាលពីយប់ថ្ងៃពុធ បន្ទាប់ពីបានសង្ស័យ​ជន​នេះ ថាបានបើករថយន្ដដឹកទំនិញធុនធ្ងន់ បុកចូលហ្វូងមនុស្ស នៃផ្សារាត្រី​សម្រាប់​បុណ្យ​ណូអែល​មួយ​កន្លែង ស្ថិត​នៅ​ភាគ​ខាង​លិច នៃរដ្ឋធានីប៊ែរឡាំង ប្រទេសអាល្លឺម៉ង់ កាលពីយប់ថ្ងៃចន្ទ។ ហេតុការណ៍ដ៏រន្ធត់នេះ បាន​បណ្ដាល​​ឲ្យ​​មនុស្ស​១២នាក់ស្លាប់ និង៥០នាក់​ផ្សេង​ទៀត រងរបួស។

រដ្ឋមន្ត្រីមហាផ្ទៃអ៊ីតាលី បានថ្លែងពន្យល់ថា ជនសង្ស័យបានជាប់ នៅក្នុងការត្រួតពិនិត្យមួយ ដែលកងកម្លាំង​នគរបាលអ៊ីតាលី ក្នុងក្រុងមីឡង់ (Milan) តែងបានធ្វើជាធម្មតា។ ពេលនោះ ជននេះបានដកកាំភ្លើង ដោយ​គ្មាន​ការ​រារែក សំដៅទៅកងកម្លាំងអាជ្ញាធរ ដែលធ្វើឲ្យភ្នាក់ងារនគរបាល នៅនឹងកន្លែង បានផ្ទុះអាវុធភ្លាមៗ ដើម្បី​ការពារ​ខ្លួន។

បើតាមប្រព័ន្ធផ្សព្វផ្សាយអ៊ីតាលី បានឲ្យដឹងថា ជនសង្ស័យ​បានមកដល់ប្រទេសអ៊ីតាលីនេះ ដោយធ្វើដំណើរ​ចេញពីអាល្លឺម៉ង់ ចូលមកក្នុងប្រទេសបារាំង ជាមុនសិន ទើបបានជិះរថភ្លើង មកកាន់ក្រុងទួរ៉ាំង (Turin - ប្រទេស​​អ៊ីតាលី) ដើម្បីបន្តដំណើរ មកដល់ក្រុងមីឡង់​នៅទីបញ្ចប់។ សារព័ត៌មាន «Sky TG24» បាន​អះអាង​ថា កាំភ្លើង​ដែល​ជន​សង្ស័យ​បានប្រើ នៅក្នុងប្រទេសអ៊ីតាលី (ប្រឆាំងនឹងអាជ្ញាធរ) មាន​បំពង់​កាលីព (Calibre)  និង​​គ្រាប់​ដូចគ្នា ទៅ​នឹងកាលីព និង​គ្រាប់​កាំភ្លើង ដែល​បាន​​បាញ់សម្លាប់ អ្នកបើកបរ​(ពិត​ប្រាកដ) របស់​ម្ចាស់​រថយន្ដ ជាតិ​​ប៉ូឡូញ (រក​ឃើញ​ស្លាប់ នៅ​ក្នុង​​បន្ទប់​បើកបរ ក្រោយពេលកើតហេតុ)។

មុននឹងចូលទៅរស់នៅ ក្នុងប្រទេសអាល្លឺម៉ង់ នាឆ្នាំ២០១៥ ជនសង្ស័យ អានីស អាមរី បានរស់នៅ​អស់​រយៈ​ពេល​៤ឆ្នាំ ក្នុងប្រទេសអ៊ីតាលី បន្ទាប់ពីជននេះ បានភៀសខ្លួនតាមកាណូត ចេញពីប្រទេសទួនេស៊ី (ដែល​ជា​ប្រទេស​ដើមកំណើត) មកកាន់កោះ«Lampedusa (អ៊ីតាលី)» នៅក្នុងឆ្នាំ២០១១។ ក្នុងរយៈ​ពេល​៤ឆ្នាំ​នេះ ជន​សង្ស័យ​បាន​រស់នៅ តែនៅក្នុងពន្ធនាគារប៉ុណ្ណោះ បន្ទាប់ពីជននេះ ត្រូវបានតុលាការផ្ដន្ទាទោស ព្រោះបាន​ដុត​សាលា​រៀន​មួយកន្លែង។

ក្រុមអ្នកស៊ើអង្កេតអាល្លឺម៉ង់ បានសម្ដែងការជឿជាក់ថា ជនសង្ស័យ គឺពិតជាអ្នកកាន់ចង្កូតរថយន្ដ ដែលបាន​បើកបំបុកចូលហ្វូងមនុស្ស កាលពីយប់ថ្ងៃចន្ទ។ ចន្លោះ ពីពេលកើតហេតុ មកដល់ពេល ដែលជួប​ជាមួយ​នគរបាល​អ៊ីតាលី ជនសង្ស័យបានរត់គេចខ្លួន ពីសំណាក់ច្បាប់ បានរយៈពេលត្រឹមតែ៣០ម៉ោងប៉ុណ្ណោះ៕